ءبىلىم • 29 قىركۇيەك، 2021

ەلىمىزدىڭ ەڭ ۇزدىك ۇستازدارى باس قوستى

155 رەت كورسەتىلدى

توبىل وڭىرىنە ءبىلىم جانە عىلىم ءمينيسترى اسحات ايماعامبەتوۆ جۇمىس ساپارىمەن كەلدى. مينيستر ەڭ الدىمەن وبلىس اكىمىمەن بىرگە قوستانايداعى ىبىراي ءالتىنساريننىڭ ەسكەرتكىشىنە گۇل شوقتارىن قويىپ، ۇلى اعارتۋشىنىڭ رۋحىنا تاعزىم ەتتى. قوستانايدا بيىل تاۋەلسىزدىكتىڭ 30 جىلدىعىمەن قاتار، ىبىراي ءالتىنساريننىڭ 180 جىلدىعى دا كەڭىنەن اتالىپ وتۋدە.

«وقۋشىعا قۇشتار مەكتەپ» جوباسى جۇزەگە اسىرىلۋدا

ۆەدومستۆو باسشىسى جۇمىس ساپارى بارىسىندا ميچۋرين اۋىلدىق مەكتەبىنە باردى. بيىل Nur Otan پارتياسىنىڭ باع­دار­لا­ماسى شەڭبەرىندە مەك­تەپ­تى مو­دەرنيزاتسيالاۋعا قوسىمشا قار­جى بولىنگەن. ۇستازدار جاڭا وقۋ جىلى قايتا ورالعان 45 مينۋتتىق ساباقتىڭ قولايلى ەكەنىن ايتتى. ءار ساباقتىڭ بەس مينۋتى بىلتىر وقۋ جىلى قاشىقتان وقى­عان بالالار تۇسىنبەي قالعان تا­قى­رىپتاردى پىسىقتاۋعا كەتەدى. باس­تاۋىش سىنىپقا باس سۇققان ا.ايماعامبەتوۆ بالالاردان «مەك­­تەپكە كەلىپ وقىعان ۇناي ما؟» دەپ سۇراپ ەدى، وقۋشىلار «ۇن­اي­دى! سىنىپتا وقىعاننان ارتىق ەشتەمە جوق!» دەپ جامىراسا جاۋاپ بەردى. سونداي-اق مەكتەپ­تەگى بەينەباقىلاۋ كامەرالا­رى مەن دابىل باتىرمالارىنىڭ جۇ­مى­سىن تەكسەردى.

ودان كەيىن وبلىستاعى ءبىلىم بەرۋ مەكەمەلەرىنىڭ، اۋداندىق ءبىلىم بولىمدەرىنىڭ باسشىلارىمەن كەزدەسىپ، كوللەدج ديرەكتورلارىن تاعايىنداۋ ەرەجەلەرىنە، روتاتسيالاۋعا، مۇعالىمدەردى جۇ­مىس­­قا قابىلداۋعا، ءبىلىم بەرۋ سالا­سىندا ۆەرتيكالدى باسقارۋ جۇيەسىن ەنگىزۋگە قاتىستى سۇراق­تار­عا جاۋاپ بەردى. جيىندا مۇعا­لىمدەردى قايتا دايارلاۋدىڭ ما­ڭىز­دىلىعى جانە تىرەك مەكتەپتەر مەن ولار بەكىتىلگەن ءبىلىم بەرۋ مەكەمەلەرىنىڭ ءوزارا بايلا­نىسىندا ورىن الىپ وتىرعان قيىن­دىقتار جونىندە ماسەلەلەر قوز­عالىپ، اۋىلدىق مەكتەپتەردە جان باسىنا قارجىلاندىرۋدى ەنگىزۋ قاجەتتىلىگى تۋرالى ايتىلدى. ال كوللەدج قىزمەتكەرلەرى اكادەميالىق ەركىندىك، كوللەدجدەر مەن جوعارى وقۋ ورىندارىنىڭ ءبىلىم بەرۋ باعدارلامالارىن سينحرونداۋ ماسەلەلەرىن كوتەردى. سونداي-اق كوللەدجدەن كەيىن ستۋدەنت ءبىلىم الۋ ءۇردىسىن جوعارى وقۋ ورنىندا جالعاستىرعان كەزدە ونىڭ كوللەدجدەگى ناتيجەلەرىنىڭ ەسكەرىلۋى سياقتى ماسەلەلەر تال­قى­لاندى.

– قوستاناي وبلىسىندا «وقۋعا قۇشتار مەكتەپ» جوباسى بەلسەندى جۇزەگە اسىرىلىپ جاتىر، سونداي-اق مەكتەپتەرگە ارنايى كوركەم ادەبيەت ساتىپ الىنعان، مەكتەپ كىتاپحانالارىنىڭ جاڭعىرتىلىپ جاتقانىنا كوڭىلىم تولدى، – دەدى ا.ايماعامبەتوۆ.

ءبىلىم جانە عىلىم ءمينيسترى قوستاناي پولتەحنيكالىق كوللەد­جىن­دە «جاس مامان» جوباسى بو­يىنشا جۇمىس ىستەپ جاتقان زەرتحانالار مەن شەبەرحانالارمەن، وقۋ ۇدەرىسىمەن تانىستى. مۇندا ستۋدەنتتىڭ تاجىريبەلىك داعدىنى مەڭگەرۋىنە قولايلى، زاماناۋي قۇرىلعىلار ورنالاسقان، قۇرال-جابدىقتار فرانتسيا، گەرمانيا، اقش، بەلارۋس جانە يتاليادان ساتىپ الىنعان. كوللەدج ديرەك­تورىنىڭ ايتۋىنشا، كاسىبي ءبىلىم بەرەتىن ءبىلىم ورداسىندا 1200-دەن استام ستۋدەنت وقيدى. ولاردىڭ اراسىندا بولاشاق ەلەكترومەحانيكتەر، ەلەكتر مونتاجشىلار، ناۋبايشىلار، كونديتەرلەر مەن استىق وڭدەۋ ونەركاسىبىنىڭ ماماندارى بار.

ا.ايماعامبەتوۆ ا.باي­تۇر­­سىن­ ۇلى اتىنداعى وڭىرلىك ۋنيۆەرسيتەتى جانىنان اشىلعان Sweet baby بالاباقشاسىندا بولدى. وسى بالاباقشادا «مەك­تەپكە دەيىنگى وقۋ مەن تاربيە» باعدارلاماسى بويىنشا تاجىري­بەدەن ءوتىپ جاتقان ۋنيۆەرسيتەت ستۋ­دەنتتەرىمەن كەزدەسىپ، بۇگىنگى تاڭدا جوو-داعى ءبىلىم بەرۋ ۇدە­رىسىندە دۋالدى وقىتۋدىڭ ما­ڭىزدى ەكەنىن ايتتى.

– احمەت بايتۇرسىن ۇلى اتىن­دا­عى ۋنيۆەرسيتەت ستۋدەنت­تەرگە پراكتيكالىق ءبىلىم بەرۋ بارىسىندا دۇرىس باعىت العانىن اتاپ وتكىم كەلەدى. ۋنيۆەرسيتەتكە كىرەبەرىستە تۇرعان تەحنيكا – «كاماز» كولىگى بىردەن كوزگە تۇسەدى. وزدەرىڭىز بىلە­تىندەي، قوستاناي وبلىسىنىڭ ين­دۋستريالىق ايماعىندا ەكى جاڭا «كاماز» زاۋىتى سالىنىپ جاتىر. بۇگىندە جوعارى وقۋ ورنىندا ماشينا جاساۋ ما­ماندىعىن يگەرىپ جاتقان ستۋدەنتتەر تاجىريبەدەن ءوتىپ، ءارى قاراي وسى كاسىپورىنداردا جۇمىسقا ورنالاسۋى ءۇشىن كەلىسسوزدەر جۇر­گىزىلىپ جاتىر. سونىمەن قا­تار وسى جازدا ا.بايتۇرسىن ۇلى اتىن­داعى قوستاناي وڭىرلىك ۋنيۆەرسيتەتىنىڭ 30 ستۋدەنتى رە­سەي­دەگى «كاماز» كاسىپورنىندا ەكى اي بويى ون­دى­رىستىك پراكتيكادان ءوتتى. بۇل قوستاناي وڭىر­لىك ۋنيۆەرسيتەتى مەن قازان فە­دەرالدىق ۋنيۆەرسيتەتىنىڭ نابە­رەجنىە چەلنى ينستيتۋتى ارا­سىنداعى مەموراندۋمنىڭ ناتيجەسىندە مۇمكىن بولىپ وتىر. سونىمەن بىرگە جۇمىس بەرۋشىلەر جوعارى وقۋ ورنىنا كەلىپ، ءدارىس وقيدى. بۇل تاجىريبە بەلگىلى ءبىر ماماندىق بويىنشا تەرەڭدەتىپ وقىتۋ ءۇشىن ەنگىزىلگەن. ولاردىڭ اراسىندا «اگروماشحولدينگ» ونەركاسىپتىك كاسىپورنىنىڭ جانە قۇس فابريكالارىنىڭ وكىلدەرى، تاماق ونەركاسىبىنىڭ وندىرۋشىلەرى بار، – دەدى مينيستر.

 «ۇزدىك پەداگوگ-2021» بايقاۋىنىڭ جەڭىمپازدارى ماراپاتتالدى

توبىل وڭىرىندەگى جۇمىس سا­پارىنىڭ ەكىنشى كۇنى ءبىلىم جانە عىلىم ءمينيسترى تاۋەلسىزدىكتىڭ 30 جىلدىعى مەن ۇلى اعارتۋشى ىبىراي ءالتىنساريننىڭ 180 جىلدىعىنا وراي قوستانايداعى 

«جاستار» سارايىندا وتكەن مۇعا­لىم­دەردىڭ كاسىبي مەرەكەسىنە ار­نالعان سالتاناتتى شاراعا قا­تى­سىپ، «ۇزدىك پەداگوگ-2021» رەس­­­پۋب­ليكالىق بايقاۋىنىڭ جە­ڭىم­­پازدارىن ماراپاتتادى.

– بيىل ونىنشى رەت وتكىزىلىپ وتىرعان بايقاۋدىڭ ءمان-ماڭىزى مەن كونكۋرس جەڭىمپازدارىنا ەرەكشە توقتالا كەتكىم كەلەدى. ويت­كەنى بيىل مۇعالىمدەر مەرە­كەسى ەل تاۋەلسىزدىگىنىڭ 30 جىل­دى­عىنىڭ قارساڭىندا ءارى عالىم ىبىراي ءالتىنساريننىڭ مەرەيتويىمەن تۇسپا-تۇس كەلىپ، قاسيەتتى توبىل-تورعاي جەرىندە ءوتىپ وتىر. سىزدەردىڭ ەڭبەكتەرىڭىز ەرەن، كاسىبي مەرەكەلەرىڭىزبەن شىن جۇرەكتەن قۇتتىقتايمىن! ۇلى اعارتۋشى ى.ءالتىنساريننىڭ «مەن ءۇشىن جاقسى مۇعالىم بارىنەن دە ارتىق. ويتكەنى ول – مەكتەپتىڭ جۇرەگى» دەگەن ۇلاعاتتى ءسوزى بار. شىن مانىندە، تاۋەلسىز ەلىمىزدىڭ بىلىكتى ۇستازدارى ۇلى اعارتۋشى ارمانداعان مۇعالىمنىڭ ناعىز ءوزى، –
دەدى ا.ايماعامبەتوۆ.

سالتاناتتى جيىن بارىسىندا ەلىمىزدىڭ ءار وڭىرىنەن كەلگەن «ۇزدىك پەداگوگ-2021» رەسپۋبليكالىق بايقاۋىنىڭ 64 جەڭىمپازى ماراپاتتالدى. ولاردىڭ ىشىندە قوس­تا­ناي پەداگوگيكالىق كول­لەد­جى­نىڭ شەت تىلدەر كافەد­را­سىنىڭ ارنايى پاندەر وقىتۋشىسى ءادىلجان بوكەنباەۆ، قوستاناي قالاسىنىڭ №6 جالپى ءبىلىم بە­رە­تىن مەكتەبىنىڭ باستاۋىش سىنىپ مۇعالىمى وكسانا لاۋتو، جى­تىق­ارا گيمنازياسىنىڭ گەوگرافيا ءپانى مۇعالىمى اينۇر نازار­كەنوۆا، ارقالىقتاعى ىبى­راي التىنسارين اتىنداعى گيم­نا­زيا­نىڭ بيولوگيا جانە گەوگرافيا ءپانى مۇعالىمى الەكساندر پەك بار. ۇزدىك ۇستازداردىڭ ارقايسى 2 ملن 900 مىڭ تەڭگەنىڭ سەرتيفيكاتىنا يە بولدى.

– بايقاۋ وڭاي بولعان جوق. ءبىزدىڭ جۇمىسىمىز قالالىق جانە وبلىستىق كەزەڭنىڭ قورىتىندىسى بويىنشا ۇسىنىلدى. بۇل – مەنىڭ عانا ەمەس قولداۋ كورسەتكەن ارىپ­تەس­­تەرىمنىڭ، تالانتتى دا ءبىلىمدى شا­كىرت­تەرىمنىڭ جەمىسى، – دەيدى ار­قا­لىقتاعى ى.التىنسارين اتىن­­داعى گيمنازيانىڭ مۇعالىمى الەكساندر پەك.

سالتاناتتى جيىندا قوستاناي وبلىسىنىڭ 11 مۇعالىمى «ى.التىن­سا­رين» جانە «قازاقستان رەس­پۋب­لي­كا­سىنىڭ ءبىلىم بەرۋ ءىسىنىڭ قۇر­مەتتى قىزمەتكەرى» توس­بەلگىلەرىن تاقتى، سونداي-اق پەداگوگيكا سالاسىندا جەمىستى ەڭبەك ەتكەن ارداگەرلەر ماراپاتتالدى.

مۇعالىمدەردىڭ مەرەيىن تاسىت­قان شارادان كەيىن ا.ايماعام­بەتوۆ ۇلى اعارتۋشى ىبىراي ءالتىنساريننىڭ 180 جىلدىعىنا ارنالعان «ى.التىنسارين جانە اعارتۋشىلىق تاعىلىم: تاريحي وزەگى، تانىمدىق ءورىسى، زاماناۋي ورنەگى» اتتى حالىقارالىق عىلىمي-تاجىريبەلىك كونفەرەنتسياعا قا­تىستى. كونفەرەنتسيا بارىسىندا ىبىرايدىڭ اعارتۋشىلىق يدەيالارى مەن ەلىمىزدىڭ ءبىلىم بەرۋ جۇيەسىن قالىپتاستىرۋداعى قىزمەتى تۋرالى ايتىلدى. سونى­مەن قاتار اعارتۋشى مۇراسىن زەرت­تەۋ، قايتا زەردەلەۋ جانە كەڭى­نەن ناسيحاتتاۋ ماسەلەلەرى قوزعالدى.

سوڭعى جاڭالىقتار

بۇعىبۇلاۋ

قازاقستان • كەشە

جۇزە ءبىلۋ – ءومىر

قوعام • كەشە

ولكەتانۋشى

قازاقستان • كەشە

كەبەنەك

تاريح • كەشە

ساۋكەلە

ونەر • كەشە

ۇقساس جاڭالىقتار