مىسالى, قاراعاندى قالاسىنداعى №78 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى ماعريپا كارىبەكوۆا مەن شاحتينسك قالاسىنداعى «سنەگۋروچكا» بوبەكجايىنىڭ ادىسكەرى الفيا ناسيبۋللينا «ەڭبەك ارداگەرى» مەدالىنە يەلىك ەتتى.
ال اقتاس كەنتىندەگى №16 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى, وسى سالادا 30 جىلدان استام ۋاقىت جۇمىس ىستەيتىن زيرا ساتوۆاعا ۇكىمەت باسشىسى اسقار ءماميننىڭ العىس حاتى تابىس ەتىلدى.
ۇلاعاتتى ۇستاز الدىمەن حيميا جانە بيولوگيا پاندەرىنەن ساباق بەرىپتى, كەيىن «قازاق ءتىلى مەن ادەبيەتى ءپانىنىڭ مۇعالىمى» ماماندىعى بويىنشا ەكىنشى جوعارى ءبىلىم العان ەكەن.
– مەن ءالى كۇنگە دەيىن وسى ءپاندى وقىتامىن. قازىر كاسىبي تۇرعىدا ءوسۋ ءۇشىن كوپتەگەن مۇمكىندىك بار. تەك قانا العا باسىپ, وقىتۋدا جاڭا شىعارماشىلىق يدەيالار مەن تەحنولوگيالاردى ەنگىزۋ قاجەت. ەڭبەگىمنىڭ جوعارى باعالانعانىنا وتە قۋانىشتىمىن, – دەيدى ز.ساتوۆا.
بۇدان بولەك, سەگىز مۇعالىم «قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى», ءۇش ۇستاز ء«بىلىم جانە عىلىم قىزمەتكەرلەرىنىڭ كاسىپوداعىنا سىڭىرگەن ەڭبەگى ءۇشىن» جانە سەگىز پەداگوگ «ى.التىنسارين» توسبەلگىلەرىمەن ماراپاتتالدى.
ايتا كەتەتىن ءبىر جايت, مۇعالىمدەر مەرەكەسىندە ەلىمىزگە بەلگىلى مەتسەنات بەكزات التىنبەكوۆ تاعى ءبىر يگى ءىستىڭ امالىن جاسادى. كاسىپكەر تاعايىنداعان ارقايسىسى 500 مىڭ تەڭگە مولشەرىندەگى سىيلىققا ولگا تاراسەنكو, قۇرالاي مۇقانوۆا, رايسا ەلەۋسىزوۆا, مەنزيف مۋرتازينا جانە سەرىك بالپانوۆ يە بولدى. ءبىلىم بەرۋ سالاسىندا كوپ جىلدان بەرى جەمىستى ەڭبەك ەتىپ كەلە جاتقان بۇل ماماندارعا سىيلىقتى مەتسەناتتىڭ ۇلى ەرنياز بەكزات ۇلى تاپسىردى.
