جارمەڭكە ۇسىنىلعان جۇمىس ورىندارىنىڭ كوپتىگىمەن جانە پسيحولوگتاردىڭ قاتىسۋىمەن ەرەكشەلەندى. جەتكىنشەكتەر جۇمىس ىزدەپ, ەرەسەكتەردەن سۇراۋعا قىسىلعان جاعدايدا پسيحولوگتەر ولارعا قولداۋ كورسەتىپ, كەڭەس بەرىپ جاتتى. بۇعان قوسا جۇمىس ىزدەۋشىلەرگە تۇيىندەمە جازۋدا دا كومەك كورسەتىلدى. قالالىق جۇمىسپەن قامتۋ جانە الەۋمەتتىك قورعاۋ باسقارماسى جاستار رەسۋرستىق ورتالىعىمەن بىرگە ۇيىمداستىرعان جارمەڭكەدە جالپى سانى 9 مىڭعا جۋىق بوس جۇمىس ورىندارى ۇسىنىلدى. AZALA Textile, «سيتي ستروي», «رەگولات», «قازنۇر», «الفا-يۋگ», اsia Trafo مەكەمەلەرى, «ماگنۋم, «فيركان» سەكىلدى ءىرى ساۋدا جەلىلەرى جانە قالاداعى ارناۋلى ەكونوميكالىق ايماقتاعى كاسىپورىندار, مەكتەپتەر, بالاباقشالار – جالپى 50-گە جۋىق جۇمىس بەرۋشى مەكەمەگە مەديتسينا, تەحنيكا جانە پەداگوگيكا سالاسىنىڭ ماماندارى قاجەت. قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا وسىنداي شارالار جۇمىسسىزدىقتى ازايتۋعا سەپتىگىن تيگىزەتىنىن ايتادى. «جارمەڭكەگە 14 پەن 29 ارالىعىنداعى جاستار, كۆوتا شەڭبەرىندە باسقا دا جەرلەستەرىمىز, وقۋ ورىندارىنىڭ تۇلەكتەرى قاتىستى. ۇسىنىلعان 9 مىڭعا جۋىق ورىننىڭ ىشىندە 3 500-ءى – تۇراقتى جۇمىس ورنى. بۇل – جاستارعا ۇلكەن مۇمكىندىك. قازىرگى تاڭدا شىمكەنتتە 3 200 جاس جۇمىسسىز رەتىندە تىركەلگەن», دەيدى باسقارما باسشىسى.
جارمەڭكە ناتيجەسىندە مىڭعا جۋىق جاس جۇمىسقا جولداما الدى. تۇراقتى جۇمىسپەن – 790, ال «جاستار پراكتيكاسىمەن» 121 جاس جۇمىس ىستەمەك. جارمەڭكەدە, سونىمەن قاتار, ەلىمىزدىڭ سولتۇستىك وڭىرىنە قونىس اۋدارۋ بويىنشا اقپاراتتىق-تۇسىندىرمە جۇمىستارى ۇيىمداستىرىلىپ, ناتيجەسىندە 100-دەن اسا شىمكەنتتىك سولتۇستىك وڭىرلەرگە كوشۋگە قىزىعۋشىلىق تانىتتى.
جىل باسىنان بەرى «ەڭبەك» مەملەكەتتىك باعدارلاماسى شەڭبەرىندە 18 مىڭنان استام شىمكەنتتىك جۇمىسپەن قامتۋ شارالارىنا قاتىسقان. ونىڭ ىشىندە 2 384 جاس – «جاستار پراكتيكاسىمەن», ال 109-ى «العاشقى جۇمىس ورنى» جوباسىمەن جۇمىسقا جولدانعان. وسى ارادا ايتا كەتەلىك, شىمكەنتتە جۇمىسقا العاش رەت ورنالاساتىن, ەڭبەك تاجىريبەسى جوق جاستاردى قولداۋ ماقساتىندا «العاشقى جۇمىس ورنى» جوباسى جۇرگىزىلۋدە. بۇگىنگە دەيىن جوباعا قاتىسۋعا 109 جاس نيەت ءبىلدىرىپ, قازىرگى تاڭدا ءوز ماماندىعى بويىنشا ءتۇرلى مەكەمەلەر مەن كاسىپورىندارعا جولدانىپ, ەكى جىلعا تۇراقتى جۇمىسقا ورنالاستى. جوبا «ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ» 2017-2021 جىلدارعا ارنالعان «ەڭبەك» مەملەكەتتىك باعدارلاماسىنىڭ ءىىى باعىتى اياسىندا جۇزەگە اسىرىلىپ وتىر. جۇمىسپەن قامتۋ ورتالىعى جۇمىس بەرۋشىلەرمەن كەلىسىمشارت جاساپ, وقۋ ورنىن ەندى تامامداعان جاستار 24 اي جۇمىسپەن قامتىلادى. جوباعا قاتىسۋشىنىڭ ەڭبەكاقىسى – 20 اەك. حالىقتى جۇمىسپەن قامتۋ ورتالىعى العاشقى 12 ايدىڭ ەڭبەكاقىسىن سۋبسيديالايدى.
