ساياسات • 24 قىركۇيەك، 2021

بەيجىڭدە قازاقستان تاۋەلسىزدىگىنىڭ 30 جىلدىعىنا ارنالعان كونفەرەنتسيا ءوتتى

52 رەت كورسەتىلدى

قازاقستاننىڭ قىتايداعى ەلشىلىگى قىتاي قوعامدىق عىلىمدار اكادەمياسىمەن (ققعا) بىرلەسىپ «قازاقستان رەسپۋبليكاسى تاۋەلسىزدىگىنىڭ 30 جىلدىعى جانە قازاقستان مەن قىتاي اراسىنداعى ماڭگىلىك جان-جاقتى ستراتەگيالىق سەرىكتەستىك» تاقىرىبىندا حالىقارالىق عىلىمي-پراكتيكالىق ونلاين-كونفەرەنتسيا ۇيىمداستىردى، دەپ جازادى Egemen.kz.

كونفەرەنتسيانى اشقان قر سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ ءىس-شاراعا قاتىسۋشىلاردى قازاقستاننىڭ تاۋەلسىز مەملەكەت رەتىندەگى قالىپتاسۋى مەن دامۋىنىڭ نەگىزگى كەزەڭدەرىمەن  تانىستىردى.

«نۇر-سۇلتان مەن بەيجىڭ بۇۇ، شىۇ جانە اوسشك سەكىلدى كوپجاقتى قۇرىلىمدار اياسىندا ءتيىمدى ىقپالداستىق ورناتقان. 2013 جىلى قحر توراعاسى سي ءتسزينپيننىڭ ء«بىر بەلدەۋ، ءبىر جول» باستاماسىن قازاقستان ءبىرىنشى بولىپ قولدادى. «قورعاس» شىحو، ليانيۋنگان تەڭىز پورتى، «باتىس ەۋروپا – باتىس قىتاي» حالىقارالىق كولىك ءدالىزىن قامتيتىن قحر-مەن بىرلەسە دامىتىپ كەلە جاتقان ءتيىستى ينفراقۇرىلىم قازاقستاننىڭ ترانزيتتىك-كولىكتىك الەۋەتىنىڭ ارتىقشىلىعىن جۇزەگە اسىرۋدا ماڭىزدى ءرول وينايدى»، دەپ جازادى قر ءسىم ءباسپاسوز قىزمەتى.

ديپلومات اتاپ وتكەندەي، اتالعان سالاداعى بىرلەسكەن باستامالاردى ارى قاراي ىلگەرىلەتۋ ءۇشىن پاندەميا سالدارىنان شەكتەلگەن ەكى مەملەكەت اراسىنداعى ازاماتتار ساپارىە جانە تۇراقتى تاۋار تاسىمالىن تەزىرەك قالپىنا كەلتىرۋ ماڭىزدى.

«سونىمەن قاتار پاندەميامەن كۇرەستەگى ىنتىماقتاستىق ءوزارا قولداۋدىڭ مىسالى بولىپ تابىلادى»، دەدى ش. نۇرىشەۆ.

وسى ورايدا ول قازاقستان العاشقىلاردىڭ ءبىرى بولىپ ۋحان قالاسىنىڭ تۇرعىندارىنا گۋمانيتارلىق كومەك جىبەرگەنىن، ال قىتاي ءوز كەزەگىندە بىرنەشە ايدان كەيىن قازاقستانعا دا كەرەك كەزدە گۋمانيتارلىق كومەك جانە دارىگەر جىبەرگەنىن ەسكە الدى.

وتاندىق ديپلوماتتىڭ ايتۋىنشا، مۇنىڭ ءبارى 30 جىل ىشىندە قازاقستان مەن قىتاي ءبىر-بىرىنە تەك جاقسى كورشى عانا ەمەس، سەنىمدى سەرىكتەسكە اينالعانىن اڭعارتادى.

ءوز كەزەگىندە، قحر ۇكىمەتىنىڭ ەۋرازيا ىستەرى جونىندەگى ارنايى وكىلى لي حۋەي قىتاي مەن قازاقستان اراسىنداعى ماڭگىلىك جان-جاقتى ستراتەگيالىق سەرىكتەستىكتىڭ مازمۇندى سيپاتىنا جوعارى باعا بەردى. ونىڭ ايتۋىنشا، بۇگىندە ولاردىڭ اراسىنداعى شەكارا ەكى ەلدى بىرىكتىرەتىن وزىندىك «دوستىق پەن تاتۋ كورشىلىك كوپىرى» بولىپ وتىر.

كونفەرەنتسياعا قاتىسۋشىلار قازاقستاننىڭ تاۋەلسىزدىك جىلدارىنداعى ساياسي جانە الەۋمەتتىك-ەكونوميكالىق جەتىستىگى مەن ەكى ەل اراسىنداعى ىنتىماقتاستىقتىڭ وزەكتى مالەسەلەرى بويىنشا بايانداما وقىدى. قىتايلىق ساراپشىلار قازاقستاننىڭ حالىقارالىق الاڭداعى تابىسى مەن ونىڭ قازىرگى زامانعى وڭىرلىك جانە جاھاندىق ماسەلەلەردى شەشۋگە بەلسەندى قاتىسۋىن جوعارى باعالادى.

سونىمەن قاتار ءىس-شارا بارىسىندا قازاقستان مەن قىتاي اراسىنداعى ساياسي، ساۋدا-ەكونوميكالىق، مادەني-گۋمانيتارلىق ىنتىماقتاستىقتىڭ اعىمداعى جاعدايى جانە دامۋ پەرسپەكتيۆالارى تالقىلاندى.

كەزدەسۋ سوڭىندا كونفەرەنتسياعا قاتىسۋشىلار قازاقستاندىقتاردى تاۋەلسىزدىكتىڭ مەرەيتويىمەن قۇتتىقتاپ، ودان ءارى وركەندەۋ مەن جاڭا تابىستار تىلەدى.

كونفەرەنتسيادا وتاندىق تاراپتان قر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ، قر تۇڭعىش پرەزيدەنتى – ەلباسى كىتاپحاناسىنىڭ، قر ءسىم جانىنداعى سىرتقى ساياسي زەرتتەۋلەر ينستيتۋتىنىڭ، قىتايدى زەرتتەۋ ورتالىعىنىڭ، نۇرسۇلتان نازارباەۆ قورى جانىنداعى الەمدىك ەكونوميكا جانە ساياسات ينستيتۋتىنىڭ باسشىلىعى، قىتاي تاراپىنان – ققعا، قىتايدىڭ حالىقارالىق پروبلەمالار اكادەمياسى جانە قىتايدىڭ زاماناۋي حالىقارالىق قاتىناستار اكادەمياسىنىڭ باسشىلىعى ءسوز سويلەدى.

سوڭعى جاڭالىقتار

جانى جايساڭ جاز-اتا

قوعام • كەشە

دۇبىردەن تۋعان ولەڭ

ادەبيەت • كەشە

ۇقساس جاڭالىقتار