ءۇزىلىپ تۇسكەن مونشاقتاي اسەم كوگىلدىر كولدەر مەن قولدىڭ سالاسىنداي اق قايىڭدار, ماڭگى جاسىل قاراعايلار كومكەرگەن كوركەم وڭىردەگى تۋريزم سالاسىنداعى اۋقىمدى ىسكە 500-دەن استام كاسىپورىن ۇلەس قوسۋدا. وعان «بۋراباي», «بۇيراتاۋ» جانە «كوكشەتاۋ» مەملەكەتتىك ۇلتتىق تابيعي پاركتەرى مەن «قورعالجىن» مەملەكەتتىك تابيعي قورىعىن قوسساڭىز, سالانىڭ سالماعى تارازى باسىن قانشالىقتى تارتىپ تۇرعاندىعىن كوز الدىڭىزعا ەلەستەتە الار ەدىڭىز. جالعىز تابيعات قانا ەمەس, تۋعان جەرىمىزدىڭ تىلسىم تاريحىمەن تانىسىپ, وتكەننىڭ ورنەكتى جولىن وي ەلەگىنەن وتكىزىپ, ەكشەگىسى كەلگەن زەردەلى تۋريستەر ءۇشىن كادىمگىدەي كادەگە جارايتىن 900-دەن استام تاريحي جانە مادەني ەسكەرتكىشتەر سامساپ تۇر. كونە تاريحتىڭ كومبەسى قاتتالىپ جينالعان, جالپاق جۇرت كيەلىگە سانايتىن ورىندار دا از ەمەس. بۇگىنگىنىڭ ءتۋريسىنىڭ كوڭىل اۋداراتىنى دا وسى ماسەلە. ەل تاريحى بۋراباي, زەرەندى, ساندىقتاۋ, قورعالجىن, ەرەيمەنتاۋ, ءبىرجان سال اۋداندارىندا تۇنىپ تۇر. قادام باسساڭىز كوكىرەگىڭدى قات-قابات سىرىمەن مەلتەكتەتىپ جىبەرەتىن قازىناعا كەزىگەسىز. تىڭداي بىلگەن قۇلاقتى, ۇعا بىلگەن كوكىرەكتى رۋحاني مول مۇرامەن كەمەلدەندىرەتىن اڭىز-اڭگىمە, سۇلباسى سولعىن تارتقانىمەن, ءمانى وزگەرمەگەن دەرەكتەر قانشاما؟! جۇرگەن اياققا جورگەم ىلىكتىرەر, بۇگىنگى ۇرپاقتى ۇلتجاندىلىققا تاربيەلەر قانشاما مىسال بوگىپ تۇر. ەگەر وبلىستاعى 73 تۋريستىك مارشرۋتتى الاپات تەڭىزدىڭ تۇبىنەن اقىق ىزدەگەندەي ءسۇزىپ شىقساڭىز, ون سان ولجاعا كەنەلەر ەدىڭىز.
جالپاق الەمدى جامان تۇماۋ جايلاپ تۇرعان ۋاقىتتا دا تۋريزم سالاسىنان تۇڭىلۋگە بولماس. 2020 جىلى وڭىرگە 500 مىڭنان استام تۋريست ات باسىن بۇرعان. ستاتيستيكالىق دەرەكتەرگە قاراعاندا, وسى جىلدىڭ العاشقى جارتىسىندا كەلۋشىلەر سانى 317,8 مىڭعا جەتىپتى. ونىڭ ىشىندە شيپاجايلار مەن ساۋىقتىرۋ ورىندارىندا 55,6 مىڭ ادام كوكشەنىڭ كوگىلدىر, ساف اۋاسىن جۇتىپ, جىبەك جەلىمەن جەلپىنىپ, كۇمىس كولدەرىنە تۇسكەن. جىل سوڭىنا دەيىن تۋريستەر سانى 600 مىڭعا جەتەدى دەگەن ءۇمىت بار. جاز بويى دۇمەپ كەلىپ جاتقان تۋريستەرگە 1,9 ملرد تەڭگەنىڭ قىزمەتى كورسەتىلىپتى. وتكەن جىلمەن سالىستىرار بولساق, 55,8 پايىزعا جوعارى.
جىل سايىن تۋريستەر سانىنىڭ كوبەيۋىنە نە سەبەپ بولىپ وتىر؟ ەندى وسى ماسەلەگە ءسال نازار اۋدارساق. الدىمەن قىزمەت كورسەتۋ ساپاسىنىڭ جاقسارۋى. ول ءۇشىن ارينە, قوماقتى قاراجات قاجەت. بيىل قاڭتار-ماۋسىم ايلارىندا وسى سالاعا قۇيىلعان ينۆەستيتسيا كولەمى 5,6 ملرد تەڭگەگە جەتتى. وقىرمانعا تۇسىنىكتى بولۋى ءۇشىن وتكەن جىلمەن سالىستىرساق, قارجى كولەمى 1,7 ەسەگە كوبەيگەندىگىن ايتا كەتۋ ءلازىم.
قىزمەت ساپاسىمەن بىرگە جۇرت نازارىن وزىنە اۋداراتىن جاعىمدى جاڭالىق تا از ەمەس. ماسەلەن, بۋراباي باۋرايى جىل وتكەن سايىن بوياۋى قالىڭداپ, جاڭا لەپپەن بۋىرقانىپ, وزگەشە ءبىر كەيىپكە ەنىپ, اجارى ادەمىلەنە تۇسۋدە. وتاندىق تۋريستەر عانا ەمەس, تالعامى جوعارى, تالابى كۇشتى شەتەلدىك تۋريستەردى دە قۇشاق جايا قارسى الىپ, كوركەم جەردىڭ سىمباتىنا سۇقتاندىرىپ, كوكىرەكتەرىن ساۋلەلەندىرىپ جىبەرۋگە تولىق مۇمكىندىك بار. تىلسىم تاريحتى تارقاتىپ, تاماشا سىر شەرتەتىن اشىق اسپان استىنداعى «بوتاي-بۋراباي» ەتنو كەشەنى ايرىقشا قىزىعۋشىلىق تۋدىرۋدا. ەڭ باستى ءمانى الاش بالاسىنىڭ جىلقىنى تاقىمعا باسۋى قاشان باستالعاندىعىن كەسىپ كورسەتەدى. مۇنىڭ جالعىز تاريحي عانا ەمەس, وزگە دە ءمانى بار. الەمدە بالاماسى جوق «بۋراباي» حالىقارالىق ترامپلين كەشەنى دە دەمالۋشىلار ءۇشىن قىزعىلىقتى. ايگىلى ابىلاي حان الاڭىنداعى «ابىلاي حان» ەكسپوزيتسيالىق كەشەنى كوزى اشىق, كوكىرەگى وياۋ دەمالۋشىلاردى تىلسىم سىردىڭ تۇنىعىنا شومىلدىرىپ, وزىنە تارتاتىن ورىنعا اينالدى. Discovery اۋماعىنداعى اكۆا پاركتىڭ اسەرى ءوز الدىنا.
بيىل ششۋچە-بۋراباي كۋرورتتى ايماعىن دامىتۋعا 7,8 ملرد تەڭگە قاراجات ءبولىندى. وبلىس اكىمدىگى Bi-Group كومپانياسىمەن بىرلەسىپ, بۋراباي كەنتىن دامىتۋدىڭ تۇجىرىمداماسىن ازىرلەدى. سونداي-اق Berguttu دەمالىس ورتالىعىن سالۋدى كوزدەيتىن Koktal town كوپسالالى پاركىنىڭ «باقىت ارالى» جوباسىن ازىرلەدى. بۇل جوبا جوكەي كولىنىڭ جاعاسىندا جۇزەگە اسىرىلماق.
ءوڭىردىڭ تۋريستىك ينفراقۇرىلىمدىق كەشەنىن دامىتۋ ماقساتىندا بيىل جالپى كولەمى 6,7 ملرد تەڭگەنى قۇرايتىن 22 جوبا جۇزەگە اسىرىلماق. ونىڭ ىشىندە ماڭىزدىلارىن اتاي كەتۋگە ابدەن بولادى. ماسەلەن, Wyndham Garden قوناقۇيى مەن AQBURA Resort وتباسىلىق ۇلگىدەگى كۋرورت قۇرىلىسى. بۇگىنگى تاڭدا بۋراباي كەنتىنىڭ تۋريستىك ينفراقۇرىلىمىنا ينۆەستيتسيا قۇيۋعا نيەتتى ءىرى كومپانيالارمەن كەلىسسوزدەر جۇرگىزىلۋدە. جامان تۇماۋدىڭ اسەرى ىشكى ءتۋريزمنىڭ الەۋەتىن ارتتىردى. سونىدان سوقپاق ىزدەگەن كاسىپكەرلەر دەمالىستىڭ جاڭا ءتۇرى ءارى بولاشاعى زور دەپ ەسەپتەلەتىن گلەمپينگتى دامىتۋعا ىنتالى. وسى جىلدىڭ شىلدە ايىنان باستاپ «بايبوسىنوۆا» جەكە كاسىپكەرلىگى «وربيتا جوكەي» جاڭا گلەمپلينگتى ايماعىندا مەيمانداردى قابىلداي باستادى.
تۋريستەرگە جاعداي تۋعىزۋ ماسەلەسىن شەشۋ ءۇشىن كۋرورتتى ايماقتاعى جول جاقسارتىلۋدا. ماسەلەن, ششۋچينسك-زەرەندى كولىك جولىن پايدالانۋعا بەرۋ ءتاپ-ءتاۋىر سەپتىگىن تيگىزىپ وتىر. الداعى ۋاقىتقا دا اۋقىمدى جوسپارلار جاسالعان. ايماقتىڭ الەۋەتىن دامىتۋ ءۇشىن ارنايى باعدارلاما قابىلداندى. جالعىز بۋراباي مەن زەرەندى توڭىرەگىندە عانا ەمەس, ەلوردانىڭ ماڭىنداعى كورىكتى جەرلەرگە دە قامقورلىق جاسالۋدا. ەلوردا ماڭىنداعى اۋدانداردا 642 ملن تەڭگەنىڭ 5 جوباسى ىسكە اسىرىلۋدا. ونىڭ ىشىندە 20 گلەمپينگ ورناتۋ, اقكول اۋدانىندا «ەكو فەرما» سالۋ, تسەلينوگراد اۋدانىندا «چيستىە پرۋدى» دەمالىس ايماعىنىڭ وندىرىستىك قۋاتىن كەڭەيتۋ جانە جول بويىنداعى قىزمەت نىسانىن سالۋ قولعا الىنۋدا. بۇل جەرلەردە تۋريزم قىزمەتتەرىن ۇسىناتىن اباتتاندىرىلعان دەمالىس ايماقتارىنىڭ جەلىسى جۇمىس ىستەيدى.
وڭىردەگى تۋريزم سالاسىنداعى جاعىمدى جاڭالىقتارمەن جۇرتشىلىقتى تانىستىرۋ وڭ جولعا قويىلعان. ءۇش تىلدە اقپارات تاراتاتىن سايت جۇمىس ىستەيدى. انىقتامالىق-اقپاراتتىق جولسىلتەمەنى, باعالارى مەن بايلانىستارى بار تۋريستىك مارشرۋتتاردى قامتيتىن Visit Aqmola ءموبيلدى قوسىمشاسى بار. الەۋمەتتىك جەلىلەردە كورىكتى ءوڭىردىڭ تارتىمدىلىعىن جان-جاقتى باياندايتىن «زەرتتەلمەگەن اقمولا» جوباسىن ىسكە اسىرۋ جالعاسۋدا. تۋريستەرگە قىزمەت كورسەتۋ ساپاسىن جاقسارتۋ ماقساتىندا تۋعان جەردىڭ تىلسىمىمەن تانىستىراتىن ماماندار قىسقا مەرزىمدى دايارلاۋ كۋرسىندا وقىتىلۋدا.
وسىنداي ورالىمدى شارۋا وڭىنان وڭعارىلىپ جاتقاننان سوڭ وڭىردەگى تۋريزم سالاسى سونى سەرپىنگە يە بولىپ, يگىلىگىن ەسەلەي تۇسەدى دەيتىن ءۇمىت مول.
اقمولا وبلىسى
