بۇل تۋرالى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسى ءمالىم ەتتى.
11 قازان ساعات 10:00-دەگى جاعداي بويىنشا 7 045 196 رەسپوندەنت ونلاين ساناقتان ءوتتى. ولاردىڭ 6 040 911-ءى sanaq.gov.kz سايتىندا, 700 972 ادام Egov پورتالىندا تىركەلۋ ارقىلى جاۋاپ بەرسە, 303 313 ادام ساناققا اitu قوسىمشاسى ارقىلى قاتىستى.
«ونلاين ساناقتان وتكەندەر سانى بويىنشا تۇركىستان وبلىسى الدا. مۇندا 913 074 تۇرعىن ساناقتان وتكەنى جايلى حابارلاما العان. ونلاين ساناقتان وتكەن تاعى 746 343 ادام الماتى وبلىسىندا تىركەلگەن. ۇزدىك ۇشتىكتى شىعىس قازاقستان وبلىسى تۇيىندەدى. مۇندا 707384 ادام ساناق ساۋالدارىنا جاۋاپ بەردى. بۇل كورسەتكىش بويىنشا ازىرگە سوڭعى ەكى ورىندى ماڭعىستاۋ جانە سولتۇستىك قازاقستان وبلىستارى ەنشىلەپ تۇر. بۇل وڭىرلەردە سايكەسىنشە 215 464 جانە 165 749 ادام ساناقتان ءوتىپتى.
ال جەرگىلىكتى حالىق سانىنا شاققانداعى ساناقتان وتكەندەردىڭ ۇلەسى بويىنشا شىعىس قازاقستان وبلىسى الدا تۇر. مۇندا ازاماتتاردىڭ 52% ساۋالدارعا جاۋاپ بەرگەن (1 تامىزداعى جاعداي بويىنشا وڭىردە 1 361 163 ادام تىركەلگەن). بۇل كورسەتكىش بويىنشا قىزىلوردا وبلىسى ەكىنشى ورىندا. مۇندا تۇرعىنداردىڭ 51,1% بۇگىنگە دەيىن ساناقتان ونلاين رەجيمدە وتكەن. 1 تامىزداعى جاعداي بويىنشا وڭىردە 823 052 ادام تىركەلگەن», دەلىنگەن ۆەدومستۆو حابارلاماسىندا.
1 قازاننان باستاپ ينتەرۆيۋەرلەر ۇيلەردى جاپپاي ارالاۋدى باستاعان ەدى. 10 كۇننىڭ قورىتىندىسى بويىنشا وفلاين ساناقپەن ەلىمىزدىڭ 1 445 204 تۇرعىنى قامتىلعان.
ايتا كەتەيىك, ونلاين ساناقتان ءوتۋ مۇمكىندىگى الداعى 4 كۇن, ياعني قازاننىڭ 15-نە دەيىن قولجەتىمدى بولماق. ونلاين ساناقتان تەك ۇيدە عانا ەمەس, ەل بويىنشا اشىلعان 3 مىڭنان اسا «ساناق بۇرىشتارىندا» وتۋگە بولادى. ولار حالىققا قىزمەت كورسەتۋ ورتالىقتارى, «قازپوچتا» فيليالدارى مەن ساۋدا-ويىن ساۋىق ورتالىقتارىندا ورنالاسقان.
ونلاين ساناقتان وتپەگەندەر 30 قازانعا دەيىن ينتەرۆيۋەرلەردىڭ ساۋالدارىنا جاۋاپ بەرە الادى. بارلىق ساۋالدار بويىنشا 1446 بايلانىس ورتالىعىنا حابارلاسۋعا بولادى. قوڭىراۋ شالۋ تەگىن.
