6 ايدىڭ قورىتىندىسى بويىنشا تازا تابىس 809 ملرد تەڭگەنى قۇرادى. بۇل وتكەن جىلدىڭ سايكەس مەرزىمىمەن سالىستىرعاندا 3,5 ەسەگە ارتىق. ال جوسپار بويىنشا تازا تابىس 217 ملرد تەڭگە بولادى دەپ بولجانعان. بۇل تۋرالى بريفينگتە «سامۇرىق-قازىنا» قورىنىڭ ەكونوميكا جانە قارجى جونىندەگى باسقارۋشى ديرەكتورى ءنازيرا نۇرباەۆا مالىمدەدى.
كومپانيالار توبىنىڭ وپەراتسيالىق كىرىسى 2021 جىلدىڭ قاڭتار-ماۋسىم ارالىعىندا 817 ملرد تەڭگەنى قۇرادى. بۇل جوسپارلى مەجەدەن 456 ملرد تەڭگەگە ارتىق.
الدىن الا باعالاۋ بويىنشا 2021 جىلدىڭ قورىتىندىسى بويىنشا جيىنتىق تازا تابىس 1,195 ملرد تەڭگە بولادى دەپ بولجانۋدا. ياعني پاندەمياعا دەيىنگى 2019 جىلدىڭ كورسەتكىشتەرىنە جۋىق جانە 2020 جىلدىڭ ناتيجەلەرىنەن ەكى ەسە ارتىق.
قارجىلىق كورسەتكىشتەردىڭ وڭالۋىنا مۇناي باعاسىنىڭ ورتاشا ەسەپپەن باررەلىنە 67 دوللارعا دەيىن ءوسۋى, مۇناي وڭدەۋ كولەمىنىڭ 13%-عا ۇلعايۋى, ەلەكترقۋاتىن ءوندىرۋ مەن تاسىمالداۋ كولەمىنىڭ 22% جانە 20%-عا ارتۋى, جۇك تاسىمالىنىڭ 3% ارتا ءتۇسۋى جانە كونتەينەرلىك ءترانزيتتىڭ 32%-عا ۇلعايۋى ىقپالىن تيگىزگەن.
بيىل جولاۋشىلار تاسىمالىندا دا كورسەتكىشتەردىڭ جاقسارىپ كەلە جاتقانى بايقالىپ وتىر. تەمىر جولمەن جولاۋشىلار تاسىمالداۋ 46% ارتا ءتۇستى. AirAstana مەن Qazaq Air 8 ايدىڭ قورىتىندىسى بويىنشا بىلتىرعى جىلدىڭ سايكەس مەرزىمىمەن سالىستىرعاندا 2 ەسە كوپ جولاۋشى تاسىمالدادى.
«جاقسارىپ كەلە جاتقان قارجىلىق كورسەتكىشتەردى جانە تۇراقتى ماكروەكونوميكالىق بولجامداردى ەسكەرە وتىرىپ, قور شىعىنداردى وڭتايلاندىرۋ شارالارىن ىسكە اسىرۋدى جالعاستىرادى. جىلدىڭ قورىتىندىسى بويىنشا جالپى جانە اكىمشىلىك شىعىنداردان شامامەن 10 ملرد تەڭگە ۇنەمدەلەدى. بۇدان بولەك, بيىل كومپانيالار توبىندا مەرزىمى ءوتىپ كەتكەن دەبيتورلىق قارىزدى 8,5 ملرد تەڭگەگە دەيىن قىسقارتۋ جونىندەگى جۇمىس جۇرگىزىلدى», دەدى ءنازيرا نۇرباەۆا.
ءبىرىنشى جارتى جىلدىقتىڭ قورىتىندىسى بويىنشا قور توبىنا كىرەتىن كومپانيالاردا قارجىلىق تۇراقتىلىق بويىنشا كورسەتكىشتەردىڭ ايتارلىقتاي جاقسارۋى بايقالىپ وتىر. قارىز/EBITDA كورسەتكىشى 2020 جىلمەن سالىستىرعاندا توپتىڭ EBITDA كورسەتكىشىن 737 ملرد تەڭگەگە جاقسارۋى ارقاسىندا 3,6-دان 2,8-گە دەيىن ازايدى. بۇل كورسەتكىش 2,7-گە دەيىن قىسقارادى دەپ بولجانىپ وتىر. بۇل كومپانيالار توبىنىڭ قارجىلىق تۇراقتىلىعىن ايعاقتايدى.
قوردىڭ جالپى قارىزى 2%-عا ارتتى. نەگىزىنەن تەڭگە باعامىنىڭ السىرەۋى جانە توپتىڭ ينۆەستيتسيالىق جوبالارىن ىسكە اسىرۋعا الىنعان نەسيەلەر ەسەبىنەن. جالپى, قارىز پورتفەلىنىڭ تەپە-تەڭدىگى ساقتالىپ, قور كورسەتكىشتەرىنە ۆاليۋتا باعامدارىنىڭ وزگەرۋى ايتارلىقتاي اسەرىن تيگىزگەن جوق.
سپيكەردىڭ ايتۋىنشا, كۇردەلى ەكونوميكالىق احۋالعا قاراماستان, قور كومپانيالارى قارجىلىق تۇراقتىلىقتى نىعايتۋ شارالارىن توقتاتقان ەمەس. بيىل «قازمۇنايگاز» ۇك» اق جانە «قازترانسگاز» اق ەۋرووبليگاتسيا شىعارۋ شارتتارىن جاقسارتۋعا قول جەتكىزدى. كومپانيالار توبى قولدانىستاعى نەسيەلەردى قايتا قارجىلاندىرۋ جانە قارىز الۋ باعاسىن ارزانداتۋ شارالارىن جالعاستىراتىن بولادى.
بيىلعى ماڭىزدى وقيعالاردىڭ ءبىرى – «سامۇرىق-قازىنا» قورىنىڭ ۇزاق مەرزىمدى جانە قىسقا مەرزىمدى رەيتينگتەرىن حالىقارالىق Standard&Poors رەيتينگ اگەنتتىگىمەن جوعارىلاتۋى بولدى. شەتەل جانە ۇلتتىق ۆاليۋتاداعى مىندەتتەمەلەر بويىنشا «ۆۆۆ-» دەڭگەيىنە دەيىن جوعارىلاپ, بولجام – «تۇراقتى» بولىپ بەلگىلەندى.
«بۇگىن Moody’s رەيتينگ اگەنتتىگى قوردىڭ بۇقاراعا ارنالعان رەيتينگىن جاريالاۋى ءتيىس. ەلىمىزدىڭ ەگەمەن رەيتينگىسىنىڭ ۇلعايۋىمەن قاتار قوردىڭ رەيتينگى دە ۆاا2 دەڭگەيىنە دەيىن كوتەرىلەدى, بولجام – «تۇراقتى» بولادى دەپ كۇتىلۋدە», دەدى ءنازيرا نۇرباەۆا.
