ۇكىمەت وتىرىسىندا ەنەرگەتيكا ءمينيسترى ماعزۇم مىرزاعاليەۆ وسىنداي جوسپاردى ورتاعا سالدى.
«وڭىردە مۇناي ءوندىرۋدىڭ تومەندەۋىنە جول بەرمەۋ ءۇشىن رەنتابەلدى ەمەس, سۋلانعان, دەبيتى از كەن ورىندارى بويىنشا سالىقتىق پرەفەرەنتسيالار بەرۋ جونىندە ۇسىنىستار پىسىقتالادى. بۇل جۇمىستى مينيسترلىك «قازمۇنايگازبەن», مۇددەلى مەملەكەتتىك ورگاندارمەن بىرلەسىپ ىسكە اسىرادى. مينيسترلىك ماڭعىستاۋ وبلىسىنىڭ مۇناي ءوندىرۋ ءپروفيلىن دايىندادى. مۇناي ءوندىرۋ كەلەسى 5 جىل ىشىندە تۇراقتى بولادى. الايدا 2025 جىلدان باستاپ ءوندىرۋدىڭ شامالى تومەندەۋى بايقالۋى مۇمكىن», دەدى ۆەدومستۆو باسشىسى.
دەگەنمەن, ءمينيستردىڭ ايتۋىنشا, مۇناي مەن گاز ءوندىرۋدى ارتتىرۋ سالاسىندا ماڭعىستاۋ وبلىسىنىڭ الەۋەتى ءالى دە تولىق پايدالانىلماعان.
«جاڭا تەڭىز جوبالارىن ىسكە قوسۋ, اتاپ ايتقاندا حازار جانە قالامقاس-تەڭىز كەن ورىندارىن يگەرۋدىڭ ارقاسىندا 2028 جىلدان باستاپ مۇناي ءوندىرۋدى 19,5 ملن تونناعا دەيىن ارتتىرۋ جوسپارلانۋدا.
وسىلايشا, قازىرگى ۋاقىتتا «قازمۇنايگاز» بەن «لۋكويل» وسى كەن ورىندارىن يگەرۋ تۇجىرىمداماسىن تالقىلاپ جاتىر. وسى ماسەلەنىڭ ماڭىزىن ەسكەرە وتىرىپ, «قازمۇنايگاز» اعىمداعى جىلدىڭ سوڭىنا دەيىن تۇجىرىمداما نۇسقاسىن تۇپكىلىكتى ايقىنداۋى قاجەت. 2028 جىلدان باستاپ جىل سايىن جوسپارلانعان مۇناي ءوندىرۋ شامامەن 4 ملن توننا بولادى», دەگەن ماعزۇم مىرزاعاليەۆ جوباعا ينۆەستيتسيا كولەمى شامامەن 4,5 ملرد دوللار بولاتىنىن اتادى.
