باس ۇيىم باعدارلاماسىنىڭ ۇزدىگى

قازاقستاننىڭ ءىرى ۋنيۆەرسيتەتى – ءال-فارابي اتىنداعى قازۇۋ-گە تۇراقتى دامۋ بويىنشا «United Nation Academic Impact» (بۇۇ اكادەميالىق ىقپال) جاھاندىق حابىن باسقارۋ سەنىپ تاپسىرىلىپ وتىر. بۇل رەسمي شەشىم بۇۇ شتاب-پاتەرىنەن كەلىپ ءتۇستى. ابىرويلى حالىقارالىق قۇرىلىم قازۇۋ-ءدىڭ ءبىلىم مەن عىلىمنىڭ كوشباسشىسى ەكەنىن دالەلدەي ءتۇستى. ەلباسى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى قازاقستان حالقىنا جولداۋىندا «ماڭگىلىك ەل» ۇلتتىق يدەياسىنىڭ باس­تى قۇندىلىقتارىن نىعايتۋ كەرەكتىگىن ايتتى. ونىڭ ىشىندە ۇلتتىق قاۋىپسىزدىك جانە جالپىبەيبىتشىلىك پەن ايماقتىق ماسەلەلەردى شەشۋدە ءبىزدىڭ ەلىمىزدىڭ جاھاندىق قاتىسۋى ماڭىزدى ورىنعا يە. بۇۇ باستاماسىمەن قازۇۋ-دە UNAI حابىن قۇرۋ ەلباسى يدەياسىن ىسكە اسىرۋعا, الماتى قالاسىن كوپجاقتى ديپلوماتيالىق ايماقتىق ورتالىعىنا اينالدىرۋعا, قازاقستاننىڭ الەمدىك ۇدەرىستەگى جاھاندىق ماسەلەلەردى شەشۋ ىسىندە ءرولى مەن بەدەلىنىڭ وسۋىنە ءوز سەپتىگىن تيگىزەدى. بۇۇ تاڭداۋى كەزدەيسوق ەمەس: بۇۇ-نىڭ الەمدىك مويىندالعان ون پرينتسيپتەرىن ادام قۇقىعى, ساۋاتتىلىعى, تۇراقتى دامۋ جانە قاقتىعىستاردى شەشۋگە نەگىزدەلگەن «اكادەميالىق ىقپال» باعدارلاماسىنا قازۇۋ ورتالىق ازيا ۋنيۆەرسيتەتتەرى ىشىندە ءبىرىنشى بولىپ قوسىلدى. اتالعان باعدارلاما اياسىندا ۋنيۆەرسيتەت ءوزىن جەتەكشى عىلىمي-اكادەميالىق ورتالىق رەتىندە بايقاتىپ, عالىمداردى بەلسەندى تۇردە وسىعان باۋلىعان جانە عىلىمي-ءبىلىم بەرۋ ورتاسىن جاھاندىق ماسەلەلەردى شەشۋ قۇرالى رەتىندە پايدالانا ءبىلدى. قازاقستانداعى بۇۇ وكىلدىگىنىڭ جانە الماتىداعى اقش-تىڭ باس ەلشىلىگىنىڭ قولداۋىمەن قازۇۋ «بۇۇ مودەلى – جاڭا جىبەك جولى» الەمدىك ستۋدەنتتىك باعدارلاما-ويىنىنىڭ كوپتەن بەرى ءبىر بولشەگى بولىپ كەلەدى. بۇل بولاشاق مامانداردى بۇۇ قاعيداتتارىنا جانە قاۋىپسىزدىك ماسەلەلەرىن شەشۋگە جاڭا قابىلەتتەردى قالىپتاستىرۋعا تارتۋ بولىپ تابىلادى. ءۇش جىلدان استام تۇراقتى دامۋ بويىنشا «Global Classroom» باعدارلاماسى قارقىندى جۇمىس ىستەپ كەلەدى. 2011 جىلى قازۇۋ بۇۇ قولداۋىمەن «ءححى عاسىرداعى قاقتىعىستاردىڭ قۇبىلمالى تابيعاتى» حالىقارالىق عىلىمي-تەوريالىق كونفەرەنتسياسىن وتكىزدى. 2012 جىلى تمد ەلدەرىنىڭ جوعارى وقۋ ورىندارى اراسىندا بىردەن-ءبىر ءبىلىم ورداسى – قازۇۋ برازيليادا وتكەن «ريو+20» عالامدىق ءسامميتى بۇۇ-نىڭ الەمدىك فورۋمىندا ەلباسىنىڭ «ەنەرگيا-ەكولوگيالىق دامۋدىڭ جاھاندىق دامۋى» جانە «جاسىل كوپىر» يدەيالارىن قولداۋعا نەگىزدەلگەن «جاسىل كوپىر: ۇرپاقتان – ۇرپاققا» اتتى جوباسىنا جەكە سەكتسياسىن اشتى. وتكەن جىلى ۋنيۆەرسيتەت رەكتورى عالىمقايىر مۇتانوۆ يۋنەسكو-نىڭ ءبىلىم بەرۋ سالاسى بويىنشا باس ديرەكتورىنىڭ ورىنباسارى تسيان تانمەن پاريجدەگى كەزدەسۋىندە يۋنەسكو – UNITWIN باعدارلاماسىنا سايكەس قازۇۋ-دە تۇراقتى دامۋ بويىنشا ايماقتىق حابىن قۇرۋ تۋرالى شەشىم قابىلداندى. ءال-فارابي اتىنداعى قازۇۋ-دە UNAI حابىنىڭ اشىلۋى ادامزات قوعامى دامۋىندا جاھاندانۋ ترەندى بولىپ تابىلاتىن ۋنيۆەرسيتەتتىڭ تۇراقتى دامۋ بويىنشا كوشباسشىلىق ءرولىن ايعاقتايدى. وسى جىلدىڭ مامىر ايىنىڭ باسىندا قازۇۋ-دە الەمدىك دەڭگەيدەگى ۇلكەن ءىس-شارا – ءىىى ازيا ۋنيۆەرسيتەتتەرى رەكتورلارىنىڭ فورۋمى وتەدى. ول ازيالىق اۋماقتاعى قاۋىپسىزدىك پەن جارقىن بولاشاق ءۇشىن ينتەگراتسيالىق ۇدەرىستىڭ مىقتى قوزعاۋشى كۇشى بولماق. قورعانبەك امانجول, «ەگەمەن قازاقستان». الماتى.