تارازدىقتاردى كەشەننىڭ اشىلۋىمەن قۇتتىقتاعان ايماق باسشىسى بەردىبەك ساپارباەۆ قر پرەزيدەنتىنىڭ جولداۋىن ىسكە اسىرۋ شەڭبەرىندە وڭىردە بۇقارالىق سپورتتى دامىتۋ ماقساتىندا اۋقىمدى شارالار اتقارىلىپ جاتقانىن ايتتى.
ء«اربىر مەملەكەتتى, ۇلتتى الەمگە تانىتاتىن, ابىرويىن ارتتىراتىن بىردەن-ءبىر دۇنيە – سپورت. تاۋەلسىزدىك جىلدارى قازاقستاننان تالاي وليمپيادا, الەم, ازيا چەمپيوندارى شىقتى. مەملەكەت باسشىلىعىنىڭ تاپسىرماسىنا سايكەس وڭىردە بۇقارالىق سپورتپەن جۇيەلى تۇردە شۇعىلداناتىنداردىڭ كورسەتكىشى ارتىپ كەلەدى.
بۇگىندە ولاردىڭ سانى 400 مىڭعا جۋىقتاپ, 34,4 پايىزدى قۇراسا, ءبىز بۇل كورسەتكىشىتى 40 پايىزعا جەتكىزۋدى كوزدەپ وتىرمىز. جاستارىمىز سپورتپەن اينالىسىپ, جامان ادەتتەردەن اۋلاق بولۋى ءتيىس. ول ءۇشىن جەرگىلىكتى بيلىك جاعداي جاساۋى قاجەت. جىل سايىن جاڭادان سپورت كەشەندەرى بوي كوتەرىپ, حالىق يگىلىگىنە بەرىلۋدە. وتكەن جىلى 14 دەنە شىنىقتىرۋ-ساۋىقتىرۋ كەشەنى جانە 92 سپورت الاڭشاسى قولدانىسقا بەرىلدى.
وبلىستا العاش رەت اشىلىپ وتىرعان گيمناستيكا جانە ۇستەل تەننيسى سپورت كەشەنىن سالىپ بەرگەن جەكە ينۆەستور «تارازستروي2004» جاۋاپكەرشىلىگى شەكتەۋلى سەرىكتەستىگىنىڭ باسشىسى مەيىربەك جۇنىسبەكوۆكە العىسىمىزدى بىلدىرەمىز. مۇنداي زاماناۋي نىساندا جاتتىققان بالالار ەرتەڭ چەمپيون اتانارىنا سەنىمدىمىز», دەدى وبلىس اكىمى.
ۇستەل تەننيسىنىڭ ارداگەرى اناتولي گونچاروۆ قازىر ەلىمىزدە سپورتتىڭ بۇل ءتۇرى جاقسى قولعا الىنىپ, دامىپ كەلە جاتقانىن تىلگە تيەك ەتىپ, جاڭا عيماراتتىڭ جابدىقتالۋىن جوعارى باعالادى.
«ۇستەل تەننيسى – بۇل الەمدەگى ەڭ تانىمال جانە 850 ميلليوننان استام جانكۇيەرى بار وليمپيادالىق سپورت ءتۇرى. وبلىستا اۋەسقوي دەڭگەيدە ۇستەل تەننيسىمەن 9734 سپورتشى, كاسىبي دەڭگەيدە 640 سپورتشى اينالىسادى جانە 21 جاتتىقتىرۋشى بار. بۇگىنگى اشىلىپ وتىرعان كەشەن سپورتشىلاردىڭ كاسىبي وسۋىنە جانە شۇعىلدانۋشىلار كونتينگەنتىن ارتتىرۋعا جاعداي جاسايدى», دەپ سەنىم ءبىلدىردى ول.
اكروباتيكا جانە باتۋتتاعى گيمناستيكادان سپورت ارداگەرى ولگا نازاروۆا كەڭ ءارى جوعارى دەڭگەيدە جابدىقتالعان زال گيمناستيكانى ءتيىستى دەڭگەيدە دامىتۋعا جانە بالالاردى دەنە شىنىقتىرۋ مەن سپورتقا جاپپاي تارتۋعا مۇمكىندىك بەرەتىنىن ايتتى.
مۇندا وقۋ-جاتتىعۋ ساباقتارىن, شەبەرلىك سىنىپتارىن وتكىزۋ ءۇشىن كاسىبي سپورتشىلار مەن جاتتىقتىرۋشىلاردى تارتۋ جوسپارلانۋدا.
سىيىمدىلىعى 600 ادامدى قۇرايتىن كەشەن ۇستەل تەنيسى (300 ادام) جانە كوركەم گيناستيكاعا (300 ادام) ارنالعان ەكى ۇلكەن سپورت زالدان تۇرادى. قۇنى 1,5 ميلليارد تەڭگە بولاتىن جوبا قۇرىلىسى اعىمداعى جىلدىڭ ناۋرىز ايىندا باستالىپ, بۇگىندە تولىعىمەن اياقتالعان.
