گاز جەتكىزۋ كولەمى جىلىنا 300 ملن تەكشە مەتردەن 600 ملن تەكشە مەتردى قۇرايدى, ءوزارا كەلىسىمنىڭ مەرزىمى كەمى – 15 جىل.
كەلىسىمگە قول قويۋ راسىمىنە «ارسەلورميتتال تەمىرتاۋ» اق باس ديرەكتورى بيدجۋ ناير جانە «اقتوبە-رگس» جشس ديرەكتورى نۇرگۇل كاكتاەۆا قاتىستى.
«مەتاللۋرگيا كومبيناتىن تابيعي گازعا اۋىستىرۋ سەكىلدى كومپانيا قولعا العان ەكولوگيالىق شارالاردىڭ باستى ماقساتى – قورشاعان ورتاعا زياندى شىعارىندىلار كولەمىن ازايتۋ جانە وسى ارقىلى كومبيناتتى باتىس ەۋروپالىق ونەركاسىپتىك كاسىپورىندار دەڭگەيىنە كوتەرۋ. ونىڭ «سارىارقا» ماگيسترالدىق گاز قۇبىرىنا قوسىلۋى ەكولوگياعا دا يگى اسەرىن تيگىزەدى. اينالانى لاستايتىن نەگىزىنەن ەنەرگەتيكالىق كومىر, مازۋت سىندى وتىن تۇرلەرى ەكەنى بەلگىلى. كومپانيا قورشاعان ورتاعا پايداسى كوپ وسىنداي كوپتەگەن جوبالاردى جۇزەگە اسىرۋدى جوسپارلاپ وتىر. مۇنداي ەكولوگيالىق ءىس-شارالار زياندى قالدىقتار كولەمىن تومەندەتۋگە مۇمكىندىك بەرەدى», دەپ اتاپ ءوتتى «ارسەلورميتتال تەمىرتاۋ» اق باس ديرەكتورى ب.ناير.
ەستەرىڭىزگە سالا كەتەيىك, بيىل قازاقستان ۇكىمەتى مەن «ارسەلورميتتال تەمىرتاۋ» ءوزارا تۇسىنىستىك تۋرالى مەموراندۋمعا قول قويدى. قۇجاتتا كورسەتىلگەن شارتتار بويىنشا «ارسەلورميتتال تەمىرتاۋ» اق زياندى شىعارىندىلار ماسەلەلەرىن شەشۋمەن قاتار, ءوندىرىستى جاڭعىرتۋعا باعىتتالعان ينۆەستيتسيالار قاتارىن ارتتىرۋعا مۇددەلى. ينۆەستيتسيالىق كەلىسىمشارت شەڭبەرىندەگى جيىنتىق كولەم الداعى ون جىل ىشىندە كەمىندە 3 ملرد دوللاردى قۇرايدى. بۇل سومانىڭ باسىم بولىگى كەلىسىمنىڭ العاشقى بەس جىلىندا ينۆەستيتسيالانباق.
