تابيعاتتى قورعاۋ زاڭناماسى سالاسىنداعى قۇقىق بۇزۋشىلىقتار مەن قىلمىستاردىڭ الدىن الۋ جانە جولىن كەسۋ, ونىڭ ىشىندە براكونەرلىك, تابيعي رەسۋرستاردى زاڭسىز اۋلاۋ جانە باسقا دا قۇقىق بۇزۋشىلىقتاردى انىقتاۋ ماقساتىندا وتىرار اۋدانىنىڭ پب قىزمەتكەرلەرى تۇراقتى تۇردە رەيدتىك جۇمىستاردى جۇرگىزىپ تۇرادى. وسىنداي شارا بارىسىندا ءتارتىپ ساقشىلارى كۇندىزگى ساعات 10:15 شاماسىندا وتىرار اۋدانى كوكساراي اۋىلىنا قاراستى قورعالاتىن اۋماقتان ءبىر دانا قابان جانۋارىن زاڭسىز اتىپ العان ەر ازاماتتى انىقتادى.
اتالعان دەرەك قك 337-بابى, ياعني (زاڭسىز اڭشىلىق) قىلمىستىق قۇقىق بۇزۋشىلىعى بويىنشا تىركەلدى. كۇدىكتى ازاماتتان ايعاقتى زات رەتىندە اڭشى مىلتىعى مەن قابان ۇشاسى (ەتى) الىندى. قازىرگى تاڭدا سوتقا دەيىنگى تەرگەۋ امالدارى جۇرگىزىلۋدە.
ءوز كەزەگىندە تۇركىستان وبلىسىنىڭ پوليتسيا قىزمەتكەرلەرى تۇرعىندارعا تابيعاتتى قورعاۋ زاڭناماسىن بۇزۋعا جول بەرمەۋدى جانە تابيعي رەسۋرستاردى زاڭسىز ءوندىرۋ جاعدايىندا اكىمشىلىك جانە قىلمىستىق جاۋاپكەرشىلىككە تارتۋ تۋرالى ەسكەرتەدى. ەگەر دە, ءسىز, وسىنداي جايتتىڭ قۇربانى نەمەسە كۋاسى بولساڭىز بىردەن «102» نومىرىنە حابارلاسىڭىز.
