بۇل تۋرالى قر اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت اقپارات جانە قوعامدىق دامۋ سالاسىنداعى قوعامدىق كەڭەستىڭ وتىرىسىندا ايتتى.
«مەملەكەت باسشىسىنىڭ قازاقستان حالقىنا جولداۋىندا قويىلعان مىندەتتەردە مينيسترلىككە اۋىلدى جەرلەردەگى ازاماتتىق باستامالاردى قولداۋ تەتىگىن ازىرلەۋ تاپسىرىلدى. بۇل باستاما اكىمدەردىڭ تىكەلەي سايلاۋىن ەنگىزۋدىڭ, جەرگىلىكتى ءوزىن-ءوزى باسقارۋدىڭ, بيۋدجەتتىڭ ءتورتىنشى دەڭگەيىن ەنگىزۋدىڭ وزەكتى جالعاسى بولىپ تابىلادى. بۇل شەشىمدەردىڭ ءبارى اۋىل تۇرعىندارىنىڭ, ياعني قازاقستاندىقتاردىڭ 40 پايىزدان استام حالقىنىڭ مۇددەلەرىنە تىكەلەي بايلانىستى», دەدى كوميتەت باسشىسى.
ونىڭ ايتۋىنشا, جەرگىلىكتى ءوزىن-ءوزى باسقارۋدى ودان ءارى جاڭعىرتۋدىڭ ماڭىزدى فاكتورى – ازاماتتىق مادەنيەتتى دامىتۋ.
«بۇل تاڭدا مەملەكەت اۋىلداعى ازاماتتىق باستامالاردى شاعىن گرانت بەرۋ ارقىلى قولداپ جاتىر. جالپى اۋىلدى جەرلەردە تىركەلگەن 12 مىڭنان استام ۇكىمەتتىك ەمەس ۇيىم بار. باسقا دا ازاماتتىق بەلسەندىلەر شاعىن گرانت ارقىلى ءوز باستامالارىنا قولداۋ تابا الادى. 2019-2021 جىلدارى بۇل ماقساتتارعا بۇكىل ەل بويىنشا 340 شاعىن گرانت ءبولىندى. وسى گرانتتار اياسىندا اۋىلدى جەرلەردە ءار ءتۇرلى ورتالىقتار اشىلدى. ونىڭ ىشىندە الەۋمەتتىك شەبەرحانالار, از قامتىلعان جانە كوپبالالى وتباسىلارعا ارنالعان ورتالىقتار, بوس ۋاقىت وتكىزەتىن نىساندار, بالالار الاڭدارى مەن سپورت وبەكتىلەرى, ونىڭ ىشىندە مۇمكىندىگى شەكتەۋلى ادامدارعا ارنالعان سپورتزالدار, قارت ادامدارعا ارنالعان سالاۋاتتى ءومىر سالتى ۇيىرمەلەرى جانە تاعى باسقا ورتالىقتار اشىلدى», دەگەن مينيسترلىك وكىلى اۋىلداعى باستامالاردى قولداۋمەن بۇدان بىلاي جەرگىلىكتى اكىمدىكتەر دە اينالىساتىنىن اتادى.
ول ءۇشىن ولاردىڭ جانىنان ارنايى ورتالىقتار اشىلماق.
«اۋىلداعى ازاماتتىق باستامانى قولداۋعا ارنالعان وسىنداي جوبالار كەلەسى جىلى دا جوسپارلانعان. اۋىلدى جەرەلەردەگى قوعامدىق باستامالاردى كەڭىنەن قامتۋعا بۇل جەتكىلىكسىز. وسىعان بايلانىستى اكىمدىكتەردى وسى پروتسەستەرگە تارتۋ تارتۋ بويىنشا بەلسەندى جۇمىس جۇرگىزىزىلىپ جاتىر. قازىرگى تاڭدا جەرگىلىكتى اكىمدىكتەرمەن كەلىسسوزدار جۇرگىزىلىپ, كەلەسى جىلعا ولاردىڭ بيۋدجەتتەرى ارقىلى ازاماتتىق باستامالاردى قولداۋ ورتالىعى جۇمىسىن باستاعالى وتىر», دەدى ماديار قوجاحمەت.
