حوككەي • 16 قازان، 2021

قحل: «بارىس» «كۋنلۋن رەد ستاردان» باسىم ءتۇستى

118 رەت كورسەتىلدى

«بارىس» بۇگىن قۇرلىقتىق حوككەي ليگاسىنداعى كەزەكتى ويىنىن قىتايدىڭ «كۋنلۋن رەد ستار» (بەيجىڭ) كومانداسىمەن وتكىزدى، دەپ حابارلايدى Egemen.kz.

ەكى كوماندا بيىلعى ءتۋرنيردى ءساتسىز وتكىزىپ كەلەدى. قازىر «بارىس» 17 ويىننان كەيىن 14 ۇپايمەن تۋرنير كەستەسىندە 18-ورىندا كەلەدى.

ال «كۋنلۋن رەد ستار» 11 ۇپايمەن 23-ورىندا تۇرعان ەدى. سوندىقتان ويىن بارىسىندا كوماندالار شايبا سوعۋدىڭ جولىن ىزدەدى. ءبىرىنشى كەزەڭدە ەسەپ اشىلعان جوق.

ەكىنشى كەزەڭنىڭ 21-مينۋتىندا نيكيتا ميحايليس قارسىلاستار قاقپاسىنان ساڭىلاۋ تاپتى. وسىلايشا قازاقستاندىق كلۋب العا شىقتى. ءۇشىنشى كەزەڭ اسا تارتىستى ءوتتى. كوماندالار نەگىزىنەن شابۋىل شەبىندە بوي كورسەتتى.

قىتايلىق كوماندادان 58-مينۋتتا تايلەر ۆونگ تارازى باسىن تەڭەستىرىپ، ويىن وۆەرتايمعا ۇلاستى. وۆەرتايمدا جەڭىمپاز انىقتالعان جوق. بۋلليتەن «بارىس» باسىم ءتۇستى.

ەكى كوماندا بۇگىنگە دەيىن 16 مارتە شەبەرلىك بايقاستى. ونىڭ 11-ءى «بارىستىڭ» باسىمدىعىمەن اياقتالسا، قالعانىندا قىتايلىق كلۋبتىڭ مەرەيى ۇستەم بولدى.

ەندى «بارىس» الداعى ويىنىن 17 قازاندا رەسەيدىڭ سكا (سانكت-پەتەربۋرگ) كومانداسىمەن وتكىزەدى.

 

سوڭعى جاڭالىقتار

ۇقساس جاڭالىقتار