مەديتسينا • 24 قىركۇيەك، 2021

حالىقارالىق ساراپشىلار دەنساۋلىق ساقتاۋ جۇيەسىن تالقىلادى

54 رەت كورسەتىلدى

ساليدات قايىربەكوۆا اتىنداعى ۇلتتىق عىلىمي دەنساۋلىق ساقتاۋدى دامىتۋ ورتالىعى (ۇعدسدو) «قازاقستاننىڭ دەنساۋلىق ساقتاۋ سالاسى: سىن-تەگەۋرىندەر، مۇمكىندىكتەر، بولاشاققا باعدار» اتتى حالىقارالىق ونلاين-كونفەرەنتسياسىن وتكىزدى، دەپ جازادى Egemen.kz.

«كونفەرەنتسيا ۇعدسدو اتاۋىنىڭ وزگەرۋى مەن ەلىمىزدىڭ كورنەكتى ساياسي قايراتكەرى، مەديتسينا عىلىمدارىنىڭ دوكتورى، العاشقى ايەل دەنساۋلىق ساقتاۋ ءمينيسترى ساليدات قايىربەكوۆانىڭ ەسىمىنىڭ بەرىلۋىنە ورايلاستىرىلعان. سونداي-اق، ءىس-شارا قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارنالدى»، دەپ جازىلعان ۇيىمنىڭ ءباسپاسوز حابارلاماسىندا.

شارادا دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ)، بۇۇ بالالار قورىنىڭ (يۋنيسەف)، بۇۇ حالىق قونىستانۋى سالاسىنداعى قورىنىڭ (يۋنفپا)، حالىقارالىق جانە شەتەلدىك ۇيىمداردىڭ، قر دەنساۋلىق ساقتاۋ مينيسترلىگىنىڭ، ۆەدومستۆولىق باعىنىستى ۇيىمداردىڭ، جەرگىلىكتى اتقارۋشى ورگانداردىڭ، «اتامەكەن» قر ۇكپ وكىلدەرى جانە عىلىمي-اكادەميالىق ورتانىڭ وكىلدەرى ءسوز سويلەدى.

1

كونفەرەنتسيانىڭ پلەنارلىق وتىرىسىن اشقان قر دەنساۋلىق ساقتاۋ ءمينيسترى الەكسەي تسوي ەلىمىزدىڭ دەنساۋلىق ساقتاۋ جۇيەسى كۆي پاندەمياسىنا بايلانىستى تۋىنداعان سىن-قاتەرلەرگە ەكىنشى جىل قارسى تۇرىپ جاتقانىن اتاپ ءوتتى.  

«كۆي بويىنشا الەمدەگى جانە ەلدەگى كۇردەلى ەپيدەميولوگيالىق جاعداي سانيتارلىق-ەپيدەميولوگيالىق قىزمەتتەگى بىرقاتار پروبلەمانى انىقتادى. بۇل، ەڭ الدىمەن، جۇقپالى اۋرۋلاردىڭ الدىن الۋ، باقىلاۋ جانە ارەكەت ەتۋدە انىق بايقالدى. كوروناۆيرۋستىق ينفەكتسيا پاندەمياسى دەنساۋلىق ساقتاۋ جۇيەسىن تسيفرلاندىرۋدى دامىتۋ كەرەك ەكەنىن دە ايقىن كورسەتتى. وسى جانە باسقا دا پروبلەمانىڭ بارلىعى سالا دەڭگەيىندە دە، ۇلتتىق دەڭگەيدە دە ءتيىمدى شەشىم قابىلداۋدى تالاپ ەتەدى. وسىعان بايلانىستى كونفەرەنتسيا ۇلتتىق جۇيەنى دامىتۋداعى بارلىق ماسەلەنى تالقىلاۋ جانە شەشۋ الاڭىنا اينالادى دەپ ويلايمىن»، دەدى ا.تسوي.

كونفەرەنتسيانىڭ اشىلۋىندا قر پرەمەر-ءمينيسترىنىڭ ورىنباسارى ەرالى توعجانوۆتىڭ ۇندەۋى وقىلدى.

«دەنساۋلىق ساقتاۋدىڭ قازىرگى زامانعى، قولجەتىمدى جانە ءتيىمدى جۇيەسىن قۇرۋ ەلباسىنىڭ  «قازاقستان-2050» ستراتەگياسىندا ايتىلعان ۇزاق مەرزىمدى ساياسي باعىتتىڭ ءبىرىنشى كەزەكتەگى ماقساتى، سونداي-اق قازاقستان رەسپۋبليكاسىنىڭ 2025 جىلعا دەيىنگى دامۋىنىڭ ءتۇيىندى جالپىۇلتتىق باسىمدىقتارىنىڭ قاتارىنا جاتادى. بۇكىل الەم جانە ءبىزدىڭ ەل كوروناۆيرۋستىق پاندەميا كەزەڭىندە ۇلتتىق دەنساۋلىق ساقتاۋ جۇيەلەرىنىڭ مەملەكەتتىڭ تۇراقتى دامۋىن قامتاماسىز ەتۋدەگى ءرولىنىڭ ماڭىزدىلىعىن  دالەلدەدى»، دەلىنگەن ماتىندە.

سونىمەن قاتار ەرالى توعجانوۆ دارىگەرلەر مەن مەدبيكەلەردىڭ، سانيتارلىق-ەپيدەميولوگيالىق قىزمەت ماماندارىنىڭ كوروناۆيرۋسپەن كۇرەستەگى قاجىرلى ەڭبەگىن جوعارى باعالادى.

«ۇلتتىق دەنساۋلىق ساقتاۋ جۇيەسىنىڭ بولاشاعىنا كوز جۇگىرتسەك، ءبىز ونىڭ  حالىقتىڭ دەنساۋلىعىنا ءتونىپ تۇرعان جانە جاڭا قاۋىپ-قاتەرلەرگە توتەپ بەرۋگە، COVID-19 جاڭا تولقىنىمەن كۇرەسۋ ءۇشىن بارلىق مۇمكىندىكتەردى پايدالانۋعا جانە سونىمەن بىرگە نەگىزگى مەديتسينالىق قىزمەتتەردى ۇسىنۋعا تۇراقتى دايىندىعىن قامتاماسىز ەتۋىمىز كەرەك»، دەيدى ەرالى توعجانوۆ.

كونفەرەنتسيا جۇمىسىنا قاتىسقان شەتەلدىك ارىپتەستەر – ددسۇ ەۋروپالىق ايماعىنىڭ ايماقتىق ديرەكتورى حانس كليۋگە، ۇيىمنىڭ قازاقستانداعى ەلدىك كەڭسەسىنىڭ جەتەكشىسى كەرولاين كلارينۆال، العاشقى مەديتسينالىق-سانيتارلىق كومەك كورسەتۋ جونىندەگى گەوگرافيالىق جاعىنان قاشىق ورنالاسقان كەڭسەسىنىڭ (گقو) باسشىسى مەليتا ياكاب ۇلتتىق عىلىمي دەنساۋلىق ساقتاۋدى دامىتۋ ورتالىعىنىڭ ساليدات قايىربەكوۆانىڭ اتىمەن اتالۋىمەن قۇتتىقتاپ، جىلى لەبىزىن ءبىلدىردى.

كونفەرەنتسيا بارىسىندا ساليدات زەكەنقىزىنىڭ ەڭبەك جولى، سالادا اتقارعان قىزمەتى تۋرالى بەينەروليك كورسەتىلدى. وندا ارىپتەستەر س.قايىربەكوۆانىڭ دەنساۋلىق ساقتاۋ جۇيەسىن دامىتۋعا، مەديتسينا قىزمەتتەرىنىڭ ساپاسىن ارتتىرۋعا، مەديتسينالىق ۇيىمداردى اككرەديتتەۋگە، ليتسەنزيالاۋعا جانە باسقا دا وڭ وزگەرىستەرگە قوسقان باعا جەتپەس ۇلەسىن ەسكە الدى.

قر دەنساۋلىق ساقتاۋ ءبىرىنشى ۆيتسە-ءمينيسترى مارات شورانوۆ كونفەرەنتسيادا 4 باعىتتان، 9 مىندەت، 22 كورسەتكىش جانە 74 ءىس-شارانى قامتيتىن 2021-2025 جىلدارعا ارنالعان ء«ار ازامات ءۇشىن ساپالى جانە قولجەتىمدى دەنساۋلىق ساقتاۋ «دەنى ساۋ ۇلت» ۇلتتىق جوباسىنا توقتالدى. سپيكەرلەر ۇلتتىق جوبا بويىنشا قر دەنساۋلىق ساقتاۋ جۇيەسىن دامىتۋدىڭ قازىرگى سىن-تەگەۋرىندەرى مەن مۇمكىندىگى تۋرالى ويىن ءبولىستى.

ۇعدسدو باسقارما توراعاسى كامالجان نادىروۆ ورتالىقتىڭ ەلىمىزدىڭ دەنساۋلىق ساقتاۋ جۇيەسىن دامىتۋداعى ءرولىن اتاپ ءوتتى، سونداي-اق نەگىزگى جانە جاڭا باعىتتارعا توقتالدى. 

«جاڭا مارتەبە ۇلكەن جاۋاپكەرشىلىك جۇكتەيدى. ءبىز العا عىلىمي زەرتتەۋلەردى جۇرگىزۋ تۋرالى جاڭا باعىت قويىپ وتىرمىز. بۇدان باسقا، ۇيىم قۇرىلىمىندا قازىردىڭ وزىندە العاشقى مەديتسينالىق-سانيتاريالىق كومەكتى دامىتۋ ورتالىعى (مساك)، ۇلتتىق جوبالاردى ىسكە اسىرۋ جونىندەگى جوبالىق كەڭسە قۇرىلدى. اتالعان ورتالىق قىزمەتىنىڭ باسىم باعىتتارى – مساك ۇيىمدارىن جابدىقتاۋ جانە ينفراقۇرىلىمىن دامىتۋ، ۇزدىك تاجىريبە ورتالىقتارىن، مساك كادرلىق الەۋەتىن دامىتۋ، تسيفرلاندىرۋ، قارجىلاندىرۋ مەن نورماتيۆتىك اكتىلەردى جەتىلدىرۋ، ءدارى-دارمەكپەن قامتاماسىز ەتۋدى تالداۋ»، دەدى ك.نادىروۆ.

جالپى كونفەرەنتسيادا التى 6 باعىت بويىنشا 36 بايانداما وقىلدى.

شارادا قولجەتىمدى جانە ساپالى مەديتسينالىق كومەك، دەنساۋلىق ساقتاۋداعى ادامي رەسۋرستاردى دامىتۋ، ەپيدەميولوگيالىق بولجاۋ مەن دەن قويۋدىڭ زاماناۋي جۇيەسىن قالىپتاستىرۋ، قولجەتىمدى دارىلىك زاتتار مەن مەديتسينالىق بۇيىمدار، سالاۋاتتى ءومىر سالتىن ۇستاناتىن جانە بۇقارالىق سپورتتى دامىتاتىن تۇرعىندار ۇلەسىن ارتتىرۋ، مەديتسينالىق كومەكتى قارجىلاندىرۋ تيىمدىلىگىن ارتتىرۋ تاقىرىپتارى تالقىعا ءتۇستى.

حالىقارالىق ونلاين-كونفەرەنتسيا سوڭىندا بارلىق 6 پاراللەل سەسسيانىڭ جۇمىسى قورىتىندىلاندى. ساليدات قايىربەكوۆا اتىنداعى ۇعدسدو باسقارما توراعاسى كامالجان نادىروۆ حالىقارالىق جانە قازاقستاندىق ساراپشىلارعا العىس ءبىلدىرىپ، ۇلتتىق دەنساۋلىق ساقتاۋ جۇيەسىن دامىتۋدا ودان ارعى قادامدارىن بەلگىلەۋدە جۇيەلى ءتاسىل مەن اشىق تالقىلاۋدىڭ ماڭىزدىلىعىن، سونداي-اق دەنساۋلىق ساقتاۋ سالاسىندا الدىڭعى قاتارلى عىلىمي جانە ناقتى دەرەكتەر نەگىزىندە ساياساتتى قالىپتاستىرۋ قاجەت ەكەنىن اتاپ ءوتتى.

1

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار