ماڭعىستاۋ وبلىستىق مادەنيەت باسقارماسىنىڭ باسشىسى پ.سارمۋرزياننىڭ ايتۋىنشا, مۋزەيدەگى ت.شەۆچەنكونىڭ قازاق دالاسىنداعى ءومىرىن بەينەلەيتىن ەكسپوزيتسيانى نەگىزىنەن كيىز ءۇي مەن ونىڭ جابدىقتارى, ۇلتتىق كيىم قۇرايدى ەكەن. ءۇي وتكەن عاسىردىڭ 50-جىلدارى جاسالىپ, 80-جىلدارىنىڭ اياعىندا ماڭعىستاۋ وبلىسىنىڭ جەتىباي اۋىلىنان اكەلىنگەندىگىن سول كۇندەردىڭ ءتىرى كۋاگەرى, مۋزەيدىڭ باس قور ساقتاۋشىسى, مۋزەيدە 1972 جىلدان بەرى قىزمەت ىستەپ كەلە جاتقان اننا يۆانوۆنا ايتقان.
ءبىر زاماندا ءسان-سالتاناتىمەن تولىق تىگىلگەن ءۇي ۋاقىت وتە مۋزەي زالدارىنىڭ قايتا جاساقتالۋىنا بايلانىستى, مۇلدەم جينالىپ قويىلعان. بەرتىندە ەلشى د.كالەتاەۆتىڭ ارالاسۋىمەن جارتىلاي كورمەلەنىپتى. مۋزەي سۋرەتشىسى الەكسەي شەۆچەنكو «قازاق بۇرىشىن» ينتەرنەت جەلىسىنەن كورگەن بەينەلەرى ارقىلى جاڭعىرتا جاساعان. ماڭعىستاۋلىقتار مۋزەي باسشىلىعىنىڭ رۇقساتىمەن كيىز ءۇيدى قايتا تىگۋگە تالاپتانعانمەن, ورىننىڭ تارلىعىنا بايلانىستى شاڭىراعىن كوتەرە الماعان, سوندىقتان ولار قازاق دالاسىنان بارعان بۇيىمدارمەن «قازاق بۇرىشىن» تولىقتىرا العاندارىنا قۋانىشتى.
ت.شەۆچەنكو مەملەكەتتىك مۋزەي-قورىعىنىڭ اۋماعىنا كىرەتىن تاراس تاۋىنىڭ باسىنداعى اقىن زيراتىنا گۇل شوقتارىن قويىپ, تاعزىم ەتكەن ماڭعىستاۋلىقتار اقىننىڭ تۋعان جەرىنە ورالۋىنا ارنالعان IX حالىقارالىق شەۆچەنكو وقۋلارىنا قاتىستى.
– كونفەرەنتسيانى قازاقستان مەن ۋكراينا بىرلەسىپ وتكىزىپ كەلەدى. بۇل ەكى ەلدىڭ مىزعىماس ىنتىماقتاستىعىنان حابار بەرگەندەي. پاندەمياعا بايلانىستى ونلاين فورماتتا وتكەن جيىنعا ەلىمىزدىڭ بىرنەشە عالىمدارى, قوعامدىق بىرلەستىكتەر وكىلدەرى قاتىستى. كونفەرەنتسيانى اقىن, جازۋشى, پەداگوگيكا عىلىمىنىڭ كانديداتى, مۋزەي باسشىسى ۆ.كوۆالەنكو اشىپ, الىستان ات ارىتىپ كەلىپ, مۋزەي ەكسپوزيتسياسىن جاڭعىرتقانىمىز ءۇشىن العىسىن ءبىلدىردى. قارىمتا رەتىندە فورت-شەۆچەنكو قالاسىنداعى ت.شەۆچەنكو مەموريالدىق مۋزەيىنە دەپ ۋكراين ۇلتتىق كيىمىن, تۇرمىستىق زاتتارىن سىيلادى. بۇلاردى مۋزەي قىزمەتكەرلەرى ءوز ۇيلەرىنەن اكەلىپتى. ەلشىلىكتىڭ ءبىرىنشى حاتشىسى ءلايلا كەسىكوۆا مۋزەيدىڭ ءبىر توپ قىزمەتكەرىنە قازاقستان رەسپۋبليكاسى مادەنيەت جانە سپورت ءمينيسترى مەن ۋكرايناداعى قازاقستان ەلشىسىنىڭ العىس حاتتارىن تاپسىردى, – دەدى مادەنيەت باسقارماسىنىڭ باسشىسى.
ءا.كەكىلباي ۇلى اتىنداعى ماڭعىستاۋ وبلىستىق تاريحي-ولكەتانۋ مۋزەيىنىڭ ديرەكتورى س.قۇدايبەرگەن مەن شەۆچەنكو مۋزەي-قورىعىنىڭ باسشىسى ۆ.كوۆالەنكو مادەني ىنتىماقتاستىقتى دامىتۋ ماقساتىنداعى مۋزەيارالىق مەموراندۋمعا قول قويىپ, ەكى ۇجىم اراسىنداعى بايلانىستى نىعايتا تۇسۋگە كەلىستى.
كيەۆتە ماڭعىستاۋلىق دەلەگاتسيانى ەلشى دارحان كالەتاەۆ قابىلداپ, اتقارىلعان ىسكە ريزاشىلىعىن بىلدىرۋمەن قاتار, بولاشاقتا بىرلەسىپ اتقارار جۇمىستار جايىن قوزعادى.
ۋكراينا مۋزەيلەرىنىڭ جۇمىسىمەن تانىسۋعا, تاجىريبە الماسۋعا قىزىققان ماڭعىستاۋلىقتار ۋكراينا ۇلتتىق عىلىم اكادەمياسىنىڭ ۇلتتىق عىلىمي-تابيعاتتانۋ مۋزەيىندە بولدى. بۇل مۋزەي – ءوز ىشىندە ءتورت بىردەي مۇراجايدى بىرىكتىرگەن ەكسپوزيتسيالىق-اۋماقتىق كەشەن. 4 قاباتتان تۇراتىن مۋزەيدە «تابيعات», «زوولوگيا», «ارحەولوگيا», «گەولوگيا» مۋزەيلەرى ورنالاسقان. 1966 جىلى اشىلعان مۋزەي الەمنىڭ تۇكپىرى مەن جىقپىلىنان, سۋى مەن نۋىنان اكەلىنگەن قۇرت-قۇمىرسقا, جاندىكتەردىڭ قاتىرمالارىنا, جانۋارلار مەن حايۋاناتتاردىڭ ت ۇلىپتارىنا, سۇيەكتەرىنە تولى. ءتىپتى ۋكرايندىقتار بىزدە كەز كەلگەن ادامعا رۇقسات ەتىلمەيتىن مۋزەي قورىنا وزدەرى باستاپ بارىپ, ەكى ساعاتتان استام ارالاتىپ, تۇسىنىك بەرگەن. ماڭعىستاۋ مۋزەيىنىڭ قىزمەتكەرلەرى الداعى ۋاقىتتا جيناعان بەينەماتەريالدارىن ارىپتەستەرىنە كورسەتىپ, سەمينار وتكىزۋدى جوسپارلاپ وتىر.
زاماناۋي دەڭگەيدە ەكسپوزيالانعان «كيەۆ قالاسىنىڭ تاريحى» مۋزەيى دە قازاقستاندىق قوناقتاردىڭ قىزىعۋشىلىعىن تۋىنداتىپتى. ماماندار وزدەرىن قىزىقتىرعان سۇراقتارىنا جاۋاپ الىپ, مارقايىپ ورالدى.
ەندى بەكىتىلگەن مەموراندۋمعا سايكەس ەكى ەل, ەكى مۋزەي اراسىنداعى بايلانىس ارناسى كەڭەيىپ, تىڭ جۇمىستارعا جول اشىلادى دەپ كۇتەمىز.
