پرەزيدەنت فورۋم بارىسىندا قازاقستان ورمانى از مەملەكەتتەر قاتارىندا ەكەنىن ەسكە سالدى. ورمان قورى الاڭى 30 ملن گەكتاردى قۇرايدى نەمەسە اۋماقتىڭ 11 پايىزى شاماسىندا.
«بيىل ەلدى جاسىلداندىرۋ بويىنشا اۋقىمدى باعدارلاما باستاۋ الدى. 2025 جىلعا دەيىن 2 ملرد اعاش وتىرعىزۋ جوسپارلانعان», دەدى ق. توقاەۆ.
سونىمەن قاتار مەملەكەت باسشىسى ارال تەڭىزىنىڭ قۇرعاۋى ءىرى ەكولوگيالىق اپات بولعانىن, وسى ورايدا تۇزدى شولەيتتەر پايدا بولعانىن ايتتى. شاڭدى داۋىلدار اتموسفەراعا ءىرى كولەمدە زياندى تۇزداردى شىعارادى. سوندىقتان ارالدىڭ قۇرعاعان جەرىندە سەكسەۋىل وتىرعىزۋدى ارتتىرۋ بويىنشا بولەك باعدارلاما قابىلدانعان. 2025 جىلعا قاراي 1,5 ملن گەكتار قامتىلماق.
بۇدان بۇرىن حابارلانعانداي, بۇگىن كوكشەتاۋدا مەملەكەت باسشىسى قاسىم-جومارت توقاەۆ پەن رەسەي پرەزيدەنتى ۆلاديمير ءپۋتيننىڭ قاتىسۋىمەن ەكى ەلدىڭ XVII وڭىرارالىق ىنتىماقتاستىق فورۋمى ونلاين فورماتتا ءوتىپ جاتىر.
