ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى بيىلعى جولداۋىندا ءبىلىم جانە عىلىم جۇيەسىن دامىتۋ توڭىرەگىندە اۋقىمدى ماقسات-مىندەتتەر قويىلدى. ماسەلەن, كەلەشەككە باعدار بەرەتىن بۇل قۇجاتتا: «ءبىزدىڭ بولاشاققا بارار جولىمىز قازاقستاندىقتاردىڭ الەۋەتىن اشاتىن جاڭا مۇمكىندىكتەر جاساۋعا بايلانىستى. XXI عاسىرداعى دامىعان ەل دەگەنىمىز – بەلسەندى, ءبىلىمدى جانە دەنساۋلىعى مىقتى ازاماتتار. بۇل ءۇشىن ءبىز نە ىستەۋىمىز كەرەك؟» دەگەن جولدار بار. مەملەكەت باسشىسى قازاقستان حالقىنا وسىنداي ساۋال قويا وتىرىپ, وعان ءبىر مەزگىلدە جاۋاپ تا قاتا ءبىلدى, ەل الدىندا اۋقىمدى جۇمىستار تۇرعاندىعىنا توقتالدى.
ال ول ماقسات-مىندەتتەر قانداي؟ بىرىنشىدەن, ولاردىڭ نەگىزىندە ەلىمىزدىڭ ءبىلىم بەرۋ جۇيەسىن وزا دامىعان ەلدەردىڭ ءبىلىم بەرۋ ستاندارتىمەن سايكەستەندىرۋ يدەياسى جاتىر. وسىعان سايكەس, ەلباسى 2020 جىلعا قاراي, قازاقستانداعى 3-6 جاس ارالىعىنداعى بالالاردىڭ مەكتەپكە دەيىنگى بىلىممەن تولىقتاي, ياعني 100 پايىزعا دەيىن قامتىلۋى تيىستىگىن اتاپ ءوتتى. سونداي-اق, سول جاس جەتكىنشەكتەرگە زاماناۋي وقىتۋ ادىستەمەلەرى مەن وقۋ قۇرالدارىن, جاڭا باعدارلامالار ۇسىنۋدىڭ, قازاقستانداعى ورتا ءبىلىم بەرۋ جۇيەسىندەگى بارلىق جالپى ءبىلىم بەرەتىن مەكتەپتەردى نازارباەۆ زياتكەرلىك مەكتەپتەرىندەگى ءبىلىم بەرۋ جۇيەلەرىمەن تەڭەستىرۋدىڭ ماڭىزى تۋرالى ايتىلدى. پرەزيدەنت نازارىنان ورتا ءبىلىم بەرۋ وشاقتارىنداعى ورىننىڭ جەتىسپەۋشىلىگى ماسەلەسى دە سىرت قالمادى. ماسەلەن, الداعى 3 جىلدىق مەرزىم ىشىندە, ياعني 2017 جىلعا قاراي قازاقستاننىڭ جەر-جەرىندەگى ەلدى مەكەندەردەگى بارلىق مەكتەپتەردى ەكى اۋىسىممەن وقىتۋعا كوشىرۋ ءۇردىسى جۇرگىزىلەتىن بولادى. دەمەك, الداعى ۋاقىتتا قولعا الىناتىن بۇل يگى ىستەردىڭ بارلىعى – مەملەكەتتىڭ العا جىلجۋى, قارىشتاپ دامۋى تەك ادامي كاپيتالمەن, ونىڭ ساپاسىمەن ولشەنەتىنىنىڭ ءبىر ايعاعى بولىپ وتىر. ال بۇل ماقساتقا قول جەتكىزۋ ءۇشىن ەلىمىزدە كاسىبي ماماندار كوپتەپ شوعىرلانۋى كەرەك.
پرەزيدەنت دامىعان ەلدەردىڭ قاتارىنا دامىعان عىلىم ارقىلى عانا قوسىلۋعا بولاتىنىن, ول ءۇشىن ءبىلىم بەرۋ جۇيەسىن جەتىلدىرۋگە, ادام كاپيتالىن دامىتۋ مەن عىلىمعا نەگىزدەلگەن ەكونوميكانى قالىپتاستىرۋعا ءمان بەرىلەتىنىن جەتكىزدى. ماسەلەن, ادام كاپيتالى ۇعىمىنا كەلسەك, بۇرىن بۇل ۇعىم تەك جەكە ادامنىڭ بويىنان كورىنەتىن ىزگى قاسيەتتەرمەن, رۋحاني قۇندىلىقتارمەن ولشەنىپ كەلسە, قازىرگى تاڭدا ول قانداي دا ءبىر ەلدىڭ جوعارى ەكونوميكالىق كورسەتكىشىنىڭ بەلگىسى رەتىندە قابىلدانىپ ءجۇر. مىنە, سول سەبەپتى, دە بۇگىندە ءبىلىم مەن ەكونوميكا ەگىز ۇعىمعا اينالدى. دەمەك, مەملەكەت باسشىسى ايتقانداي, دامىعان مەملەكەت بولۋ ءۇشىن ءبىلىم مەن عىلىمدى, اقىل مەن پاراساتتى ەكونوميكاعا نەگىزدەۋ – ادام كاپيتالىنىڭ وزەگى. ال ادام كاپيتالى كەز كەلگەن ەلدى ورگە دە جەتەلەيدى, العا دا باستايدى.
كۇليزا مولداشەۆا,
№39 مەكتەپتىڭ مۇعالىمى.
اقتوبە.
