وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى انجەلا بەكسۇلتانوۆانىڭ ايتۋىنشا, قوستانايعا تاياۋ كۇندەرى بالالار مەن جۇكتى ايەلدەرگە ارنالعان Phizer ۆاكتسيناسى كەلەدى. ارتىنشا گەرمانيادان نەمىس ۆاكتسيناسى دا جەتىپ قالۋى مۇمكىن. سونىمەن قاتار وسى ۆاكتسينالاردى ساقتايتىن ارنايى توڭازىتقىش قۇرىلعىلار دا اكەلىنەدى.
– ۆاكتسينا مەن توڭازىتقىش قۇرىلعىلار ءبىزدىڭ ارنايى مەديتسينالىق قامتۋ ورتالىعىنا كەلىپ تۇسەدى. Phizer ۆاكتسيناسى مينۋس 60-تان 90 گرادۋسقا دەيىنگى تەمپەراتۋرادا ساقتالىنۋعا ءتيىس. قازىر وسى ۆاكتسينانى ەگۋگە قاتىساتىن مەديتسينا قىزمەتكەرلەرىن وقىتۋ سەمينارلارى مەن ترەنينگتەر ءوتىپ جاتىر. ءبىز بۇل ۆاكتسينالاردى العان سوڭ, تەمپەراتۋرالىق رەجىمدى ساقتاي وتىرىپ, وبلىستىڭ بارلىق وڭىرىندەگى ەكپە پۋنكتتەرىنە تاراتاتىن بولامىز, – دەدى ا.بەكسۇلتانوۆا.
قوستاناي وبلىسى «سارى» ايماققا كوشىپ, ىندەتتىڭ تارالۋ قارقىنى ءسال باسەڭدەگەندەي بولدى. وڭىرلىك جەدەل شتاب 27 قىركۇيەكتە وبلىستىڭ 102 تۇرعىنى Covid-19 جۇقتىرعانىن مالىمدەدى. ەسەسىنە, ەكپە العاندار كۇن ساناپ ەسەلەنىپ كەلەدى. بۇل جاعىنان تۇرعىندارىنىڭ 70 پايىزدان استامى ۆاكتسينا قابىلداعان قارابالىق, ب.مايلين, التىنسارين جانە ۇزىنكول اۋداندارى كوش باستاپ كەلەدى.
وبلىستىق دەنساۋلىق ساقتاۋ باسقارماسى وكىلدەرىنىڭ ايتۋىنشا, ايماقتا كوروناۆيرۋسپەن اۋىرعان 48 جۇكتى ايەل تىركەلگەن. ءبىر ايەل اۋىر جاعدايدا جاتىر.
قوستاناي وبلىسى
