مينيستر ماڭعىستاۋ وبلىسىندا 720 مىڭ تۇرعىن بارىن, ونىڭ ىشىندە 399 مىڭ ادام ەڭبەككە قابىلەتتى جاستا ەكەنىن اتاپ ءوتتى. جۇمىس كۇشىنىڭ سانى 324 مىڭنان استام ادامدى قۇرايدى. 308 مىڭنان استام ادام جۇمىسقا ورنالاستىرىلعان. جۇمىسسىزدىق ۇلەسى 4,9%-دى قۇرايدى.
«ماڭعىستاۋ وبلىسىنىڭ الەۋمەتتىك-ەكونوميكالىق دامۋىنىڭ 2021-2025 جىلدارعا ارنالعان كەشەندى جوسپارى اياسىندا 167 جوبانى جۇزەگە اسىرۋ جوسپارلانعان. ونىڭ ىشىندە الەۋمەتتىك ينفراقۇرىلىمنىڭ - 55 وبەكتىسى, تۇرعىن ءۇي جانە كوممۋنالدىق شارۋاشىلىقتىڭ - 39 وبەكتىسى, 27 ونەركاسىپتىك وبەكت, تۋريزم سالاسىنىڭ 31 وبەكتىسى بار. 2025 جىلعا دەيىن وڭىردە 60 مىڭنان استام جاڭا جۇمىس ورنىن, ونىڭ ىشىندە 25 مىڭعا جۋىق تۇراقتى جۇمىس ورنىن قۇرۋ جوسپارلانعان», دەدى سەرىك شاپكەنوۆ.
مينيستر مەملەكەت باسشىسىنىڭ وڭىرگە جۇمىس ساپارى بارىسىندا كەشەندى جوسپار اياسىندا 18 جاڭا مەكتەپ جانە اقتاۋ قالاسىندا 4200 ورىندىق جاڭا ۇلگىدەگى 6 زاماناۋي مەكتەپ سالۋدى تاپسىرعانىن ەسكە سالدى.
«بيىل جۇمىسپەن قامتۋدىڭ جول كارتاسى اياسىندا 2 مىڭ وقۋشىعا ارنالعان 3 مەكتەپتىڭ قۇرىلىسى جۇرگىزىلۋدە. سونداي-اق اقتاۋ قالاسىندا كوس-1-دەن كوس-2-گە دەيىنگى كارىز كوللەكتورىنىڭ جانە «جىلى پلياجعا» سۋ قۇبىرىنىڭ قۇرىلىسى بويىنشا جوبالار باستالدى. بۇل جوبالار وڭىردە جۇمىس ورىندارىن اشۋعا, سونداي-اق تۋريزم سالاسىندا قوسىمشا 10 مىڭعا جۋىق جاڭا جۇمىس ورنىن قۇرۋعا مۇمكىندىك بەرەدى», دەدى ەڭبەكمينى باسشىسى.
بۇدان باسقا, «Nur Otan» پارتياسىنىڭ سايلاۋالدى باعدارلاماسىن ورىنداۋ جونىندەگى جول كارتاسىن ىسكە اسىرۋ شەڭبەرىندە 2025 جىلعا دەيىن وڭىردە 150 مىڭ تۇرعىن جۇمىسپەن قامتىلادى. وقىتۋعا 7 مىڭعا جۋىق ادام قاتىسادى. ونىڭ ىشىندە 3,5 مىڭعا جۋىق ادام ەلەكتروندىق ەڭبەك بيرجاسى ارقىلى جاڭا ماماندىقتى يگەرۋگە جانە ونلاين-كۋرستاردا بىلىكتىلىگىن ارتتىرۋعا مۇمكىندىك الادى. تاعى 3,5 مىڭ ادام «باستاۋ بيزنەس» جوباسى بويىنشا كاسىپكەرلىك نەگىزدەرىن مەڭگەرەدى.
«كەشەندى جوسپار اياسىندا قابىلدانىپ جاتقان شارالار 2025 جىلعا قاراي وڭىردەگى جۇمىسسىزدىقتى 4,8%-دان اسپايتىن دەڭگەيدە ۇستاپ تۇرۋعا مۇمكىندىك بەرەدى», دەپ اتاپ ءوتتى مينيستر.
سەرىك شاپكەنوۆ ەڭبەك جانجالدارىن شەشۋ جانە بولدىرماۋ بويىنشا جۇرگىزىلىپ جاتقان جۇمىستار تۋرالى حاباردار ەتتى. ونىڭ ايتۋىنشا, ماڭعىستاۋ وبلىسىندا 11 مىڭ كاسىپورىن جۇمىس ىستەيدى. وڭىردە ورتاشا جالاقى 353 مىڭ تەڭگەنى قۇرايدى.
اۋتستاففينگ بويىنشا قىزمەت كورسەتەتىن كاسىپورىندارعا جەكە مونيتورينگ جۇرگىزىلەدى. بۇگىنگى تاڭدا وسىنداي 44 كاسىپورىننىڭ 25 مىڭ جۇمىسكەرى بار.
«جىل باسىنان بەرى وبلىس بويىنشا 22 ەڭبەك جانجالى تىركەلدى, بۇل تىركەلگەن جانجالداردىڭ جالپى سانىنىڭ 80%-ىن قۇرايدى. قىزمەتكەرلەر قوياتىن نەگىزگى تالاپ – مۇناي سەرۆيستىك كاسىپورىنداردا جالاقى دەڭگەيىن ارتتىرۋ جانە ەڭبەك جاعدايلارىن جاقسارتۋ. بۇگىندە بارلىق ەڭبەك داۋى وڭ شەشىمىن تاپتى», دەدى سەرىك شاپكەنوۆ.
مينيستر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەشەندى جوسپارى اياسىندا «سامۇرىق-قازىنا» اق-مەن بىرلەسىپ, مەردىگەرگە بەرىلەتىن تاپسىرىستىڭ كولەمىن 25%-دان اسپايتىن مولشەردە شەكتەۋ, تەندەرگە قاتىساتىن كومپانيالارعا قويىلاتىن بىلىكتىلىك تالاپتارىن قاتاڭداتۋ, ساتىپ الۋ قاعيدالارىنا وزگەرىستەر ەنگىزە وتىرىپ, كونكۋرس وتكىزۋ كەزىندە جوعارى جالاقى تولەيتىن فيرمالارعا قوسىمشا جەڭىلدىكتەر بەرۋ سياقتى شارالار كوزدەلەتىنىن ايتتى.
كاسىپورىنداردا, ونىڭ ىشىندە اۋتستاففينگكە جۇمىسكەرلەر ۇسىناتىن كاسىپورىنداردا ەڭبەك زاڭناماسىنىڭ ساقتالۋىن, جالاقى مەن ەڭبەك جاعدايلارىنداعى ايىرماشىلىقتارعا جول بەرمەۋدى باقىلاۋ قامتاماسىز ەتىلەتىن بولادى.
«قابىلدانىپ جاتقان شارالار 2025 جىلدىڭ سوڭىنا دەيىن: ەڭبەك جانجالدارىنىڭ سانىن ازايتۋدى, انىقتالعان بۇزۋشىلىقتاردىڭ ۇلەس سالماعىن 20%-عا دەيىن تومەندەتۋدى, وندىرىستىك جاراقاتتانۋ دەڭگەيىن 10%-عا دەيىن تومەندەتۋدى قامتاماسىز ەتۋگە مۇمكىندىك بەرەدى», دەپ تۇيىندەدى مينيستر.
