«اقوردا رەزيدەنتسياسىندا 11 مەملەكەتتىڭ توتەنشە جانە وكىلەتتى ەلشىلەرى قازاقستان پرەزيدەنتىنە سەنىم گراموتالارىن تاپسىردى», دەلىنگەن حابارلامادا.
سەنىم گراموتالارىن بىرىككەن اراب امىرلىكتەرىنىڭ ەلشىسى مۋحامماد سايد ءال-اريكي, شۆەيتساريانىڭ ەلشىسى دەۆيد گريحتينگ, يرلانديا ەلشىسى برايان ماكەلدافف, مەكسيكا ەلشىسى حوسە لۋيس مارتينەس ەرناندەس, جاڭا زەلانديا ەلشىسى سيالەي اللەگرا ۆان تۋر, البانيا ەلشىسى كاستريوت روبو, گرەنادا ەلشىسى ولەگ فيرەر, ماۆريتانيا ەلشىسى سيد’احمەد ءال بەكايە حامادي, تۋنيس ەلشىسى تاراك بەن سالەم, نورۆەگيا ەلشىسى دجون ميكال كۆيستاد جانە نيكاراگۋا ەلشىسى البا اسۋسەنا توررەس مەحيا تاپسىردى.
قاسىم-جومارت توقاەۆ ديپلوماتتاردى ەلىمىزدەگى ميسسيالارىنىڭ رەسمي باستالۋىمەن قۇتتىقتادى.
«سىزدەر تاياۋ شىعىس, ەۋروپا, لاتىن امەريكاسى, كاريب باسسەينى, افريكا جانە وكەانيا سياقتى الەمنىڭ ءار بولىگىنىڭ وكىلىسىزدەر. قازاقستان حالىقارالىق ىنتىماقتاستىقتى نىعايتۋدى جاقتايتىن ەل رەتىندە سىزدەردىڭ مەملەكەتتەرىڭىزبەن اراداعى دوستىق بايلانىستاردى ەكىجاقتى فورماتتا دا, كوپجاقتى فورماتتا دا ودان ءارى نىعايتۋعا دايىن», دەدى مەملەكەت باسشىسى.
پرەزيدەنت ديپلوماتتاردىڭ نازارىن ەلىمىزدىڭ تاۋەلسىزدىگىنىڭ تاريحي كەزەڭى - 30 جىلدىعىنا اۋداردى. ول قازىرگى قازاقستان - ىشكى تۇراقتىلىق, سان الۋاندىلىقتا بىرلىكتىڭ ءتيىمدى مودەلى, سەرپىندى ەكونوميكالىق ءوسۋ مەن تەڭدەستىرىلگەن سىرتقى ساياسات ءۇشىن قۇرمەتكە يە جەتىلگەن جانە قالىپتاسقان مەملەكەت ەكەنىن اتاپ ءوتتى.
قاسىم-جومارت توقاەۆ ەلىمىزدىڭ زاماناۋي سىن-قاتەرلەردى, سونىڭ ىشىندە كليماتتىڭ وزگەرۋ سالدارىن ەڭسەرۋدەگى تاسىلدەرىنە توقتالدى. ونىڭ پىكىرىنشە, گلازگودا وتەتىن جاھاندىق كونفەرەنتسيا اياسىندا قابىلداناتىن ۋادەلەردىڭ ورىندالۋى ايرىقشا ماڭىزعا يە. وسىعان بايلانىستى مەملەكەت باسشىسى قازاقستاننىڭ كومىرتەكتى بەيتاراپتىققا قول جەتكىزۋ جونىندەگى جوسپارلارى تۋرالى ەسكە سالدى.
«وسى ايدا ءبىز كومىرتەگىنەن بەيتاراپ دامۋدىڭ 2060 جىلعا دەيىنگى تۇجىرىمداماسىن جۇزەگە اسىرۋعا كىرىسەمىز. جاسىل ەكونوميكانى قارجىلاندىرۋ جانە جاسىل تەحنولوگياعا قولجەتىمدىلىك اتالعان باستامانى ىسكە اسىرۋدا ماڭىزدى ءرول اتقارادى. ءباا, شۆەيتساريا, يرلانديا, جاڭا زەلانديا جانە نورۆەگيا مەملەكەتتەرىمەن قاتار سىزدەردىڭ دە ەلدەرىڭىزبەن ىنتىماقتاستىقتى نىعايتامىز دەگەن ۇمىتتەمىز», دەدى پرەزيدەنت.
قاسىم-جومارت توقاەۆ ازىق-ت ۇلىك جانە سۋ قاۋىپسىزدىگىن قامتاماسىز ەتۋدىڭ ماڭىزدىلىعىنا دا توقتالدى.
«قازاقستان ازىق-ت ۇلىك تاسىمالداۋدىڭ جاھاندىق جۇيەسىنە بەلسەندى اتسالىسادى. ءبىز اۋىل شارۋاشىلىعى سەكتورىن ەكولوگيالاندىرۋعا جانە تۇراقتى دامىتۋعا نيەتتىمىز. ازىق-ت ۇلىك قاۋىپسىزدىگى جونىندەگى يسلام ۇيىمىن قۇرۋعا باستاماشى بولدىق جانە قازىرگى ۋاقىتتا وسى ۇيىمعا توراعالىق ەتىپ وتىرمىز. ونىڭ قۇرامىنا 1,5 ميللياردقا جۋىق حالقى بار 36 ەل كىرەدى», دەدى مەملەكەت باسشىسى.
ءىس-شارا بارىسىندا پرەزيدەنت 2010 جىلعى ەقىۇ ءسامميتىنىڭ استانا دەكلاراتسياسىندا جاريا ەتىلگەن جالپى جانە بولىنبەيتىن ەۋرواتلانتيكالىق جانە ەۋرازيالىق قاۋىپسىزدىك قوعامداستىعىنا بەيىلدىلىگىن راستاپ, البانيانىڭ 2020 جىلى ەقىۇ توراعاسى قىزمەتىندەگى ءتيىمدى كوشباسشىلىعىن قۇپتادى.
پرەزيدەنت قاۋىپسىزدىكتى قامتاماسىز ەتۋ ماسەلەلەرىنە قاتىستى جانجالداردىڭ الدىن الۋ مەن ازياداعى بەيبىتشىلىكتى قولداۋ ەلىمىزدىڭ سىرتقى ساياسي باسىمدىقتارىنىڭ ءبىرى ەكەنىن اتاپ ءوتتى. وسى تۇرعىدا ول اوسشك-ءتىڭ قاۋىپسىزدىك ماسەلەلەرىن شەشۋگە ۇجىمدىق تاسىلدەردى ازىرلەۋ ءۇشىن ومىرشەڭ پلاتفورما رەتىندەگى ءرولىن اتاپ ءوتتى.
قاسىم-جومارت توقاەۆ اۋعانستانداعى جاعداي تۋرالى دا ايتىپ, وسى ەلدىڭ جاڭا بيلىگىن زورلىق-زومبىلىقتىڭ, ەسىرتكى كونترابانداسىنىڭ جانە باقىلاۋسىز كوشى-قوننىڭ كەز كەلگەن كورىنىستەرىنىڭ الدىن الۋ جونىندەگى مىندەتتەمەلەردى ورىنداۋعا شاقىردى.
مەملەكەت باسشىسى ەلشىلەردى قازاقستاننىڭ اۋعانستانداعى تۇراقتاندىرۋ جونىندەگى حالىقارالىق كۇش-جىگەرگە قوسقان ۇلەسى تۋرالى حاباردار ەتتى.
«اۋعان حالقىنا گۋمانيتارلىق كومەك رەتىندە قۇنى 2,5 ميلليون دوللار بولاتىن 5 مىڭ توننا بيداي ۇنىن جەتكىزۋ ماسەلەسىن پىسىقتاپ جاتىرمىز. مۇنداي كومەك اتالعان ەلگە تۇراقتى تۇردە بەرىلىپ وتىرادى», دەدى ول.
سوڭىندا قاسىم-جومارت توقاەۆ ديپلوماتتارعا تابىس تىلەپ, مەملەكەت جانە ۇكىمەت باسشىلارىنا سالەمىن جەتكىزدى.
