رەسەيدىڭ استاناسىندا ۇيىمداستىرىلعان دودادا قارشىعا داۋىتبەكتىڭ (9-3) اسقان شەبەرلىگىنە ءتانتى بولدىق. 66 كيلو سالماق دارەجەسىندە ونەر كورسەتكەن ول رەسەيلىك ۆالوديا ايۆازيانمەن (10-2) ايقاستى. باسەكەنى قارقىندى باستاپ, وتە جوعارى دەڭگەيدە وتكىزگەن قانداسىمىز ءبىرىنشى راۋندتا قارسىلاسىنىڭ دەنەسىنە اۋىر سوققىسىن دارىتتى. تىنىسى تارىلعان ايۆازيان ەدەنگە ەكى بۇكتەتىلىپ قۇلادى. تورەشى دەرەۋ جەكپە-جەكتى توقتاتتى.
وكىنىشكە قاراي, وزگە ەكى سپورتشىمىز ماسكەۋ تورىندە ويسىراي ۇتىلدى. جارتىلاي جەڭىل سالماقتاعى نۇرسۇلتان قاسىمحانوۆ (11-3) حاباروۆسكىلىك الەكسەي پولپۋدنيكوۆپەن (29-8-1) ايقاستى. ءدال وسى سپورتشى كەزىندە ارمان وسپانوۆپەن ءۇش مارتە كەزدەسىپ, ەكى رەت سان سوقتىرىپ كەتكەن ەدى. بىلتىر پولپۋدنيكوۆ ءۇش رەت وكتاگونعا شىعىپ, ءۇش كەزدەسۋدە دە جەڭىلىس تاپتى. بىراق بۇل جارىسقا قيىر شىعىستىڭ «گلادياتورى» جاقسى بابىندا كەلگەن ەكەن. باسەكەنىڭ باستالعانىنا 15 سەكۋند وتپەي جاتىپ, ول قاسىمحانوۆتى سۇلاتىپ سالدى.
جارتىلاي اۋىر سالماقتاعى اسىلجان باقىتجان ۇلى (11-2) برازيليانىڭ ساڭلاعى لەوناردو سيلۆامەن (17-5) كۇش سىناستى. «كەسكىلەسكەن شايقاس» ءبىرىنشى راۋندتان باستالدى. ەكەۋى دە شەگىنبەي ايقاسىپ, ءبىر-ءبىرىن اۋىر سوققىلاردىڭ استىنا الدى. ءساتى كەلگەندە اسىلجان قارسىلاسىن جىعىپ الىپ, تومپەشتەي باستادى. جانى قينالسا دا, لەوناردو راۋندتىڭ سوڭىنا دەيىن شىدادى. ۇزىلىستەن كەيىن جان الىسىپ, جان بەرىسكەن ايقاس قايتا جالعاستى. باقىتجان ۇلى بارىن سالعانىمەن, برازيليالىقتىڭ جۇدىرىعى نىساناعا ءدوپ تيە باستادى. ءبىر مەزەتتە سيلۆانىڭ تومەننەن سىلتەگەن سوققىسى, ياعني اپپەركوتى قانداسىمىزدىڭ يەگىنە ءدال ءتيدى. اسىلجان تالتىرەكتەپ بارىپ قۇلادى. تورەشى باسەكەنى توقتاتقانشا لەوناردو تاعى ءبىر سوققى جۇمساپ ۇلگەردى. نوكاۋت!
رەسەيدىڭ سوچي قالاسىنداعى AMC Fight Nights تۋرنيرىندە قازاقتىڭ قوس سپورتشىسى ءوز ونەرىن ورتاعا سالدى. بىراق ەكەۋى دە جەرگىلىكتى سپورتشىلارعا ەسە جىبەردى. نۇربەك قابدراحمانوۆ (3-1) ماگومەد كاديەۆتەن (4-1) ۇپاي سانىمەن ۇتىلسا, ايتۋلى جارىستىڭ باستى جەكپە-جەگىندە قۋات حاميتوۆ (21-6-1) ماريف پيراەۆقا (27-4-1) جول بەردى. جالپى, ءۇش راۋندقا سوزىلعان بۇل باسەكەدە قوس تاراپتىڭ ونەرى كوپشىلىك كوڭىلىنەن شىقپادى. ءۇش راۋندقا سوزىلعان ايقاس بارىسىندا قۋات تا, ماريف تە نە ءبىر جاقسى كۇرەستىڭ ءادىسىن, نە ءبىر اۋىر سوققى جاساي المادى. ءبىر سوزبەن ايتساق, بۇل جەكپە-جەكتەن اسەر الارلىقتاي, نە ەستە قالارلىقتاي ەشتەڭە كورە المادىق.
