ەلىمىزدىڭ زاڭ شىعارۋشى, اتقارۋشى جانە سوت ورگاندارى, حالىقارالىق جانە ۇكىمەتتىك ەمەس ۇيىمدار, ەمدەۋ مەكەمەلەرى, ادۆوكاتۋرا مەن باق وكىلدەرى قاتىسقان كوميسسيا وتىرىسىندا حالىقتىڭ كونستيتۋتسيالىق قۇقىقتارىن ساقتاۋدىڭ وزەكتى ماسەلەلەرى تالقىلاندى.
ء«بىز بۇگىن وتە وزەكتى ماسەلەنى كوتەرىپ وتىرمىز. سەبەبى قازىرگى تاڭدا دەنساۋلىق ساقتاۋ سالاسى بۇقارالىق اقپارات قۇرالدارىندا, الەۋمەتتىك جەلىلەردە, جالپى قوعامدا قىزۋ تالقىلانىپ جۇرگەن تاقىرىپ ەكەنى بەلگىلى. وسى رەتتە دەنساۋلىق ساقتاۋ ورگاندارى تاراپىنان قابىلداناتىن شەشىمدەر مەن اتقارىلاتىن ىستەردىڭ كونستيتۋتسيالىق, قۇقىقتىق تۇرعىدان ءتيىستى تالاپتارعا ساي بولۋى اسا ماڭىزدى. بۇل رەتتە, ەڭ باستىسى, ەشكىمنىڭ قۇقىعى بۇزىلماۋعا ءتيىس. سوندىقتان بۇگىن وتاندىق مەديتسينانىڭ وسى باعىتتا قانشالىقتى ءتيىمدى جۇمىس ىستەپ جاتقانىنا نازار اۋدارۋ ءۇشىن جينالىپ وتىرمىز. وسىنداي ماسەلەلەر ازاماتتارىمىزدىڭ قۇقىقتارىن جۇيەلى تۇردە قورعايتىن تاراپتاردىڭ ۇنەمى باستى نازارىندا», دەدى ادام قۇقىقتارى جونىندەگى كوميسسيانىڭ توراعاسى ي.روگوۆ.
ازاماتتاردىڭ دەنساۋلىعىن ساقتاۋ جانە ساپالى مەديتسينالىق كومەك الۋ سەكىلدى كونستيتۋتسيالىق قۇقىقتارىن قامتاماسىز ەتۋ باعىتىنداعى مينيسترلىكتىڭ باستى قىزمەتتەرى جايلى بايانداعان ا.تسوي حالىقتى كوروناۆيرۋس ينفەكتسياسىنا قارسى تولىق ۆاكتسينالاۋدان وتكىزۋدىڭ ماڭىزدىلىعىن ەسكە سالدى.
ەلىمىزدىڭ دەنساۋلىق ساقتاۋ جۇيەسى ەكىنشى جىل قاتارىنان پاندەميا كەسىرىنەن تۋىنداعان سىناقتارعا قارسى تۇرىپ كەلە جاتقانىن ايتقان مينيستر سوڭعى ەكى اپتادا سىرقاتتانۋشىلار سانى 1,6 ەسەگە تومەندەگەنىن دە حابارلادى. ا.تسويدىڭ مالىمدەۋىنشە, ەپيدەمياعا قارسى ءىس-شارالارعا 50 مىڭعا جۋىق مەديتسينا قىزمەتكەرى, رەزەرۆكە 9 100 مەديتسينا قىزمەتكەرى جۇمىلدىرىلعان. سونداي-اق وڭىرلەرگە 4 641 جاس مامان جىبەرىلگەن.
حالىقتىڭ تەستىلەۋگە قولجەتىمدىلىگىن قامتاماسىز ەتۋ ماقساتىندا زەرتحانالىق تەستىلەۋدىڭ قۋاتى تاۋلىگىنە 124 مىڭ تەستكە دەيىن جەتكىزىلگەنىن ايتىپ وتكەن مينيستر ۆاكتسينالاۋدىڭ ەلەكتروندىق پاسپورتى ازىرلەنىپ, حالىقارالىق جۇيەلەرمەن بىرىكتىرىلگەنىن مالىمدەدى. «بۇل بارلىق ۆاكتسينا ەگىلگەندەردىڭ تۇراقتى ەسەبىن جۇرگىزۋگە مۇمكىندىك بەرەدى», دەيدى ول.
كوميسسيا مۇشەلەرى تالقىلانىپ وتىرعان ماسەلەنىڭ وزەكتىلىگىن ايتا كەلىپ, كوروناۆيرۋس ينفەكتسياسىنىڭ الدىن الۋ جانە ەمدەۋ بارىسىندا قاراپايىم ازاماتتاردىڭ كونستيتۋتسيالىق قۇقىقتارىنىڭ ساقتالۋى مەن قامتاماسىز ەتىلۋى ماسەلەلەرىنە ەرەكشە نازار اۋداردى. باسقوسۋ بارىسىندا ءسوز تىزگىنىن العان ساراپشىلار ارنايى مامانداردىڭ قاتىسۋىمەن بارلىق ءموبيلدى بريگادالار, Call-ورتالىقتارى, كونسۋلتاتيۆتىك توپتاردىڭ جۇمىسىن كۇشەيتە وتىرىپ, كوروناۆيرۋس ينفەكتسياسى بار پاتسيەنتتەرگە العاشقى مەديتسينالىق-سانيتارلىق كومەكتى ۋاقتىلى ءارى ساپالى كورسەتۋ قاجەتتىلىگى تۋرالى اتاپ ءوتتى.
كوميسسيا وتىرىسىندا حالىقتى كوروناۆيرۋس ينفەكتسياسىنا قارسى تولىق ۆاكتسينالاۋدان وتكىزۋدىڭ قاجەتتىگى اتاپ ءوتىلدى. سونىمەن قاتار كوميسسيا مۇشەلەرى الەۋمەتتىك ماڭىزدى اۋرۋلاردىڭ بارلىق ءتۇرى بويىنشا حالىقتىڭ الەۋمەتتىك قاۋقارسىز توپتارى اراسىندا الدىن الۋ ءىس-شارالارىن وتكىزۋدى قامتاماسىز ەتۋدىڭ ماڭىزدىلىعىن اتاپ ءوتتى.
ساراپشىلار «اۋىل – ەل بەسىگى», «جۇمىسپەن قامتۋدىڭ جول كارتاسى», «بيزنەستىڭ جول كارتاسى» مەملەكەتتىك باعدارلامالار شەڭبەرىندە, سونداي-اق مەملەكەتتىك-جەكەشەلىك ارىپتەستىگى ء(مجا) تەتىكتەرىن پايدالانۋ ارقىلى, ونىڭ ىشىندە جەكە ينۆەستيتسيالار ەسەبىنەن شالعاي ەلدى مەكەندەر مەن اۋىلداردا دەنساۋلىق ساقتاۋ وبەكتىلەرىنىڭ سانىن ۇلعايتۋ قاجەتتىگىن اتاپ ءوتتى. بۇل رەتتە كوميسسيا مۇشەلەرى وبلىستار مەن رەسپۋبليكالىق ماڭىزى بار قالالاردىڭ جەرگىلىكتى اتقارۋشى ورگاندارى قىزمەتىنىڭ تيىمدىلىگىن ارتتىرۋدى, جىل سايىنعى باعالاۋ جۇيەسىنە اۋىلدىق جانە قالا ماڭىنداعى ەلدى مەكەندەردىڭ دەنساۋلىق ساقتاۋ وبەكتىلەرىمەن قامتاماسىز ەتىلۋى سياقتى كريتەريدى ەنگىزۋدى ۇسىندى.
سونىمەن قاتار وتىرىسقا قاتىسۋشىلار حالىقتى ءدارى-دارمەكپەن قامتاماسىز ەتۋدىڭ ءتيىمدى مودەلىن ەنگىزۋدىڭ وزەكتى ماسەلەلەرىن تالقىلادى. وسىعان وراي دەنساۋلىق ساقتاۋدى تسيفرلاندىرۋ جانە اقپاراتتاندىرۋ ارقىلى جاھاندىق باسەكەلەستىك جاعدايىندا حالىققا مەديتسينالىق قىزمەتتەردىڭ قولجەتىمدىلىگىن ارتتىرۋ كوزدەلىپ وتىر. مەديتسينالىق قىزمەتتىڭ ساپاسى مەن قولجەتىمدىلىگىن قامتاماسىز ەتۋ ارقىلى ءدارى-دارمەكتەردىڭ تىركەلگەن رەفەرەنتتىك باعالارىن پايدالانۋ ۇسىنىلدى.
وتىرىستا سونداي-اق ەلىمىزدىڭ ەمدەۋ مەكەمەلەرى ءۇشىن بىلىكتى مەديتسينا كادرلارىن دايارلاۋ مەن قايتا دايارلاۋدىڭ وزەكتى ماسەلەلەرى دە جان-جاقتى ءسوز بولدى. مەملەكەتتىك الەۋمەتتىك تاپسىرىس شەڭبەرىندە دەنساۋلىق ساقتاۋ سالاسىنداعى الەۋمەتتىك ماڭىزى بار جوبالاردى قارجىلاندىرۋ كولەمىن ۇلعايتۋ, سونداي-اق قىلمىستىق-اتقارۋ جۇيەسىنىڭ ەمدەۋ مەكەمەلەرى ءۇشىن جاڭا عيماراتتار سالۋدى قارجىلاندىرۋ تۋرالى ماسەلەلەردى قاراۋ جانە زەردەلەۋ ۇسىنىلدى.
كوميسسيا وتىرىسىندا سونداي-اق ادام قۇقىقتارىن قامتاماسىز ەتۋدىڭ وزەكتى ماسەلەلەرى مەن ازاپتاۋلارعا جانە قاتىگەزدىك قارىم-قاتىناستىڭ باسقا دا تۇرلەرىنە قارسى ءىس-قيمىل سالاسىنداعى پروكۋراتۋرا ورگاندارىنىڭ ءرولى تالقىلاندى. باسقوسۋدا تالقىعا تۇسكەن ماسەلەلەر مەن ۇسىنىستار مەملەكەت باسشىسىنىڭ, پارلامەنت پەن ۇكىمەتتىڭ نازارىنا جەتكىزىلمەك.
