دەنساۋلىق ساقتاۋ ءمينيسترى الەكسەي تسوي ەلدەگى سانيتاريالىق-ەپيدەميولوگيالىق جاعداي تۋرالى بايانداما جاسادى. سوڭعى ەكى اپتادا COVID-19 اۋرۋشاڭدىعى 60%-عا, ءولىم دەڭگەيى 80%-عا تومەندەدى. ينفەكتسيالىق توسەك ورىندارى جۇكتەمەسى دەڭگەيىنىڭ 56%-دان 33%-عا دەيىن, رەانيماتسيالىق توسەكتەردىڭ 45%-دان 32%-عا دەيىن تومەندەگەنى بايقالادى.
سونداي-اق ەپيدەميولوگيالىق جاعدايدىڭ جاقسارۋىنا بايلانىستى ۆەدومستۆوارالىق كوميسسيا بارلىق سانيتاريالىق تالاپتاردى قاتاڭ ساقتاي وتىرىپ, بريفينگتەر مەن ءباسپاسوز كونفەرەنتسيالارىن كۇندىزگى رەجيمدە وتكىزۋ تۋرالى شەشىم قابىلدادى. وسىلايشا, قر پرەزيدەنتى جانىنداعى ورتالىق كوممۋنيكاتسيالار قىزمەتى مەن وڭىرلىك كوممۋنيكاتسيالار ورتالىقتارى بازاسىندا «Ashyq» قوسىمشاسىندا «جاسىل» مارتەبەسى بار باق وكىلدەرى وفلاين فورماتتا ءباسپاسوز كونفەرەنتسيالارىنا قاتىسا الادى.
كوميسسيا وتىرىسى بارىسىندا ەل وڭىرلەرىندەگى كوروناۆيرۋستىق ينفەكتسيانىڭ جاعدايى جانە ازاماتتاردى ۆاكتسيناتسيالاۋ دەڭگەيى تۋرالى باياندامالار تىڭدالدى. پرەمەر-ءمينيستردىڭ ورىنباسارى وڭىرلەرگە يممۋنداۋ قارقىنىن تومەندەتپەۋدى تاپسىردى.
سونىمەن قاتار ۆاك كەلۋشىلەردىڭ مارتەبەسىن تەكسەرمەيتىن «Ashyq» جۇيەسىنىڭ 12 مىڭ جوسىقسىز قاتىسۋشىسىن 2 اپتاعا جۇيەدەن الىپ تاستاۋ تۋرالى شەشىم قابىلدادى.
ۆەدومستۆوارالىق كوميسسيانىڭ وتىرىسىن قورىتىندىلاي كەلە, ەرالى توعجانوۆ بىرقاتار ناقتى تاپسىرمالار بەرىپ, ۆاك قاتىسۋشىلارىنىڭ الدىندا تاياۋ ۋاقىتتاعى باسىم مىندەتتەردى بەلگىلەدى.
