قوعام • 22 قىركۇيەك، 2021

قازاق ادەبيەتى الەمنىڭ 90-نان استام ەلىنە تاراتىلدى

65 رەت كورسەتىلدى

قازاق پروزاسى مەن پوەزياسىنىڭ انتولوگياسى الەمنىڭ 90-نان استام ەلىنە تاراتىلدى. بۇل تۋرالى قر پرەزيدەنتى جانىنداعى قوعامدىق سانانى جاڭعىرتۋ باعدارلاماسىن ىسكە اسىرۋ جونىندەگى ۇلتتىق كوميسسيانىڭ كەڭەيتىلگەن ماجىلىسىندە قر اقپارات جانە قوعامدىق دامۋ ءمينيسترى ايدا بالاەۆا ايتتى، دەپ حابارلايدى Egemen.kz.

«100 جاڭا ەسىم» جوباسى نەگىزىندە ءوز سالاسىندا قازاقستاننىڭ دامۋىنا ۇلەس قوسۋشى 100 جاڭا تۇلعا تاڭدالىپ، كوپشىلىككە تانىستىرىلدى. ولاردىڭ ەسىمدەرىمەن تۇلعالارى كەڭىنەن ناسيحاتتالىپ، وسكەلەڭ ۇرپاققا جاقسى ۇلگى-ونەگەگە اينالدى.

«100 جاڭا ەسىم» جوباسىنا ىرىكتەلگەن قايراتكەر جاستار ءوندىرىس پەن كاسىپتى، عىلىم مەن مادەنيەتى العا تارتاتىن تۇلعالاردىڭ جاڭا لەگىن قۇرايدى دەپ سانايمىز»، دەدى مينيستر.

سونىمەن قاتار ول «جاھانداعى زاماناۋي قازاقستاندىق مادەنيەت» جوباسى اياسىندا «قازىرگى قازاق پروزاسىنىڭ انتولوگياسى» جانە «قازىرگى قازاق پوەزياسىنىڭ انتولوگياسى» بۇۇ-نىڭ 6 رەسمي تىلىنە اۋدارىلىپ، اعىلشىن، اراب، يسپان، قىتاي، ورىس جانە فرانتسۋز تىلدەرىندە سويلەتىن 90-نان اسا ەلدىڭ ءىرى كىتاپحانالارىنا، وقۋ ورىندارى مەن ادەبي ورتالىقتارىنا، جالپى سانى 20 مىڭعا تارتا ۇيىمدارعا جەتكىزىلگەندىگىن ايتتى.

«بۇل جيناقتاردى حالىقارالىق تانىستىرۋ ءىس-شارالارى لوندون، مادريد، پاريج، ماسكەۋ جانە كاير قالالارىندا ءوتتى. سونداي-اق حالىقارالىق قوعامداستىقپەن بايلانىستى شىعايتۋ ماقساتىندا قىتاي، اقش، تۇركيا، رەسەي، فينليانديا، كورەيا، مالايزيا، ۆەنگريا، شۆەتسيا جانە باسقا دا ەلدەردىڭ ۇلتتىق كىتاپحانالارىندا 34 قازاقستاندىق ادەبيەت جانە مادەنيەت ورتالىعى اشىلدى.

قر پرەزيدەنتى قاسىم-جومارت توقاەۆتىڭ تاپسىرماسىمەن وتكەن جىلى اباي قۇنانبايۇىلىنىڭ 175 جىلدىعى اياسىندا ۇلى اقىن شىعارمالارىنىڭ جيناعى الەمنىڭ ءىرى 10 تىلىنە اۋدارىلىپ، الەمگە ۇسىنىلدى.

بۇل باستاما دا ءتول ادەبيەتىمىزدى الەمگە تانىستىرۋ، مادەنيەتىمىزدى ناسيحاتتاۋعا قوسىلعان زور ۇلەس دەپ بىلەمىن»، دەدى ايدا بالاەۆا.

سوڭعى جاڭالىقتار

جەتى وڭىردە 2 گرادۋس ۇسىك جۇرەدى

اۋا رايى • بۇگىن، 18:48

دوللار ارزاندادى

ەكونوميكا • بۇگىن، 15:50

ۇقساس جاڭالىقتار