ماڭعىستاۋ وبلىسىنىڭ بەينەۋ اۋدانىن شاڭدى داۋىل باستى. تابيعاتتىڭ توسىن مىنەزىنەن وقۋشىلاردىڭ ساباعى ونلاين بولدى, ال جۇرگىزۋشىلەرگە جولدا ساق بولۋ كەرەكتىگى ەسكەرتىلدى.
بۇل تۋرالى اۋدان اكىمدىگىنىڭ رەسمي سايتى حابارلادى.
اۋا رايىنىڭ كۇرت ناشارلاۋى سالدارىنان كۇندىزگى اۋىسىمدا وقيتىن 8451 وقۋشى مەكتەپكە بارا المادى.
«مەكتەپ وقۋشىلارىنىڭ ساباعى ونلاين فورماتقا اۋىستىرىلدى. وقۋشىلاردىڭ ۇيدەن شىقپاۋىن قاداعالاۋىڭىزدى سۇرايمىز. قولايسىز اۋا رايىنا بايلانىستى اۋدان اۋماعى ارقىلى وتەتىن رەسپۋبليكالىق ماڭىزى بار اۆتوجولداردا پوليتسيا ەكيپاجى كۇشەيتىلگەن جۇمىس رەجيمىنە اۋىستى», دەدى بەينەۋ اۋدانىنىڭ اكىمدىگى.
