دەپارتامەنت سىبايلاس جەمقورلىققا قارسى كۇرەستە وسىنداي فاكتىلەر تۋرالى حابارلايتىن ازاماتتاردى كوتەرمەلەۋ شارالارىن «پارمەندى تەتىك» دەپ اتادى.
«قازاقستاندا ازاماتتاردى كوتەرمەلەۋدىڭ جاڭا سارالانعان جۇيەسى ەنگىزىلدى. بۇرىن بۇل قىلمىس ساناتىنا بايلانىستى جۇزەگە اسىرىلعان. قازىر سىبايلاس جەمقورلىق تۋرالى حابارلاعان ادام پارا نەمەسە زالال سوماسىنا قاراي وسى سومانىڭ 10%-نا يە بولادى. بۇل رەتتە ەڭ جوعارى سىياقى 4 000 اەك نەمەسە 11,6 ملن تەڭگەگە دەيىنگى سومانى قۇرايدى. دەپارتامەنت بەس ادامدى سىبايلاس جەمقورلىق فاكتىلەرى تۋرالى حابارلاعانى ءۇشىن جالپى سوماسى 760 مىڭ تەڭگەگە ماراپاتتادى», دەدى سىبايلاس جەمقورلىققا قارسى قىزمەت دەپارتامەنتى باسشىسىنىڭ ءبىرىنشى ورىنباسارى قۋانىش مىرزاعالي.
سىبايلاس جەمقورلىق فاكتىسى تۋرالى حابارلاعان ادامداردى قورعاۋ ءتيىستى تۇردە جۇزەگە اسىرىلادى. «سىبايلاس جەمقورلىققا قارسى ءىس-قيمىل» تۋرالى قر زاڭىنا سايكەس مۇنداي جاعدايلار تۋرالى حابارلاعان ادام اقشالاي قاراجاتپەن ىنتالاندىرىلىپ قانا قويماي, مەملەكەتتىڭ قورعاۋىندا بولادى. مۇنداي ادام تۋرالى اقپارات مەملەكەتتىك قۇپيا رەتىندە ساقتالادى.
«سىبايلاس جەمقورلىق فاكتىلەرىمەن كەزدەسكەن جاعدايدا اگەنتتىكتىڭ 1424 نومىرىنە, سونداي-اق, ماڭعىستاۋ وبلىسى بويىنشا سىبايلاس جەمقورلىققا قارسى قىزمەتتىڭ كەزەكشى بولىمىنە 8 (7292) 319110 قوڭىراۋ شالۋعا بولادى», دەپ جازىلعان حابارلامادا.
