ايماقتار • 14 قازان، 2021

3-6 جاس ارالىعىنداعى بالالاردى 100% بالاباقشامەن قامتۋ جوسپارلانعان – باۋىرجان بايبەك

«Nur Otan» توراعاسىنىڭ ءبىرىنشى ورىنباسارى باۋىرجان بايبەك ەلباسى، پارتيا ليدەرى نۇرسۇلتان نازارباەۆتىڭ تاپسىرماسى بويىنشا وڭىرلەرگە ساپارىن جالعاستىرۋدا. بۇگىن ول ماڭعىستاۋ وبلىسىندا سايلاۋالدى ۋادەلەردىڭ ورىندالۋ بارىسىمەن تانىستى، دەپ حابارلايدى Egemen.kz.

گاۋھار قاپاش

وڭىردە 9 اي ىشىندە 2025 جىلعا دەيىن جوسپارلانعان 872 ءىس-شارانىڭ 27%-ى ورىندالعان. 809 مىڭ شارشى مەتر تۇرعىن ءۇي بوي كوتەرگەن، 28 مەكتەپ سالىنىپ، جوندەۋدەن وتكەن، 22 مىڭ تۇراقتى جاڭا جۇمىس ورنى اشىلدى.

باۋىرجان بايبەك اتاپ وتكەندەي، مەملەكەت باسشىسى قاسىم-جومارت توقاەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسى اياسىندا بالالاردى مەكتەپكە دەيىنگى ءبىلىم بەرۋمەن قامتاماسىز ەتۋگە ەرەكشە نازار اۋدارىلادى. 2025 جىلعا قاراي وڭىرلەردە 3-تەن 6 جاسقا دەيىنگى بالالاردى 100% بالاباقشامەن قامتۋ، سونداي-اق كەزەككە قويۋ ءتارتىبىن تولىقتاي تسيفرلاندىرۋمەن قامتاماسىز ەتۋ جوسپارلانۋدا.

«ماڭعىستاۋ وبلىسىندا جىل باسىنان بەرى 18 مەكتەپكە دەيىنگى مەكەمە اشىلدى. ساپار بارىسىندا تۇپقاراعان اۋدانى سايىن شاپاعاتوۆ اتىنداعى اۋىلدا جەكە ينۆەستيتسيا ەسەبىنەن اشىلعان «HADIYA» بالاباقشاسىندا بولدىم. تاربيەشىلەرمەن بىرگە ۇستازداردىڭ الەۋمەتتىك جاعدايىن جاقسارتۋ، جاس وتباسىلارعا تۇرعىن ءۇي سالۋ، اۋىل وكرۋگتەرىن ساپالى اۋىزسۋمەن قامتاماسىز ەتۋ جانە وزگە دە ماسەلەلەردى تالقىلادىق»، دەپ جازدى ول Facebook-تەگى پاراقشاسىندا.

بۇدان كەيىن اقشۇقىر اۋىلىندا باۋىرجان بايبەك «سۇلەيمەن» جاڭا سپورت كەشەنىن ارالادى. كەشەندە جاستار ءۇشىن كۇرەس، دزيۋدو، كاراتە، كوركەم گيمناستيكا، ءجۇزۋ جانە ت.ب. سپورت تۇرلەرى قولجەتىمدى.

پارتيا توراعاسى ءبىرىنشى ورىنباسارىنىڭ ايتۋىنشا، جالپى سايلاۋالدى باعدارلاما اياسىندا بيىل وڭىرلەردە 127 مىڭنان استام سپورت سەكتسياسى اشىلىپ، 22 مىڭنان استام بالالار ۇيىرمەلەرىنىڭ جۇمىسى قايتا جاندانعان. جاتتىقتىرۋشى-وقىتۋشىلاردىڭ جالاقىسى 1،5 ەسە وسكەن، ال 2023 جىلعا قاراي 2 ەسە ارتادى.

وسى كۇنى كەزەكتەن تىس كونفەرەنتسيادا «Nur Otan»-نىڭ وبلىستىق فيليالىنىڭ جاڭا توراعاسى بولىپ نۇرلان نوعاەۆ سايلاندى.

«فيليال باسشىلىعىنىڭ الدىنا ءاربىر اۋدان مەن قالادا سايلاۋالدى مىندەتتەمەلەلەردى ساپالى ورىنداۋ، فراكتسيالار مەن قوعامدىق كەڭەستەر جۇمىسىن جانداندىرۋ، سونداي-اق، پارتيانىڭ قوعامدىق قابىلداۋ بولمەلەرى ارقىلى تۇرعىنداردىڭ ماسەلەلەرىن شەشۋدىڭ تيىمدىلىگىن ارتتىرۋ مىندەتتەرى قويىلدى»، – دەدى «Nur Otan» پارتياسى توراعاسىنىڭ ءبىرىنشى ورىنباسارى.

پارتيانىڭ ءباسپاسوز قىزمەتى تاراتقان اقپاراتقا سايكەس، ساپار بارىسىندا باۋىرجان بايبەك ەلىمىزدىڭ باتىس وڭىرلەرىندە: اقتوبە، اتىراۋ، باتىس قازاقستان جانە ماڭعىستاۋ وبلىستارىندا سايلاۋالدى ۋادەلەردىڭ ىسكە اسىرىلۋ بارىسىن ونلاين فورماتتا تالقىلاعان.