جالپى, بىلتىر ەلىمىزدە مەديتسينا قىزمەتكەرلەرىنىڭ تاپشىلىعى 5 201 ماماندى قۇرادى. ەڭ جوعارى قاجەتتىلىك – قوستاناي وبلىسىندا. وندا 624 دارىگەر جەتىسپەيتىنى ءمالىم بولدى. ق.توسەكباەۆ وتكەن جىلى مەديتسينالىق كادرلاردىڭ جۇمىستان شىعۋىنىڭ نەگىزگى سەبەپتەرىنىڭ ءبىرى سىرتقى كوشى-قون, ياعني مەديتسينالىق كادرلاردىڭ ەلدەن كەتۋى ەكەنىن اتاپ ءوتتى.
«قازىرگى كەزدە قازاقستاننىڭ بىرقاتار ايماعىندا دارىگەرلەردىڭ كوشىپ كەتۋى بايقالادى. بۇل ايماقتار – شىعىس قازاقستان, سولتۇستىك قازاقستان جانە قاراعاندى وبلىستارى. اتالعان ءۇش ءوڭىر مەديتسينالىق كادرلاردىڭ سىرتقى كوشى-قون بويىنشا كوش باستاپ تۇر. 2017 جىلى ورتاشا ەسەپپەن 1 062 ادام, 2018 جىلى 1 225 كادر, 2019 جىلى 1 212 قىزمەتكەر شەتەلگە قونىس اۋدارعان. ديپلوم العان كادرلاردىڭ ىشكى كوشى-قون دا ارتىپ وتىر», دەدى.
ەندەشە, وسى ماسەلە ءالى دە «قىزىل ايماقتا» تۇرعان الماتى قالاسىندا قالاي شەشىمىن تاۋىپ وتىر؟ سونىمەن ورتا مەديتسينالىق قىزمەتكەرلەردى دايارلاۋ ءۇشىن الماتى قالاسىنىڭ اكىمدىگى كوللەدجدە وقۋ ءۇشىن 391 گرانتقا قارجى ءبولدى. بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتىنىڭ ءباسپاسوز كونفەرەنتسياسىندا قالا اكىمىنىڭ ورىنباسارى ەرجان باباقۇماروۆ باياندادى.
بيىل قالا اكىمى باقىتجان ساعىنتاەۆ مەديتسينا كادرلارىنىڭ تاپشىلىعىن تومەندەتۋ بويىنشا جول كارتاسىن بەكىتتى. جول كارتاسىنىڭ ءىس-شارالارى اياسىندا وتە تاپشى دارىگەرلىك ماماندىقتار بويىنشا رەزيدەنتۋرادا وقۋ ءۇشىن 120 گرانتقا جەرگىلىكتى بيۋدجەتتەن قارجى ءبولىندى. رەزيدەنتتەردى وقىتۋ 1 قىركۇيەكتە باستالدى.
«مەديتسينا كادرلارىنىڭ تاپشىلىعى كوروناۆيرۋس ينفەكتسياسىن ەمدەۋگە ارنالعان جاڭا ستاتسيونارلار – ەكى مودۋلدىك ستاتسيونار جانە دەگدارداعى جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ فيليالى, سونداي-اق «حالىق ارەنا» كەشەنى جانە باسقا دا نىساندار ىسكە قوسىلعان كەزدە تۋىندادى. كەيىن ىندەتتىڭ ءتورتىنشى تولقىنى كەزىندە ەكى جاتاقحانا, قوناقۇي بازالارىندا ينفەكتسيالىق توسەكتىك ورىندار اشىلدى, ينفەكتسيالىق ستاتسيونارلارداعى جۇمىس ءۇشىن تولەمنىڭ ايىرماشىلىعىنا بايلانىستى مساك ۇيىمدارىنان ينفەكتسيالىق ستاتسيونارلارعا ۋاقىتشا جۇمىسقا مەديتسينا كادرلارى اۋىستىرىلدى», دەدى ە.باباقۇماروۆ.
بۇگىندە تۇراقتالۋ قارقىنىنا سايكەس كۆي-ءدى ەمدەۋگە تارتىلعان كوپبەيىندى ستاتسيونارلار بۇرىنعى جۇمىس ىرعاعىنا قايتا ورالعان. جوسپارلى ەمدەۋگە جاتقىزۋ جالعاسىپ جاتىر.
2021 جىلعى 1 قىركۇيەكتەگى جاعداي بويىنشا قالادا دارىگەرلەر تاپشىلىعى 215 بىرلىكتى, ورتا مەديتسينالىق پەرسونال 400-گە جۋىق شتاتتىق بىرلىكتى قۇرادى. ورتا مەديتسينالىق قىزمەتكەرلەردى دايارلاۋ ماقساتىندا كوللەدجدە وقىتۋعا 391 گرانت قارجىسى ءبولىندى.
سونداي-اق كۆي-مەن كۇرەسكە تارتىلعان قىزمەتكەرلەردى ىنتالاندىرۋ بويىنشا ءىس-شارالار كوزدەلگەن. ماماندار ءۇشىن 10 پاتەر ءبولىندى, 300 جاس مامان «الماتى جاستارى 3.0» تۇرعىن ءۇي باعدارلاماسىنا قاتىسۋعا مۇمكىندىك الدى.
