سۋرەتتى تۇسىرگەن ج.جۇمابەكوۆ
كەزدەسۋدە نۇرلان نىعماتۋلين تۇركىستان قالاسىندا تۇركپا-نىڭ مەرەيتويلىق ح پلەنارلىق سەسسياسىن وتكىزۋدىڭ ماڭىزدىلىعى مەن سيمۆولدىق ءمانىن اتاپ ءوتىپ, قالانىڭ قازىرگى جاندانۋى جانە جاڭارۋى قازاقستاننىڭ تۇڭعىش پرەزيدەنتى - ەلباسى, تۇركى كەڭەسىنىڭ قۇرمەتتى توراعاسى نۇرسۇلتان نازارباەۆتىڭ باستاماسى بويىنشا ءجۇرىپ جاتقانىن اتاپ ءوتتى.
ءماجىلىس سپيكەرى وتىرىستا قابىلدانعان شەشىمدەر پارلامەنتارالىق ءوزارا ءىس-قيمىلدى نىعايتۋعا, سونداي-اق ەلدەر اراسىنداعى جان-جاقتى ىنتىماقتاستىقتى دامىتۋعا ىقپال ەتەتىنىنە سەنىم ءبىلدىردى.
«بيىل قازاقستان مەن قىرعىزستان تاۋەلسىزدىگىنىڭ 30 جىلدىعى اتاپ وتىلەدى. وسى ۋاقىت ىشىندە ەلىمىز ايتارلىقتاي جەتىستىكتەرگە جەتتى. مەملەكەت باسشىلارىنىڭ ماڭىزدى باستامالارىن قولداۋ ءۇشىن قازاقستان مەن قىرعىزستان اراسىنداعى ءداستۇرلى دوستىق جانە تاتۋ كورشىلىك قاتىناس, ونىڭ ىشىندە پارلامەنتارالىق دەڭگەيدە دە ودان ءارى دامي بەرەتىنىنە سەنىمدىمىن», دەدى نۇرلان نىعماتۋلين قىرعىز رەسپۋبليكاسى جوگوركۋ كەنەشىنىڭ توراعاسى تالانت مامىتوۆپەن كەزدەسۋدە.
ماجارستان مەن قارا تەڭىز ەكونوميكالىق ىنتىماقتاستىق پارلامەنتتىك اسسامبلەياسى دەلەگاتسيالارىنىڭ باسشىلارىمەن كەزدەسۋدە پارلامەنتشىلەردىڭ ءوزارا ءىس-قيمىلىن نىعايتۋ ماسەلەلەرى تالقىلاندى.
«قازاقستان مەن ماجارستان پارلامەنتشىلەرى دە ەل باسشىلارى ۇنەمى كورسەتىپ وتىراتىن دامۋ جونىندەگى ورتاق كوزقاراسىن ۇستانادى», دەپ اتاپ ءوتتى نۇرلان نىعماتۋلين ماجارستان مەملەكەتتىك جينالىسىنىڭ ءبىرىنشى ۆيتسە-سپيكەرى مارتا ماترايمەن كەزدەسۋدە.
ال قارا تەڭىز ەكونوميكالىق ىنتىماقتاستىق پارلامەنتتىك اسسامبلەياسى باس حاتشىسى اساف گادجيەۆپەن كەلىسسوزدەر بارىسىندا مودەلدىك زاڭ شىعارۋ بازاسىن قالىپتاستىرۋ, پارلامەنتتىك ديپلوماتيانى نىعايتۋ تەتىكتەرى تۋرالى ءسوز بولدى.
