ماسەلەن, وبلىستا وسى كەزەڭدە پاراقورلىق فاكتىلەرى بويىنشا 170 سىبايلاس جەمقورلىق قىلمىس, 174 – بيۋدجەت قاراجاتىن جىمقىرۋ, 21 – لاۋازىمدىق وكىلەتتىكتەرىن تەرىس پايدالانۋ فاكتىلەرى تىركەلگەن. 222 ادام قىلمىستىق جاۋاپكەرشىلىككە تارتىلعان. ولاردىڭ 5-ءۋى رەسپۋبليكالىق, 25-ءى وبلىستىق, 17-ءسى قالالىق جانە اۋداندىق دەڭگەيدەگى باسشىلار.
وتىرىس بارىسىندا پارتيا مۇشەلەرى وبلىستاعى سىبايلاس جەمقورلىق دەڭگەيى بويىنشا «كوش باستاپ تۇرعان» ءبىلىم سالاسىنا باسا نازار اۋداردى. 3 جىلعا تولمايتىن كەزەڭدە 45 قىلمىس تىركەلگەن.
سونداي-اق نۇروتاندىقتار سەمەي اكىمدىگى جانىندا سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ جوقتىعىنا نازار اۋداردى. بۇل رەتتە, قالادا 2019 جىلدان بەرى 58 سىبايلاس جەمقورلىق قىلمىس تىركەلگەن. وسىنداي كوميسسيا شەمونايحا اۋدانى اكىمدىگىنىڭ جانىنان دا قۇرىلماعان.
ء«اربىر جەرگىلىكتى اتقارۋشى ورگاننىڭ جانىندا مۇنداي كوميسسيا بولۋعا ءتيىس. سەمەيدە جانە شەمونايحا اۋدانىندا قۇقىق بۇزۋشىلىقتاردىڭ الدىن الۋ بويىنشا كوميسسيالار بار, بىراق ول مۇلدەم باسقا, ولار تۇرمىستىق زورلىق-زومبىلىقتان باستاپ, قاۋىپسىز كولىك جۇرگىزۋگە دەيىنگى جالپى ماسەلەلەردى قارايدى. سىبايلاس جەمقورلىق قاتەرلەرىن تالداۋمەن ەشكىم اينالىسپايدى, شىنتۋايتىندا اينالىساتىن ادام دا جوق», دەپ مالىمدەدى كەڭەس توراعاسى, ءماجىلىس دەپۋتاتى ەرلان سايروۆ.
شىعىس قازاقستان وبلىسىندا سىبايلاس جەمقورلىققا قارسى ءىس-قيمىل جانە ونىڭ الدىن الۋ بويىنشا ۇلكەن ماسەلەلەر بار ەكەنىن كەڭەس توراعاسىنىڭ ءبىرىنشى ورىنباسارى قايىربەك سۇلەيمەنوۆ تە اتاپ ءوتتى. ونىڭ ايتۋىنشا, باسقا وڭىرلەردەگى جاعدايمەن سالىستىرعاندا, تاپ وسى شىعىس قازاقستان وبلىسى بويىنشا بارىنشا سىنعا تولى بايانداما جاسالدى, الايدا سوعان قاراماستان وبلىستىڭ جاۋاپتى ورىندارىنىڭ ءبىرىنشى باسشىلارى وتىرىسقا قاتىسپاعان.
«جالپى, ءتۇرلى زاڭ بۇزۋشىلىقتار تەك شىعىس قازاقستان وبلىسى ءۇشىن عانا ەمەس, بارلىق وبلىستارعا دا ءتان, ياعني فورماليزم, اناليتيكانىڭ بولماۋى, سىرعىتپا جاۋاپ بەرۋ جانە ت.ب. سىبايلاس جەمقورلىققا قارسى ءىس-قيمىل جاساۋ بويىنشا ۇيىمداستىرۋشىلىق جۇمىستار جوق. سەمەيدە جانە شەمونايحا اۋدانىندا سىبايلاس جەمقورلىققا قارسى ءىس-قيمىل كوميسسياسىنىڭ قۇرىلماعانى دا وسىنىڭ قاتارىندا. ەگەر كوميسسيا بولماسا, وندا ناتيجە دە جوق», دەدى قايىربەك سۇلەيمەنوۆ.
سونداي-اق كەڭەس مۇشەلەرى وبلىستا پارتيانىڭ سايلاۋالدى باعدارلاماسىن ىسكە اسىرۋ اياسىندا 18 تارماق بويىنشا جۇمىستاردىڭ ورىندالماۋ قاۋپى بار ەكەنىن اتاپ ءوتتى. جىل باسىنان بەرى وبلىس بويىنشا Nur Otan فراكتسياسىنىڭ 80%-ى قالالىق جانە اۋداندىق ءماسليحاتتاردا سايلاۋالدى ۋادەلەردىڭ ورىندالۋ ماسەلەلەرىن تەك ءبىر-اق رەت قاراعان. كاتونقاراعاي اۋداندىق ءماسليحاتىندا پارتيالىق فراكتسيا سايلاۋالدى باعدارلامالاردىڭ ورىندالماۋ جاعدايىن مۇلدەم قاراستىرماعان.
كەڭەس مۇشەسى, «اق جول» پارتياسىنىڭ وكىلى مەرۋەرت قازبەكوۆا شىعىس قازاقستان وبلىسىنا ساپارى بارىسىندا جەرگىلىكتى شەنەۋنىكتەر جۇمىس توبىن ەلەمەدى دەپ ەسەپتەيتىنىن جەتكىزدى.
وتىرىس قورىتىندىسى بويىنشا شىعىس قازاقستان وبلىسى اكىمىنىڭ ءبىرىنشى ورىنباسارى الماسحان سماتلاەۆتى سوگىس تۇرىندە, سەمەي قالاسىنىڭ اكىمى باقىتجان باياحمەتوۆتى ەسكەرتۋ تۇرىندە, شەمونايحا اۋدانىنىڭ اكىمى گريگوري اكۋلوۆ پەن وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆانى سوگىس تۇرىندە پارتيالىق جاۋاپكەرشىلىككە تارتۋ تۋرالى شەشىم قابىلداندى.
سونىمەن قاتار شىعىس قازاقستان وبلىسىنىڭ جەرگىلىكتى اتقارۋشى ورگاندارىنا سىبايلاس جەمقورلىققا قارسى جۇمىستى كۇشەيتۋ, Nur Otan پارتياسىنىڭ سايلاۋالدى باعدارلاماسىن ىسكە اسىرۋ جونىندەگى قىزمەتتى جانداندىرۋ جانە وبلىستىڭ بارلىق قالالارى مەن اۋداندارىندا سىبايلاس جەمقورلىققا قارسى ءىس-قيمىل كوميسسيالارىنىڭ ءتيىستى جۇمىسىن قامتاماسىز ەتۋ ۇسىنىلدى.
