اقش-تا ورنالاسقان JCI (Joint Commission International) مەديتسينالىق ۇيىمداردى اككرەديتتەۋ جونىندەگى حالىقارالىق بىرىككەن كوميسسياسى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ قىزمەتىن 23 جانە 27 تامىز ارالىعىندا باعالادى. اككرەديتتەۋ مەديتسينالىق ۇيىمنىڭ باستاماسىمەن جۇزەگە استى.
ء«بىزدىڭ كلينيكا JCI اككرەديتتەۋىنەن ءساتتى وتكەنىن ماقتانىشپەن ايتقىمىز كەلەدى. JCI اككرەديتتەۋى – جوعارى ساپالى مەديتسينالىق كومەك ستاندارتى. JCI اككرەديتتەۋىنە دايىندىق بارىسىندا كلينيكانىڭ ويلاۋ جۇيەسى وزگەرەدى. قىزمەتكەرلەر وندا بولىپ جاتقاننىڭ بارلىعىنا پاتسيەنتتىڭ كوزىمەن قاراي باستايدى, ولار ەمنىڭ بارلىق كەزەڭىن تالدايدى, ىقتيمال قاۋىپتەردى الدىن الا انىقتاپ, ولارمەن كۇرەسەدى», دەيدى عزي باسقارما ءتورايىمى روزا قۋانىشبەكوۆا.
JCI اككرەديتتەۋى – مەديتسينا سالاسىنداعى حالىقارالىق دەڭگەيدەگى «التىن ستاندارت» – مەديتسينالىق ۇيىمداعى قىزمەتتەردىڭ ساپاسى مەن قاۋىپسىزدىگىنىڭ ەڭ بەدەلدى جانە وبەكتيۆتى تانىلۋى. ول ۇيىمنىڭ حالىقارالىق دەڭگەيدە قابىلدانعان مەديتسينالىق جانە اكىمشىلىك ستاندارتتارعا, سونداي-اق حالىقارالىق ماقساتتار مەن پاتسيەنتتەردىڭ قاۋىپسىزدىگىن قامتاماسىز ەتۋ تالاپتارىنا سايكەستىگىن راستايدى.
JCI حالىقارالىق ساراپتامالىق كوميسسياسى جۇرگىزگەن اۋديت كلينيكانىڭ دارىگەرلەرى مەن مەيىرگەرلەرىنىڭ كاسىبي بىلىكتىلىگى جوعارى ەكەنىن راستادى. ۇيىمداعى بارلىق ءبولىم مەن پروتسەس دارىگەردىڭ ەمدەۋى مەن مەيىرگەر كۇتىمىنەن باستاپ, عيماراتتىڭ قاۋىپسىزدىگى, ينفەكتسيالىق باقىلاۋ, ءدارى-دارمەكتەردى قولدانۋ, پاتسيەنتتىڭ قۇقىقتارىن ساقتاۋ, كادرلارمەن قامتاماسىز ەتىلۋىنە دەيىن JCI ستاندارتتارى بويىنشا باعالانادى. كلينيكانىڭ جۇمىسى 200-دەن استام نەگىزگى ستاندارت, 400-گە جۋىق جالپى ستاندارت جانە 1100-دەن استام قوسىمشا كورسەتكىش بويىنشا باعالانادى.
JCI-گە دايىندىق كەزىندە پاتسيەنتتەر قاۋىپسىزدىگىنىڭ حالىقارالىق ماقساتتارىنا مونيتورينگ جاسالدى. جۇيەلى جۇمىستىڭ ناتيجەسىندە كلينيكالىق كورسەتكىشتەر جاقساردى, پاتسيەنتتەردىڭ قاناعاتتانۋى ارتتى, ءولىم-ءجىتىم 2 ەسەدەن استامعا تومەندەدى, قاۋىپتىلىگى جوعارى ءدارى-دارمەكتەرمەن جۇمىس ىستەۋگە ەرەكشە كوڭىل ءبولىندى (ولاردى جەكە ساقتاۋ, تاڭبالاۋ, تىزىمدەر), ءدارى-دارمەكتەردى قولدانۋ جانە مەيىرگەرلىك پروتسەستىڭ تيىمدىلىگى ايتارلىقتاي ءوستى. اككرەديتتەۋ مەيىرگەردىڭ ءرولىن ەداۋىر ارتتىرادى, كوپتەگەن داعدىعا ۇيرەتىپ, كوپ فۋنكتسيا بەرەدى. ينستيتۋت قىزمەتىنىڭ سوڭعى 3 جىلداعى كورسەتكىشتەرى تۇرعىندار اراسىندا مەديتسينالىق كومەكتىڭ بارلىق سپەكترى جوعارى سۇرانىسقا يە ەكەنىن كورسەتتى.
«بۇل كونسۋلتاتسيالىق-دياگنوستيكالىق كومەك, كۇندىزگى ستاتسيونار – كونسەرۆاتيۆتى كارديولوگيا مەن تەراپيا – كارديوحيرۋرگيا مەن وڭالتۋدان باستاپ, حالىققا مەديتسينالىق كومەكتىڭ تولىق تسيكلىنىڭ بولۋىنا بايلانىستى مۇمكىن بولدى», دەپ اتاپ ءوتتى ر.قۋانىشبەكوۆا.
قازاقستاندا JCI حالىقارالىق ستاندارتتارىن ەنگىزۋ مەديتسينالىق ۇيىمدار اراسىنداعى باسەكەلەستىكتى دامىتۋعا جانە سول ارقىلى مەديتسينالىق قىزمەتتىڭ اشىقتىعى مەن ساپاسىن جاقسارتۋعا ىقپال ەتەتىنىن اتاپ وتكەن ءجون.
«ەگەمەن-اقپارات»
