شىمكەنتتە ىندەتتىڭ تارالۋى ازايىپ, ينفەكتسيالىق ستاتسيونارداعى توسەكتىك ورىنداردىڭ باسىم بولىگى قىسقارتىلدى. مامانداردىڭ ايتۋىنشا, بۇل – يممۋنداۋ شاراسىنىڭ ناتيجەسى. دەنساۋلىق ساقتاۋ باسقارماسى ءۇشىنشى مەگاپوليس كوروناۆيرۋسقا قارسى ۆاكتسينا سالدىرۋ بويىنشا باستاپقى جوسپار 100 پايىزعا ورىندالعانىن حابارلادى. «جاسىل ايماققا» كىرگەن شىمكەنتتە وتكەن تاۋلىكتە, ياعني 10 قازاندا كوروناۆيرۋستىڭ 28 جاعدايى تىركەلدى. ونىڭ ىشىندە 8 ادام ينفەكتسيالىق ستاتسيونارعا جاتقىزىلىپ, 20 ادام ءۇي باقىلاۋىنا الىندى. دارىگەرلەردىڭ كومەگىمەن ىندەتتەن ايىعىپ, وتباسىنا ورالىپ جاتقاندار قاتارى دا ارتا تۇسۋدە. مىسالى, COVID-19 ينفەكتسياسىنا شالدىعىپ, وكپەسىنىڭ 62 پايىزى زاقىمدالىپ اۋرۋحاناعا تۇسكەن 72 جاستاعى اجەي قاۋىپتى ينفەكتسيانى جەڭىپ شىقتى. ناۋقاستى دارىگەرلەر ءبىر ايعا جۋىق حاتتاما بويىنشا ەمدەگەن. قالا تۇرعىنى شاراپات مىرزاليەۆا وتە اۋىر حالدە 14-قىركۇيەك كۇنى قالالىق جۇقپالى اۋرۋلار ورتالىعىنا كەلىپ تۇسكەن. كەلگەن كەزدەگى جاعدايى بويىنشا قانداعى وتتەگى مولشەرى, ياعني ساتۋراتسياسى 50-دەن تومەن بولعان. دارىگەرلەر ناۋقاستى جاساندى تىنىس الۋ اپپاراتىنا قوسىپ, شۇعىل ەمدىك شارالارىن جۇرگىزدى. قارت كىسىنىڭ ارتەريالىق قان قىسىمى جانە اسقازان مەن باۋىردا قوسالقى اۋرۋلارى بولعان. «تۇسكەن كەزدە جاعدايى وتە اۋىر بولدى. كومپيۋتەرلىك توموگرافيامەن تەكسەرۋ ناتيجەسىندە ناۋقاستىڭ وكپەسى 62 پايىز زاقىمدالعانى انىقتالدى. ناۋقاسقا حاتتاما بويىنشا تولىق ەم كورسەتىلدى. قازىرگى جاعدايى جاقسى. وزدىگىنەن دەم الۋدا. قانداعى وتتەگى مولشەرى ورنىنا كەلدى. اپا تولىق ەمدەلىپ, ۇيىنە ورالدى», دەيدى دارىگەر بەكەن سىربەك ۇلى.
دارىگەرلەر ىندەت جۇقتىرعانداردىڭ ازايۋىنا, ءدال دياگنوز قويۋعا جانە ناۋقاستارعا ساپالى كومەك كورسەتۋگە زاماناۋي جابدىقتاردىڭ سەپتىگى مول ەكەنىن ايتادى. وسى ورايدا جۋىردا «ۇلتتىق ساراپتاما ورتالىعى» مك مەن ءيزرايلدىڭ AID Genomics حالىقارالىق گەنومدىق كومپانياسى اراسىنداعى كەلىسىم شەڭبەرىندە شىمكەنتتە كوروناۆيرۋس ينفەكتسياسىن دياگنوستيكالاۋعا ارنالعان زەرتحانالىق كەشەن اشىلعانىن ايتا كەتەلىك. AID Genomics جۇقپالى اۋرۋلاردى دياگنوستيكالاۋعا مامانداندىرىلعان جەتەكشى دياگنوستيكالىق كومپانيا ىنتىماقتاستىق اياسىندا كوروناۆيرۋس ينفەكتسياسىن زەرتتەۋ جابدىقتارى بويىنشا گۋمانيتارلىق كومەك كورسەتتى. زەرتحانالىق جابدىق تاۋلىگىنە 2 500-گە دەيىن تەست ورىنداۋعا قابىلەتتى, ونىمدىلىگى جوعارى تولىق اۆتوماتتاندىرىلعان كەشەن. زەرتحانامەن بىرگە ناتيجەلەردى قالىپتاستىرۋ, پروتسەستى مونيتورينگتەۋ جانە جەدەلدەتۋ ءۇشىن جاساندى ينتەللەكت تەحنولوگياسى قولدانىلاتىن جەكە ازىرلەنگەن قامتاماسىز ەتۋ باعدارلاماسى پايدالانۋعا بەرىلدى. سالا ماماندارى قازاقستاننىڭ يزرايلدەگى ەلشىلىگىنىڭ قولداۋىمەن جۇزەگە اسىرىلعان بۇل باستاما ادام فاكتورىنىڭ اسەرىن بارىنشا ازايتىپ, ناتيجەلەردىڭ دالدىگىن قامتاماسىز ەتەتىنىن ايتۋدا.
