ساحناداعى وقيعا تراكتورشىنىڭ ۇيىندەگى ۇرىس-كەرىستەن ءوربيدى. ءۇي ىشىندە شىققان جانجالدان كەيىن قوشقاربايدىڭ جۇبايى كۋمري بالا-شاعاسىن ەرتىپ, توركىنىنە كەتىپ قالادى. وسى ساتتە مەحانيزاتوردىڭ ۇيىنە جاس عالىم كەلىپ, ءوزى ويلاپ تاپقان روبوت ايەلدى كورسەتەدى. روبوتتىڭ قولىنان كەلمەيتىنى جوق, ۇيدەگى شارۋانىڭ ءبارىن ءۇنسىز ءجۇرىپ-اق ءاپ-ساتتە تىندىرىپ تاستايدى. ءۇي ءىشى بىلاي تۇرسىن, ءتىپتى ەر ادامنىڭ عانا قولىنان كەلەتىن سىرتتاعى اۋىر جۇمىستى دا مىڭق ەتپەي تىندىرا سالادى. «تەمىر قاتىننىڭ» قابىلەتىنە ءتانتى بولعان تراكتورشى وعان ويلانباستان ۇيلەنىپ الادى. مولدا شاقىرىپ, نەكەسىن قيدىرادى. بىراق روبوتتىڭ اتى روبوت, قوشقارباي تاپسىرمانى تاپ-تۇيناقتاي ەتىپ ورىندايتىن «تەمىر قاتىننان» جان جىلۋىن تابا الماي, ەڭكىلدەپ جىلايدى.
وسىلايشا, ەت پەن سۇيەكتەن جاراتىلعان قوشقارباي مەن روبوتتىڭ اراسىنداعى قارىم-قاتىناس كۇن وتكەن سايىن شيەلەنىسە تۇسەدى. ويلاۋ قابىلەتىنە يە بولعان سوڭ «تەمىر قاتىن» ءتىپتى ءورشي ءتۇسىپ, تراكتورشىنىڭ قوڭىرقاي تىرلىگىن سىناپ-مىنەي باستايدى. شەتەلگە بارىپ دەمالىپ, قىمبات دۇنيە ساتىپ الىپ جاتقان جۇرتپەن سالىستىرىپ, قۇلاق ەتىن جەپ, كۇن-كورسەتپەي قويادى.
كومەديانىڭ ەكىنشى بولىمىندە روبوت ىستەن شىعىپ, جارامسىز بولىپ قالادى. بۇعان جاس عالىم «عىلىمي پروگرەستىڭ ناعىز جاۋىسىڭ» دەپ مەحانيزاتوردى كىنالايدى. اقىرى قوشقارباي ءوز ايەلىمەن قايتا تابىسادى. ساحنالىق تۋىندىنىڭ قويۋشى رەجيسسەرى باتىربەك شامبەتوۆ قويىلىم شەشىمى ارقىلى كوپشىلىك كورەرمەنگە بۇگىنگى قوعامدا زاماناۋي تەحنولوگيا مەن عىلىم جەتىستىكتەرى كەرەك-اق, بىراق ادامي بولمىسىمىزدى, ءوزارا سىيلاستىعىمىزدى جوعالتىپ المايىق دەگەن تۇجىرىم ۇسىنادى.
پرەمەرا اياقتالعان سوڭ كورەرمەندەر ارتىستەرگە دەگەن ىستىق ىقىلاسىن ءبىلدىرىپ, ۇزاق قول شاپالاقتاپ تۇرىپ الدى. وسى ساتتە وبلىستىق مادەنيەت باسقارماسىنىڭ باسشىسى ەرلان قالماقوۆ ساحناعا كوتەرىلىپ, تەاتر ۇجىمىنا العىس ءبىلدىرىپ, جاڭا ماۋسىمنىڭ اشىلۋىمەن قۇتتىقتادى.
جۋىردا عانا كوكشەتاۋ قالاسىندا ءدال وسى پرەمەرا ءۇشىن «ۇزدىك قويىلىم» جۇلدەسىنە يە بولعان تەاتر ۇجىمى ەندى قاراعاندى قالاسىندا وتەتىن رەسپۋبليكالىق تەاتر فەستيۆالىنە دايىندالىپ جاتىر.
