KIOGE-2021 حالىقارالىق مۇناي جانە گاز كورمەسىنە قاتىسقان ەنەرگەتيكا ءمينيسترى ماعزۇم مىرزاعاليەۆتىڭ ايتۋىنشا, قازىر «قازمۇنايگاز» كومپانياسى مەن ونىڭ سەرىكتەستەرى اراسىندا اتالعان كەن ورىندارىن يگەرۋ تۇجىرىمداماسىن تاڭداۋ بويىنشا تالقىلاۋ ءجۇرىپ جاتىر.
– وتاندىق ءونىم كولەمىن ارتتىرۋ تۇرعىسىنان العاندا بۇل جوبالاردىڭ ماڭىزى زور. كۇندەلىكتى «قازمۇنايگازبەن» بىرلەسكەن جۇمىس بارىسىندا اتالعان كەن ورىندارىنىڭ الەۋەتى وتە جوعارى ەكەنىنە كوزىمىز جەتىپ وتىر. جىل سوڭىنا دەيىن كەن ورنىن يگەرۋدىڭ تۇجىرىمداماسىن تاڭداۋ بويىنشا شەشىم قابىلدانادى. 2028 جىلعا قاراي كەن يگەرۋدى باستايمىز, – دەدى مينيستر.
وتكەن ايدا ماڭعىستاۋ وبلىسىنا جۇمىس ساپارىمەن بارعان مەملەكەت باسشىسى قاسىم-جومارت توقاەۆ جالپى قۇنى شامامەن 5 ملرد دوللاردى قۇرايتىن «قالامقاس» جانە «حازار» ءىرى كەن ورىندارىن يگەرۋ جۇمىسىن باستاۋ جونىندەگى شەشىمدى تىلگە تيەك ەتكەن ەدى. سونداي-اق پرەزيدەنت كەن ورىندارىن يگەرۋ جۇمىستارىنا جەرگىلىكتى كومپانيالار مەن كادرلاردى بارىنشا تارتۋدىڭ ماڭىزدى ەكەنىن اتاپ وتكەن بولاتىن.
م.مىرزاعاليەۆ شىعىس قازاقستانعا گاز جەتكىزۋ جايىن دا باياندادى. ايتۋىنشا, شىعىسقا جاقىن ۋاقىتتا گاز تارتۋ جوسپاردا جوق.
– دەگەنمەن اتالعان ماسەلە مينيسترلىكتىڭ كۇن تارتىبىندە بار جانە ونى رەسەيمەن بىرلەسىپ شەشۋ قاراستىرىلىپ وتىر. اتالعان ءوڭىردى گازداندىرۋدى كورشى ەلدىڭ رەسۋرسى ەسەبىنەن شەشۋگە بولادى. ول ءۇشىن بولەك گاز قۇبىرىن تارتۋ قاجەت. شىعىستاعى زايسان اۋدانىن گازداندىرۋ جۇمىسى 2013-2014 جىلدارى باستالدى. گاز قۇبىرىن تارتۋ جوسپارىنا ساي 9 ەلدى مەكەنگە گاز جەتكىزىلدى. بۇگىندە جۇمىس جالعاسىپ جاتىر, – دەدى م.مىرزاعاليەۆ.
مينيستر ديزەل باعاسىنىڭ قىمباتتاۋىنا قاتىستى دا پىكىر ءبىلدىردى. ونىڭ ايتۋىنشا, ەلدەگى ديزەل وتىنىن تۇتىنۋ كولەمى تاريحي كورسەتكىشكە جەتكەن. بيىل تامىز-قىركۇيەك ايلارىندا شامامەن 520-540 مىڭ توننا ديزەل وتىنى پايدالانىلعان. بۇل – ەلىمىزدە بۇرىن-سوڭدى بولماعان رەكوردتىق كورسەتكىش.
– بىردەن ايتۋ كەرەك, ديزەل وتىنى مەن باسقا دا جانار-جاعارماي تۇرلەرىنىڭ باعاسى رەتتەلمەيدى. باعانى سۇرانىس پەن ۇسىنىسقا سۇيەنە وتىرىپ نارىق رەتتەيدى. سوندىقتان مينيسترلىك باعانى بەلگىلەۋگە ارالاسا المايدى. بۇگىندە مۇناي باعاسىنىڭ وسكەنى بايقالادى. ءبىر-ەكى كۇننىڭ ىشىندە باررەلى 78 دوللاردان 82 دوللارعا دەيىن ءوستى. ارينە, مۇناي باعاسىنىڭ وزگەرۋى جانار-جاعارمايدىڭ باعاسىنا اسەر ەتەدى, – دەدى ول.
مينيستر بۇگىندە ديزەل وتىنىن جەتكىزۋ وتكىر ماسەلەگە اينالعانىن مويىندادى. ايتۋىنشا, ونىڭ بىرنەشە سەبەبى بار.
– ءبىز ەلىمىزگە ديزەل وتىنىن جەتكىزۋ مەن تۇتىنۋ كولەمىنىڭ ارتقانىن بايقاپ وتىرمىز. قازان ايىندا رەسەيدەن كەم دەگەندە 100 مىڭ توننا ديزەل وتىنىن اكەلۋ مىندەتى تۇر. قىركۇيەك ايىنىڭ 20 كۇنىندە ەلىمىزگە 5 مىڭ توننا ديزەل وتىنى جەتكىزىلسە, قالعان 10 كۇننىڭ ىشىندە 15 مىڭ توننا ءونىم اكەلىندى. ال قازان باستالعالى 4 كۇننىڭ ىشىندە قازاقستانعا 12 مىڭ توننا ديزەل وتىنى كەلدى. قازىرگى ۋاقىتتا اتالعان وتىن ءتۇرىن جەتكىزۋ ماسەلەسى – كۇن تارتىبىندە جانە باقىلاۋدا. جالپى, يمپورتتىق وتىندى جەتكىزۋ مەن تۇتىنۋ ترەندىنە وڭ باعا بەرۋگە بولادى, – دەدى م.مىرزاعاليەۆ.
