كاسىپكەر قولداۋعا يە

كەشە ورتالىق كوممۋنيكاتسيالار قىزمەتىندە ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ بريفينگ وتكىزدى. ول مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىنا وراي كاسىپكەرلەر پالاتاسىنىڭ 2014 جىلعا ارنالعان مىندەتتەرى جونىندە اڭگىمەلەدى. ەلباسى جولداۋىندا مەملەكەت جۇمىسىنىڭ نەگىزگى بولىگى قازاقستان بيزنەسىن, اسىرەسە, شاعىن جانە ورتا كاسىپكەرلىكتى دامىتۋعا بارىنشا قولايلى جاعداي جاساۋ بولاتىنىن ايرىقشا اتاپ ءوتتى. ءسويتىپ, ۇكىمەتكە ۇلتتىق كا­سىپ­كەر­لەر پالاتاسىمەن بىرلەسىپ, جۇمىسىن جاڭا باستاعان بيزنەسمەندەرگە ادىستەمەلىك كومەك­تىڭ ءتيىمدى تەتىكتەرىن جاساۋدى تاپ­سىردى, دەپ باستادى ءسوزىن ا.مىرزاحمەتوۆ. مەملەكەت باس­شىسىنىڭ وسى تاپسىرماسىنا­ وراي اتقارىلىپ جاتقان شارۋا­لاردى سارالاعان پالاتا توراعاسى, بيزنەسپەن شۇعىلدانامىن دەگەن ادامعا ادىستەمەلىك كومەكپەن قاتار, قارجىلاي دەمەۋ شارالارىنىڭ ءتۇرلى ءتيىمدى مەحانيزمدەرى قاراس­تى­رىلىپ جاتقانىن العا تارتتى. ۇلتتىق پالاتا شاعىن جانە ورتا بيزنەستى دامىتۋ مەن قولداۋدا تۋىنداپ وتىرعان ماسەلەلەردى تۇپكىلىكتى شەشۋگە­ بەل بۋىپتى. ءتور­اعانىڭ ايتۋىنا­ قاراعاندا, شاعىن جانە ورتا كاسىپكەرلىكتىڭ ءيىن كوتەرىپ, ەركىن دامىپ كەتۋىنە كەدەرگى بولىپ وتىرعان كولەمدى پروبلەمالار توپتاماسى بار كورىنەدى. بىرىنشىدەن, اكىمشىلىك كەدەرگىلەر. وسىعان بايلانىستى ۇلتتىق پالاتا بىرقاتار كۇردەلى ماسەلەلەرگە جۇيەلى تالداۋ جاساپ, ولاردىڭ ءتيىمدى شەشىمىن تابۋعا مۇمكىندىك بەرەتىن تاسىلدەر ءتىزىلىمىن قۇرۋ جۇمىسىمەن اينالىسىپ جاتىر ەكەن. ماسەلەنىڭ شەشىمىن تاباتىن تاسىلدەر ءتىزىلىمى قۇرىلىپ بولعان سوڭ, كاسىپكەرلەردىڭ جەكە پروبلەمالارىنا تالداۋ جاساي وتىرىپ, نورماتيۆتىك جانە زاڭنامالىق بازادا وزگەرتۋلەردى تالاپ ەتەتىن ناقتى شارالاردى انىقتاماق. ءسويتىپ, بيزنەستىڭ ەركىن تىنىستاۋىنا جول اشپاق. مۇنىمەن قاتار, ا.مىرزاحمەتوۆ كاسىپكەرلەردىڭ بيزنەسكە سالاتىن قاراجاتقا قولجەتىمدىلىگى ماسەلەسىنە دە ايرىقشا توقتالدى. قاجەتتى قاراجاتتى الۋ مەن ونى ءتيىمدى پايدالانۋ ءۇشىن ءار وبلىس, اۋدان ورتالىقتارىندا كەڭەس بەرەتىن ورتالىقتار جۇمىس ىستەي باستايتىنىن تىلگە تيەك ەتتى. ول ۇكىمەت ۇسىنىپ وتىرعان تابىستى كاسىپكەرلەر تۋرالى روليكتەر اينالدىرۋ شاراسىن تولىق قولدامايتىنىن ءبىلدىردى. ونىڭ ويىنشا, اۋىلدى جەردەگى قاراپايىم ادامدارعا تەلەديداردا اينالدىرىلعان روليكتەر قاتتى اسەر ەتە قويمايدى. سوندىقتان اۋدان ورتالىقتارىندا بيزنەسىن اشىپ, ونى دامىتۋعا ارنالعان كەڭەس-سەمينارلاردى ءجيى ۇيىم­داس­تىرىپ, ءار قالاۋشىنى كاسىپكە قولىنان جەتەلەگەندەي ەتىپ الىپ كەلگەن الدەقايدا ءتيىمدى ەكەن. وڭىرلىك پالاتالاردىڭ قىز­مەتىنە سۇرانىس بار كورىنەدى. اسىرەسە, وڭىرلىك كاسىپكەرلەردىڭ قۇقىعىن قورعاۋ ىسىنە سۇرانىس كوپ تۇسە باستاعان. وسىعان دەيىن كاسىپكەرلەردىڭ تۇيتكىلدى ماسەلەلەرىنە ارنالعان ءۇش بىردەي وتىرىس وتكىزىلىپتى. ءدال قازىرگى ۋاقىتتا كاسىپكەرلەردىڭ قۇقىن قورعاۋ جونىندەگى كەڭەس جۇمىس ىستەپ تۇر. بۇل كەڭەس قۇرىلعالى بەرى بيزنەسمەندەردەن 70 ءوتىنىش-حات كەلىپ ءتۇسىپتى. بۇلارمەن بىرگە, ۇلتتىق پالاتا بيزنەسمەندەردى قوسىمشا وقىتىپ, ءبىلىم-بىلىگىن ارتتىرۋدى قاراستىراتىن ينتەرنەت ارقىلى ءبىلىم بەرۋ جۇيەسىن ىسكە قوسۋدى جوسپارلاپ وتىر ەكەن. «ەلباسى ايتقانداي, شاعىن بيزنەستىڭ ورتا كاسىپكەرلىككە كوشۋىنە ىقپال جاساۋدا ينتەرنەتتىك وقىتۋ جۇيەسى وتە ماڭىزدى دەپ ويلايمىز. بۇل جەردە اقپاراتتانۋدى, قۇزىرەتتىلىكتى, جالپى ءبىلىم دەڭگەيىن ارتتىرۋ ەڭ باستى فاكتور بولىپ تابىلادى», دەدى توراعا. ەلىمىزدىڭ جەكەلەگەن وڭىرلە­رىندەگى ەسەلەپ ءوسىپ جاتقان تاريفتەر دە ا.مىرزاحمەتوۆتىڭ نازارىندا ەكەن. ونىڭ سوزىنە سەنسەك, اقتوبە جانە ورالدا تاريف وسىمدەرى شاعىن جانە ورتا بيزنەستىڭ ەڭسە كوتەرۋىنە مۇرشا بەرمەي تۇر. ۇلتتىق كاسىپكەرلەر پالاتاسى بۇل ماسەلەنى ەجىكتەي كەلىپ, الداعى ناۋرىز ايىندا ۇكى­مەتكە اتالعان پروبلەمالاردى شەشۋ تۋرالى ارنايى ۇسىنىس جاساۋدى جوسپارلاپ وتىر. سونداي-اق, اۋىلشارۋاشىلىق ونىمدەرىن ءوندىرۋشى اۋىل كاسىپ­كەرلەرىنە كەپىلزات جەتىس­پەۋشى­لىگىنىڭ ماسەلەسى دە پالاتا نازارىندا ەكەنىن جەتكىزدى. بريفينگتىڭ ەكىنشى بولىمىندە جۋرناليستەردىڭ بىرنەشە سۇراق­تارىنا تولىمدى جاۋاپ قايتارعان ا.مىرزاحمەتوۆ مەملەكەت باس­شى­سىنىڭ تاپسىرماسى بويىنشا قازاقستان بيزنەسى ەلدەگى ءاربىر وتباسىعا كىرىپ, ەركىن دامۋى ءۇشىن, كاسىپكەرلەردى قولداپ, قورعاۋ قاجەتتىگىن قاداپ ايتتى. نۇرباي ەلمۇراتوۆ, «ەگەمەن قازاقستان».