كوروناۆيرۋس • 06 قازان، 2021

الەكسەي تسوي رەۆاكتسيناتسيانىڭ ىقتيمال كەزەڭىن اتادى

قازاقستاندا كوروناۆيۋرسقا قارسى رەۆاكتسيناتسيا قاراشا، جەلتوقسان ايلارىندا باستالۋى مۇمكىن. بۇل تۋرالى قر دەنساۋلىق ساقتاۋ ءمينيسترى الەكسەي تسوي ورتالىق كوممۋنيكاتسيلار قىزمەتىندە وتكەن بريفينگتە ايتتى، دەپ حابارلايدى Egemen.kz.

گاۋھار قاپاش

«قازىر الەمدە رەۆاكتسيناتسيا جۇرگىزۋدىڭ جولدارى زەرتتەلىپ جاتىر. قازاقستان دۇنيەجۇزىلىك دەنساۋلىق ساقتاۋ ۇيىمىنىڭ ەۋروپا وڭىرىندەگى جوعارى دەڭگەيلى جۇمىس توبىنا كىردى. وسى توپ ەۋروپا ءوڭىرى بويىنشا رەۆاكتسيناتسيانىڭ ستاندارتتارىمەن، ستراتەگياسىمەن اينالىسىپ جاتىر. رەۆاكتسيناتسياعا ابايلاپ كەلۋ كەرەكتىگى جونىندە الدىن الا ۇسىنىم شىعارىلعان بولاتىن.

ونىڭ وزىندە ءبىرىنشى كەزەكتە حالىقتىڭ وسال بۋىنى مەن الدىڭعى ساپتاعى قىزمەتكەرلەر، ۆيرۋسقا قارسى انتيدەنەسى جوق ازاماتتار ەكپە الۋى كەرەكتىگى ايتىلعان. ياعني قازىر رەۆاكتسيناتسيا نەشە مارتە بولۋ كەرەكتىگى، قاي ۆاكتسينانىڭ ءتۇرىن ەگۋ قاجەتتىگى، دوزانىڭ مولشەرى ءبىزدىڭ يممۋنداۋ جونىندەگى ىشكى كوميسسيادا تالقىلانىپ جاتىر»، دەدى مينيستر.

ۆەدومستۆو باسشىسى جۋىق ارادا ۆەدومستۆوارالىق كوميسسيادا رەۆاكتسيناتسيا باعدارلاماسىنىڭ ولشەمدەرى ۇسىنىلاتىنىن اتادى.

ء«بىز الەمدى ءجىتى باقىلاپ وتىرمىز. ءتۇرلى تاسىلدەر بار. جالپى، ديناميكا بايقالىپ وتىر. 6-دان 10 ايعا دەيىن مەرزىمنەن كەيىن رەۆاكتسيناتسيا باستالىپ جاتىر. ءبىرىنشى كەزەكتە، رەۆاكتسيناتسيا يممۋنداۋ بىلتىر باستالىپ كەتكەن ەلدەردە ءجۇرىپ جاتىر. ياعني، بىلتىر قاراشا، جەلتوقسان ايىندا ۆاكتسيناتسيانى باستاعان ەلدەردە ەكپەنىڭ ەكىنشى دوزاسى بەرىلگەنىنە 9 ايدان اسىپ كەتتى. سوندىقتان، ول ەلدەردە رەۆاكتسيناتسيا وتە وزەكتى بولىپ وتىر. بىزدە بۇل ۋاقىت قاراشا، جەلتوقسان ايلارىنا كەلەدى»، دەگەن الەكسەي تسوي قازاقستاندا رەۆاكتسيناتسيا الەمدە بەلگىلى ءبىر تاجىريبە قالىپتاسقان كەزدە جۇرگىزىلەتىنىن ەسكەرتتى.

«سوندىقتان قازىر ۋاقىت بار. وسى ۋاقىتتا ءبىز الەمدە بار تاجىريبەنى الۋىمىز كەرەك. رەۆاكتسيناتسيانى باستاپ كەتكەن ەلدەردى باقىلاپ وتىرمىز. ونىڭ تيىمدىلىگىن قاراپ وتىرمىز. مەنىڭ ويىمشا جۋىق ارادا رەۆاكتسيناتسيانى قالاي ۇيىمداستىراتىنىمىز، مەرزىمى قانداي بولاتىنى تۋرالى ناقتى باعدارىمىز دايىن بولۋى كەرەك. سوندىقتان رەۆاكتسيناتسيا ماسەلەسى بىزدەن اسىعۋدى تالاپ ەتىپ تۇرعان جوق. ءبارىن ساۋاتتى تارازىلاپ، دەرەكتەر كوزىن تەكسەرىپ، حالىقارالىق تاجىريبەنى زەردەلەپ، ۆەدومستۆوارالىق كوميسسيا ماقۇلداعان بويدا حابارلايمىز»، دەدى دەنساۋلىق ءمينيسترى.