«قۇرمەتتى راديو قىزمەتكەرلەرى! سىزدەردى بۇگىنگى كاسىبي مەرەكەلەرىڭىزبەن شىن جۇرەكتەن قۇتتىقتايمىن! مەملەكەت باسشىسىنىڭ باستاماسىمەن بەلگىلەنگەن بۇل كۇن بيىل ەلىمىزدە العاش رەت اتالىپ وتۋدە. ونىڭ وزىندىك ءمانى بار. سەبەبى, بيىل وتاندىق راديولاردىڭ قاراشاڭىراعى قازاق راديوسىنىڭ حابار تاراتا باستاعانىنا تۋرا 100 جىل تولىپ وتىر. وسى جىلداردىڭ ىشىندە قازاق راديوسى حالقىمىزدىڭ كۇندەلىكتى تىنىس-تىرشىلىگىنەن باستاپ تاريحىمىز بەن ءداستۇرىمىزدى, ادەبيەتىمىز بەن مادەنيەتىمىزدى, ونەرىمىز بەن ۇلتتىق قۇندىلىقتارىمىزدى دارىپتەۋگە ۇلكەن ۇلەس قوستى», دەدى سەنات توراعاسى.
سونداي-اق جوعارى پالاتا باسشىسى ءار جىلدارى وسى ۇجىمدا امىرە قاشاۋباەۆ, احمەت جۇبانوۆ, شاكەن ايمانوۆ, ءشامشى قالداياقوۆ سياقتى ءبىرتۋار تۇلعالار ەڭبەك ەتكەنىن, قازاق ديكتورلىق مەكتەبىنىڭ شىڭىندا تۇرعان ءانۋار بايجانباەۆ, مينا سەيىتوۆا, ساۋىق جاقانوۆا سياقتى مايتالمان ماماندار ۇلت ماقتانىشىنا اينالعانىن اتاپ ءوتتى.
«قازىرگى تاڭدا قازاق راديوسىنىڭ «التىن قورىندا» ساقتالعان اندەر مەن كۇيلەر, سۇحباتتار مەن اڭگىمەلەر, جاڭالىقتار مەن شولۋلار ۇلتىمىزدىڭ ءبىر عاسىرلىق شەجىرەسى دەسە, ارتىق ەمەس. باۋىرجان مومىش ۇلى, مۇقاعالي ماقاتاەۆ سىندى ۇلى تۇلعالارىمىزدىڭ داۋسى ساقتالعان سيرەك جازبالاردىڭ بۇگىنگە جەتۋى سونىڭ جارقىن كورىنىسى. تاۋەلسىزدىك وتاندىق راديو سالاسىنىڭ دامۋىنا تىڭ سەرپىن بەردى. بۇرىن ءبىر عانا قازاق راديوسى بولسا, ەگەمەندىك كەزەڭىندە ونداعان جاڭا راديولار اشىلا باستادى. ولاردىڭ تاقىرىپتىق اياسى دا ايتارلىقتاي كەڭەيە ءتۇستى», دەدى ول.
ودان بولەك, ماۋلەن اشىمباەۆ الداعى ۋاقىتتا ەلىمىزدە بۇل سالا بۇدان دا ەرەكشە ەكپىنمەن داميتىنىنا سەنىم ءبىلدىردى.
«ەلىمىزدەگى بارشا راديو قىزمەتكەرلەرىن ءتول مەرەكەلەرىمەن قۇتتىقتاي وتىرىپ, زور دەنساۋلىق جانە شىعارماشىلىق تابىس تىلەيمىن! ۇلتتى ۇيىستىراتىن جانە وتانشىلدىققا ۇندەيتىن حابارلارىڭىز كوپ بولسىن!» دەپ اياقتادى ءسوزىن ول.
