بيىلعى 7 ايدا تەرىسكەي وڭىرلەرگە تۇركىستان وبلىسىنان 302 وتباسى, ياعني 1341 تۇرعىن كوشىپ بارىپتى. بۇل – رەسپۋبليكا بويىنشا قونىس اۋدارۋشىلاردىڭ 30 پايىزى. مەملەكەتتىك باعدارلاما اياسىندا قونىس اۋدارۋشىلار قاتارى جىل سايىن ارتىپ كەلەدى. سولتۇستىككە كوشكەن وتباسىلار بىرنەشە ماسەلەنى بىردەن شەشە الادى. باسپانالى بولادى, تۇراقتى جۇمىس تابادى, شارۋاشىلىق جەردى يەلەنەدى. ال استىقتى ايماقتار قوسىمشا جۇمىس كۇشىمەن تولىعىپ, دەموگرافيالىق ءوسىمى جوعارىلايدى.
بيىل ەڭبەك جانە حالىقتى الەۋمەتتىك قورعاۋ مينيسترلىگى «ەڭبەك» مەملەكەتتىك باعدارلاماسى بويىنشا سولتۇستىك وڭىرلەرگە قونىس اۋدارۋشىلار ءۇشىن 6039 وتباسىنا كۆوتا ءبولدى. ال شەتەلدەن كەلگەن قانداستارىمىزعا 1426 وتباسىنا كۆوتا ۇسىنىلىپ وتىر. اتاپ ايتقاندا, اقمولا وبلىسى – 258, شىعىس قازاقستان وبلىسى – 195, قوستاناي وبلىسى – 350, پاۆلودار وبلىسى – 500, سولتۇستىك قازاقستان وبلىسى 123 وتباسىن قابىلداۋعا دايىن. ىشكى كوشى-قون ءۇشىن شىعىس قازاقستان وبلىسىنا 637 تۇرعىنعا كۆوتا دايىندالسا, قوستاناي وبلىسى – 455, پاۆلودار وبلىسى – 2600, سولتۇستىك قازاقستان وبلىسى 2347 تۇرعىندى قارسى الماق.
وسى ورايدا تۇركىستان وبلىسىنىڭ اكىمدىگى, جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى, Nur Otan پارتياسىنىڭ وبلىستىق فيليالى «ەڭبەك» مەملەكەتتىك باعدارلاماسىن جۇزەگە اسىرۋدا بىرلەسە جۇيەلى جۇمىس اتقارىپ كەلەدى. ناقتىراق ايتساق, كوشى-قوندى ۇيىمداستىرۋ مەن اقپاراتتىق جۇمىس كۇشەيتىلگەن. پارتيا فيليالدارى, بارلىق اۋدان, قالاداعى جۇمىسپەن قامتۋ ورتالىقتارى بىرلەسە جۇمىس ىستەۋدە. دەپۋتاتتار مەن بەلسەندى ازاماتتار دا ستراتەگيالىق ماڭىزدى ىسكە ءوز ۇلەستەرىن قوسىپ كەلەدى. مىسالى, كاسىپكەر جاڭاباي اعابەكوۆ ارنايى اۆتوبۋس ءبولدىرىپ, قونىس اۋدارۋعا نيەت بىلدىرگەندەردى سولتۇستىككە ءوزى اپارىپ كەلگەن.
«اتقارىلىپ جاتقان جۇمىستاردىڭ ناتيجەسىندە اۋداندار مەن قالالاردا جۇمىس ءبىرشاما جاندانا ءتۇستى. وتكەن جىلى ءبىزدىڭ وڭىردەن بارلىعى 347 وتباسى, 1066 ادام قونىس اۋدارسا, بيىل 7 ايدىڭ وزىندە وسى كورسەتكىشكە جاقىنداپ قالدىق. بىلتىر سايرام اۋدانىنان 42 وتباسى (141 ادام) كوشسە, بيىل 7 ايدا 150 تۇرعىن جاڭا مەكەنگە قونىس اۋداردى. سونىمەن بىرگە جەتىساي, سارىاعاش اۋداندارىندا دا قوزعالىس بار. پاندەميا ەكونوميكاعا عانا ەمەس, كوشى-قونعا دا تەرىس اسەرىن تيگىزىپ جاتىر. دەگەنمەن بۇل يگى ءداستۇر توقتامايدى, جالعاسىن تابادى. كارانتين كوپتەگەن جوسپاردى وزگەرتتى. ەندى ونلاين باعىتتاعى ناسيحاتقا بارىنشا كوڭىل ءبولىپ, كوممۋنيكاتسيانىڭ بارلىق ءتۇرى كەڭىنەن قولدانىلماق. جۋىردا Telegram الەۋمەتتىك جەلىسىنەن «تۇركىستاننان – تەرىسكەيگە» اتتى ارنايى ارنا ىسكە قوسىلدى», دەيدى Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى بەيسەنباي تاجىباەۆ.
ىشكى كوشى-قونعا سولتۇستىك وڭىردەن كەلەتىن اكىمدىكتەر وكىلدەرى مەن ارنايى ءىس-شارالار دا وڭ ىقپال ەتۋدە. جۋىردا ارىس قالاسىندا Nur Otan پارتياسى قالالىق فيليالى مەن حالىقتى جۇمىسپەن قامتۋ ورتالىعى بىرلەسىپ, «ەڭبەك» مەملەكەتتىك باعدارلاماسى اياسىندا سولتۇستىك وڭىرلەرگە قونىس اۋدارۋ ماسەلەسى بويىنشا «اشىق ەسىك» كۇنىن وتكىزدى. قالا تۇرعىندارىنا پاۆلودار وڭىرىنەن ارنايى دەلەگاتسيانى باستاپ كەلگەن شارباقتى اۋداندىق جۇمىسپەن قامتۋ ورتالىعىنىڭ ديرەكتورى گ.سمايلحانوۆا جانە گالكين اۋىلدىق وكرۋگىنىڭ اكىمى د. نۇرسەيتوۆ ۇگىت-ناسيحات جۇمىسىن جۇرگىزدى. ناتيجەسىندە, ارىس قالاسىنان 10 وتباسى كوشۋگە نيەت ءبىلدىرىپ وتىرعاندىقتارىن جەتكىزدى.
پاۆلودار وبلىسىنا قونىس اۋدارعىسى كەلەتىن وتباسىلار از ەمەس. مىسالى, جىل باسىنان بەرى اتالعان وبلىسقا 205 وتباسى قونىس اۋدارعان. «باعدارلامانىڭ شاراپاتىن كورگەندەردىڭ 50%-ى – ەڭبەككە قابىلەتتى جاندار, 1%-ى – زەينەتكەرلەر, 49%-ى – بالالار. قونىس اۋدارعانداردىڭ باسىم كوپشىلىگى اۋىل شارۋاشىلىعىمەن اينالىسقىسى كەلەدى. جۇمىس, ءۇي الۋ ماسەلەسىن رەتىمەن شەشۋ جولعا قويىلعان. كەلىسىمگە ساي كوشىپ كەلگەن وتباسى مۇشەلەرى 5 جىل اۋىلدا تۇراقتاپ قالۋى شارت, ايتپەسە بەرىلگەن قاراجات مەملەكەت قازىناسىنا قايتارىلۋعا ءتيىس», دەدى پاۆلودار وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى مەرۋەرت ەسەمباەۆا. ال تەرەڭكول اۋدانىنداعى جۇمىسپەن قامتۋ ورتالىعىنىڭ ديرەكتورى ازامات مۇقانوۆ پاۆلوداردان 105 شاقىرىم جەردە ورنالاسقان اۋداندا 35 ەلدى مەكەن, 12 اۋىلدىق وكرۋگ بارىن, مەحانيزاتورلار تاپشى ەكەنىن ايتادى.
«كەز كەلگەن تۇرعىن كوشۋگە نيەتتى بولسا, قۇشاق جايا قارسى الۋعا دايىنبىز. ءوز كاسىبىن اشامىن دەۋشىلەرگە ەگىن, مال شارۋاشىلىعىمەن اينالىسۋعا جەر تەلىمدەرى ۇسىنىلادى», دەدى ا.مۇقانوۆ.
ساۋران اۋدانىنا ىسساپارمەن كەلىپ, تۇرعىندارعا قونىس اۋدارۋ باعدارلاماسىن تۇسىندىرگەن پاۆلودار اۋدانى اكىمىنىڭ ورىنباسارى قايرات نۇرماعامبەتوۆ كوشىپ كەلگەن وتباسىنىڭ ءار مۇشەسىنە 204 مىڭ تەڭگە كولەمىندە سۋبسيديا بەرىلەتىنىن ايتتى.
«سونداي-اق ءبىر جىل بويى پاتەر جالداپ تۇرۋى ءۇشىن 400 000-600 000 تەڭگە ارالىعىندا پاتەراقى قارجىسى دا قاراستىرىلعان. ال سولتۇستىككە باعدارلاما ارقىلى كوشىپ كەلىپ, ءوز اقشاما ءۇي ساتىپ الامىن دەۋشىلەرگە جىلدىق پاتەراقىعا قاراستىرىلعان قارجى ءۇي ساتىپ الۋعا قوسىلعان ۇلەس رەتىندە بەرىلەتىنىن دە ايتا كەتكىم كەلەدى. كوشىپ كەلگەن وتباسىلاردى جۇمىسپەن قامتۋ, بالالاردى بالاباقشا مەن مەكتەپكە ورنالاستىرۋ سياقتى بارلىق جاعداي جاسالعان. پاۆلودار اۋدانىندا دا كوشىپ كەلۋشىلەردىڭ جاعدايىن ارتتىرۋعا ارنالعان جۇمىس قارقىندى», دەدى قايرات قايىرجان ۇلى.
دەرەكتەرگە جۇگىنسەك, تۇركىستاندىقتاردىڭ باسىم بولىگى پاۆلودار وبلىسىن تاڭداعانىن اڭعارامىز. بۇل وڭىرگە 205 وتباسى (972 ادام) نەمەسە قونىس اۋدارۋشىلاردىڭ 67,9 پايىزى قازىق قاققان. سولتۇستىك قازاقستان وبلىسىنا – 69 وتباسى (272 ادام), قوستاناي وبلىسىنا – 16 وتباسى (74 ادام), ال شىعىس قازاقستان وبلىسىنا 12 وتباسى (23 ادام) كوشكەن. ال وبلىس بويىنشا سايرام (150 ادام), سارىاعاش (142 ادام), جەتىساي (118 ادام), ماقتاارال (115 ادام), شاردارا (104 ادام) اۋداندارى مەن ارىس (108 ادام) قالاسىندا تەرىسكەيگە قونىس اۋدارۋشىلار كوپ.
تۇركىستان وبلىسى
