«جالپى بۇگىنگى كۇنى جەتىسۋ ايماعىندا جاڭارتىلعان ەنەرگيا كوزىنىڭ 31 نىسانى بار, ولاردىڭ جالپى قۋاتى – 317,67 مۆت, سونىڭ 18-ءى – سۋ ەلەكتر ستانساسى, 7-ءى – جەل ەلەكتر ستانساسى, 6-ى – كۇن ەلەكتر ستانساسى. وبلىستىڭ ەلەكتر تۇتىنۋ قاجەتتىلىگى 589,48 مۆت, سونىڭ 382 مۆت وزىمىزدە وندىرىلەدى, ونىڭ 72 مۆت-ى جاڭارتىلعان ەنەرگيا كوزدەرىنىڭ ۇلەسىندە», دەپ حابارلايدى الماتى وبلىسى اكىمىنىڭ ءباسپاسوز قىزمەتى.
سارقان اۋداندىق اكىمدىگىنىڭ مالىمەتىنە قاراعاندا لەپسى وڭىرىندەگى جەس – قازىرگى كەزدە اۋدان اۋماعىندا ىسكە اسىرىلىپ جاتقان ءىرى ينۆەستيتسيالىق جوبالاردىڭ ءبىرى. «اباي-2 جەس» جشس وكىلدەرى قۇرىلىس جۇمىستارىن 2019 جىلدان باستاعان, 2022 جىلى اياقتالادى دەپ جوسپارلاپ وتىر.
ماڭىزدى نىسانعا ەڭ الدىمەن جول تارتىلدى, قازىر ماماندار قوندىرعىلاردىڭ ىرگەتاسىن قۇيۋدا. قۇرىلىس الاڭىندا 100-گە تارتا ادام جۇمىس ىستەيدى.
«بۇل - قۋاتى 50 مۆت-تان اساتىن جاڭا جەس. جىل سوڭىنا دەيىن العاشقى 6 جەل قوندىرعىسى ورناتىلىپ, ىسكە قوسىلادى», دەدى اۋدان اكىمى تالعات قايناربەكوۆ.
اتاپ وتسەك, جەس لەپسى اۋىلىنان 80 شاقىرىم جەردەگى جازىقتا ورنالاسقان. وندا ارقايسىنىڭ قۋاتى 3,2 مۆت بولاتىن 16 جەل قوندىرعىسى بولادى, باعانالاردىڭ بيىكتىگى 100 مەترگە, جەل دوڭگەلەكتەرى قالاقتارىنىڭ بيىكتىگى 70 مەترگە جەتەدى. نىساننىڭ سالىنۋى ارقاسىندا اۋدانعا 19,3 ملرد. تەڭگە ينۆەستيتسيا تارتىلدى.
جالپى 2021-2025 جىلدارى ىسكە قوسىلۋى ءتيىس الماتى وبلىسىنداعى جاڭارتىلعان ەنەرگيا كوزدەرى نىساندارىنىڭ تىزبەسىنە جالپى قۋاتى 424 مۆت بولاتىن 27 جوبا كىرەدى (گەس – 15, جەس – 9, كەس - 1, بيوەس - 2). بۇل جوبالاردى ىسكە اسىرۋ ايماقتىڭ ءوزى وندىرەتىن جاڭارتىلعان ەنەرگيا كوزدەرىنىڭ ۇلەسىن 2025 جىلعا قاراي 42%-كە دەيىن ارتتىرادى.
