08 اقپان، 2014

جاڭعىرمالى ەنەرگياعا – جاڭاشا تاريف

153 رەت كورسەتىلدى
001-203كەشە پرەمەر-مينيستر سەرىك احمەتوۆ ەلىمىزدە جاڭعىرمالى ەنەرگيا كوزدەرىن قولداۋ جۇيەسىن دامىتۋ ماسەلەلەرى بويىنشا كەڭەس وتكىزدى، دەپ حابارلادى پرەمەر-ءمينيستردىڭ ءباسپاسوز قىزمەتى. كەڭەس جۇمىسىنا بىرقاتار مۇددەلى ورتالىق اتقارۋشى ورگاندار مەن ۇلتتىق كومپانيالاردىڭ باسشىلارى قاتىستى. قورشاعان ورتا جانە سۋ رەسۋرس­تارى ءمينيسترى نۇرلان قاپپاروۆ جاڭعىرمالى ەنەرگيا كوزدەرىن قولداۋ جانە قازاقستاندا اتالعان رىنوكتى قالىپتاستىرۋدىڭ جۇيەلى شارالارىن ۇسىندى. مەملەكەت باسشىسىنىڭ تاپسىرماسى بويىنشا مينيسترلىك ەۋروپالىق وداق مەملەكەتتەرىنىڭ تاجىريبەسى زەردەلەنىپ، ونىڭ ىشىندە بىرقاتار ەلدەردە جاڭعىرمالى ەنەرگيا كوزدەرى سەكتورىن دامىتۋ بارىسىندا جىبەرىلگەن كەمشىلىكتەرى تالدانعان بولاتىن. وتىرىسقا قاتىسۋشىلار ۇسىنىلعان زەرتتەۋ ناتيجەلەرى مەن ەۋروپالىق ساراپ­شىلاردىڭ ۇسىنىستارىن تال­قى­لادى. ياعني، جەل، كۇن، بيوگاز جانە گيدروستانسالاردا وندىرىلەتىن ەنەر­گيا­عا بەلگىلەنەتىن تاريفتەر بويىنشا ۇسىنىستار قارالدى. بۇل تا­ريفتەر بەنچماركينگ نەگىزىندە، ياعني جاڭارتىلاتىن ەنەرگيا كوز­دە­رى سەك­تورىن دامىتىپ جاتقان ەل­دەردىڭ تاجىريبەسىن باعالاۋ جانە سول ەلدەردەگى «تازا» ەلەكتر ەنەرگيا­سى باعالارىمەن سالىستىرۋ ءنا­تي­جە­لەرىنە سۇيەنىپ بەلگىلەنىپ وتىر. ن.قاپپاروۆتىڭ ايتۋىنشا، 2014 جىلى بەلگىلەنىپ، 15 جىل وزگەرمەي قولدانىلاتىن تاريفتەر جەل ەلەكتر ستانسالارىنا 1 كۆت/ساع ءۇشىن 19 تەڭگە (نەمەسە 9،5 ەۋروتسەنت شاماسىندا)، كۇن ەلەكتر ستانسالارى ءۇشىن – 29 تەڭگە (شامامەن 14،5 ەۋروتسەنت)، شاعىن گيدروستانسالار ءۇشىن – 14 تەڭگە (شامامەن 7 ەۋروتسەنت) جانە بيوگاز قۇرىلعىلارى ءۇشىن 27 تەڭگە (13،5 ەۋروتسەنت) دەڭگەيىندە بەلگىلەنبەك. بۇدان باسقا، 2020 جىلعا دەيىن جاڭعىرمالى ەنەرگيا كوزدەرى جوبالارىن ىسكە اسىرۋعا ليميت بەلگىلەۋ ۇسىنىستارى قارالدى. بۇل شەكتەۋلەر جاڭعىرمالى ەنەرگيا كوزدەرى جوبالارىن ىسكە اسىرۋدى ءتۇر جاعىنان دا، تۇتىنۋ اۋماقتارى جاعىنان دا رەتتەپ، وسى ماقساتتارعا جەر ءبولۋ جانە جەلىگە قوسۋ ماسەلەلەرىن شەشۋگە مۇمكىندىك بەرەدى. تۇتاستاي العاندا، ۇسىنىلعان ليميت جالپى بەلگىلەنگەن قۋاتتىلىقتىڭ 1850 مۆت-ىن قۇراپ، ونىڭ 1300 مۆت – جەل ەلەكتر ستانسالارىنا، 500 مۆت – كۇن ەلەكتر ستانسالارىنا، 50 مۆت – بيوگاز قۇرىلعىلارىنا بولىنەتىن بولادى. ال ايماقتار بويىنشا ليميتتەر بىلايشا بولىنەدى: جەل ەلەكتر ستانسالارى بويىنشا – 1050 مۆت ورتالىق ايماققا، 250 مۆت باتىس ايماققا، كۇن ەلەكتر ستانسالارى بويىنشا – 400 مۆت ورتالىق ايماققا جانە 100 مۆت باتىس ايماققا، بيوگاز قۇرىلعىلارى بويىنشا – 40 مۆت ورتالىق ايماققا جانە 10 مۆت باتىس ايماققا بولىنەدى، دەپ ناقتىلادى قورشاعان ورتا جانە سۋ رەسۋرستارى ءمينيسترى. كەڭەستە، سونداي-اق، تاريفتەردى جىل سايىن ينفلياتسيا دەڭگەيىنە سايكەس يندەكستەۋ ماسەلەلەرى جانە ەلەكتر ەنەرگياسىن ساتىپ الۋ جۇيەسىنىڭ بىرىڭعاي ساتىپ الۋشى – جاڭارتىلاتىن ەنەرگيا كوزدەرىن قولداۋ جونىندەگى ەسەپتەۋ-قارجىلىق ورتالىعىنان جۇرگىزىلۋ شارالارى تالقىلاندى. تۇتاستاي العاندا، ۇكىمەت باسشىسى جاڭعىرمالى ەنەرگيا كوزدەرىن قولداۋ جۇيەسىنىڭ، تاريفتەر كولەمدەرىنىڭ، ليميتتەۋ جولدارىنىڭ جانە ىسكە اسىرىلۋ پرينتسيپتەرى جوبالارىن ماقۇلدادى. جۇيە ايتارلىقتاي كوپ ينۆەستيتسيالار تارتۋ مەن سوڭعى تۇتىنۋشىلار ءۇشىن تاۋەكەلدەردى ازايتۋعا باعىتتالعان. ماسەلەنى تالقىلاۋ سوڭىندا س.احمەتوۆ جەك رىنوگى جۇمى­سىن باستاۋ ءۇشىن ۇكىمەت قاۋلى­سىنىڭ جوباسىن ەنگىزۋدى، سونداي-اق، جاڭعىرمالى ەنەرگيا كوزدەرىن قولداۋ بويىنشا ەسەپتەۋ-قارجى­لىق ورتالىعىنىڭ قىزمەتىن قام­تا­ماسىز ەتۋ، جاڭعىرمالى ەنەرگيا كوزدەرى تۇرلەرى بويىنشا بەل­گىلەنگەن ليميتتەردى ەسەپكە الىپ، جوبالاردى ىسكە اسىرۋ جوسپارلارىنا تۇزەتۋلەر ەنگىزۋ بويىنشا بىرقاتار تاپسىرمالار بەردى.
سوڭعى جاڭالىقتار

پاگانيني

ونەر • كەشە

وتىز جىلدىققا وي قورىتقان

قازاقستان • كەشە

ۇقساس جاڭالىقتار