قوعام • 28 قىركۇيەك، 2021

AMW: الەكسەي تسوي پاندەميا كەزىندە اقپارات تاراتۋدىڭ ماڭىزدىلىعىنا توقتالدى

39 رەت كورسەتىلدى

قر دەنساۋلىق ساقتاۋ ءمينيسترى الەكسەي تسوي Astana Media Week فورۋمىندا پاندەميا كەزىندەگى حالىققا اقپارات تاراتۋ جۇمىسى تۋرالى پىكىر ءبىلدىردى، دەپ حابارلايدى Egemen.kz.

«COVID-19 كوروناۆيرۋس پاندەمياسى بۇكىل ادامزات ءۇشىن جاھاندىق سىن-تەگەۋرىن، مىقتى ەكونوميكالار مەن الەۋمەتتەرگە، جەكەلەگەن قوعامداستىقتارعا جانە ءاربىر وتباسىنا سوققى بولدى. ۆيرۋستىڭ كەڭ تارالۋى مەن حالىق اراسىندا اۋرۋدىڭ ءورشۋى سالدارىنان داعدارىستارعا ەڭ ءتوزىمدى دەنساۋلىق ساقتاۋ جۇيەسى دە قولدا بار رەسۋرستارعا بۇرىن-سوڭدى بولماعان جۇكتەمەگە توتەپ بەرە الماي، وسالدىعىن كورسەتتى. دۇنيەجۇزىلىك دەنساۋلىق ساقتاۋ ۇيىمى وتكەن جىلى ينفەكتسيامەن كۇرەسۋ ستراتەگياسىندا پاندەميانىڭ ءۇش بەلگىسىن انىقتادى. ءبىرىنشىسى – جىلدامدىق پەن ماسشتاب. اۋرۋ الەمنىڭ تۇكپىر-تۇكپىرىنە تەز تارالدى، تارالۋدىڭ بۇل سيپاتىنا بايلانىستى ءتىپتى ەڭ تۇراقتى دەنساۋلىق ساقتاۋ جۇيەلەرى دە بۇزىلدى. ەكىنشىسى – اۋىرلىق دارەجەسى، ورتاشا العاندا جاعدايلاردىڭ 20%-ى اۋىر نەمەسە كۇردەلى بولدى، جاسىنا قاراي جانە قاتار جۇرەتىن قانداي دا ءبىر اۋرۋلار بولعان كەزدە كۇشەيەدى. ءۇشىنشىسى – الەۋمەتتىك-ەكونوميكالىق تۇراقسىزدىق، دەنساۋلىق ساقتاۋ جانە الەۋمەتتىك قورعاۋ جۇيەلەرى باستان وتكەرگەن كۇيزەلىس جانە كەڭ جانە تەرەڭ الەۋمەتتىك-ەكونوميكالىق سالدارعا اكەپ سوققان ۆيرۋستىڭ تارالىمىن باقىلاۋ ءۇشىن قابىلدانعان شارالار»، دەدى ا.تسوي Astana Media Week فورۋمىنىڭ «جاڭا، كوۆيدتان كەيىنگى الەمدەگى قوعام جانە باق» پانەلدىك سەسسياسىندا.

مينيستر پاندەميا باستالعان كەزدە تۇرعىندار تولىققاندى اقپاراتتىڭ بولماۋىنان ۇلكەن قىسىمعا ۇشىراعانىن، ويتكەنى COVID-19 ەل ەستىمەگەن جانە الەمدە جاعدايدى ناقتى ءتۇسىنۋ بولماعانىن اتاپ ءوتتى. عىلىمنىڭ ۆيرۋستى زەرتتەۋدەگى ءاربىر قادامى جەكە تۇسىنىكتەمەلەرىمەن بىرگە ءجۇردى. كەيبىر ءدارى-دارمەك، پتر تەست، جەكە قورعانىس قۇرالدارى جەتىسپەدى، بۇل دۇربەلەڭگە اكەپ سوقتى.

مەملەكەت تەز جۇمىلىپ، ۇكىمەتتە جەكە جۇمىس توبى جانە ۆەدومستۆوارالىق كوميسسيا قۇرىلدى.

ا. تسوي اتاپ وتكەندەي، قازاقستاندا قۇرىلعان زەرتحانالاردىڭ الەۋەتىنىڭ ارقاسىندا قازىر تاۋلىگىنە 120 مىڭ پتر تەست جۇرگىزۋگە بولادى. 17 جۇقپالى اۋرۋلار اۋرۋحاناسى سالىندى، بارلىق وڭىرلەر 100% «جەدەل جاردەم» ماشينالارىمەن قامتاماسىز ەتىلدى، دارىلىك زاتتاردىڭ تۇراقتاندىرۋ قورلارى قۇرىلدى. جالپى جاعداي باقىلاۋعا الىندى.

ا.تسوي پاندەميا كەزىندە قوعاممەن بايلانىس ورناتۋ وتە ماڭىزدى ەكەنىن، سوندىقتان حالىققا وبەكتيۆتى اقپارات بەرۋ ارنالارى ءبىرىنشى ورىنعا شىققانىن اتاپ ءوتتى. حالىقتى اقپاراتتاندىرۋدىڭ دۇرىس ستراتەگياسىن تاڭداپ، اقپارات كوزدەرىن ازىرلەۋ ماڭىزدى بولدى. بۇل - coronavirus-2020 سايتى، اقپارات جانە قوعامدىق دامۋ مينيسترلىكتەرىنىڭ، دەنساۋلىق ساقتاۋ مينيسترلىكتەرىنىڭ پورتالدارى جانە باسقا دا اككاۋنتتار بولدى.

«كوروناۆيرۋسقا قارسى ۆاكتسينانىڭ پايدا بولۋى دا ماڭىزدى وقيعا بولدى. قازىرگى ۋاقىتتا قازاقستاندا 7،5 ملن ادام ۆاكتسينا الدى. ۆاكتسينانىڭ ماڭىزى ءتۇسىندىرىلدى، ونىڭ قاسيەتتەرى تۋرالى ايتىلدى، ويتكەنى بۇل جاڭا ازىرلەمەلەر بولعاندىقتان باستاپقىدا حالىق ۆاكتسيناعا سىنمەن قارادى. ەندى ادامدار ۆاكتسينانىڭ ۆيرۋستان قورعايتىنىنا كوز جەتكىزىپ، وڭ قاباق تانىتىپ وتىر. ال حالىقتى ۆاكتسينادان قورقۋعا يتەرمەلەيتىن «انتيۆاكسەرلەردىڭ» ارەكەرتىن دەسترۋكتيۆتى دەۋگە بولادى، ال ۆاكتسينالاۋ – كەز كەلگەن جۇقپالى اۋرۋلاردىڭ الدىن-الۋدىڭ جالعىز ءادىسى. دەنساۋلىق ساقتاۋ مينيسترلىگى پاندەميا كەزەڭىندە ينفەكتسيا تۋرالى جالعان اقپاراتتاردى انىقتاپ، حالىققا مۇنداي فاكتىلەردىڭ شىندىققا سايكەس كەلمەيتىنىن تۇسىندىرۋدە»، دەدى الەكسەي تسوي.

 

 

سوڭعى جاڭالىقتار

جانى جايساڭ جاز-اتا

قوعام • كەشە

دۇبىردەن تۋعان ولەڭ

ادەبيەت • كەشە

ۇقساس جاڭالىقتار