شىمكەنت قالاسى پوليتسيا دەپارتامەنتى جپقب پاترۋلدىك پوليتسيا پولكىنىڭ «جاڭا شاحار» ستاتسيونارلىق پوليتسيا بەكەتىنە جەرگىلىكتى تۇرعىن كومەك سۇراپ كەلگەن. تۇرعىننىڭ ايتۋىنشا, ول كوپقاباتتى تۇرعىن ءۇيدىڭ بەسىنشى قاباتىنان بەيتانىس ءجاسوسپىرىمنىڭ وزىنە قول جۇمساماق بولىپ, شاتىردا وتىرعانىن كورگەن. اتالعان جايت 28 قىركۇيەك كۇنى ساعات 13:20 شاماسىندا بولعان.
بۇل جاعدايعا بەي-جاي قاراماعان ءتارتىپ ساقشىلارى دەر كەزىندە وقيعا ورنىنا جەتىپ, شاتىردا وتىرعان ءجاسوسپىرىمدى سوزگە تارتىپ, قاۋىپسىزدىك شارالارىن جۇزەگە اسىردى. وسى وقيعا پوليتسەيدىڭ بەينەجەتونىنا جازىلعان. سونداي-اق پوليتسەيلەر ءجاسوسپىرىمنىڭ ءومىرىن ساقتاپ قالۋمەن قاتار, دارىگەرلەر مەن پسيحولوگتى شاقىرتىپ, قاجەتتى شارالاردى قابىلدادى.
جەدەل ءىس-ارەكەتتىڭ ناتيجەسىندە ءجاسوسپىرىمنىڭ ءومىرىن اراشالاپ قالعان پوليتسيا قىزمەتكەرلەرىنە ءجاسوسپىرىمنىڭ اتا-اناسى جانە جەرگىلىكتى تۇرعىندار العىسىن جەتكىزدى.
