بۇل تۋرالى قر يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قاراباەۆ قازاقستان ماشينا جاساۋشىلارىنىڭ ءىح فورۋمىندا ايتتى.
«ەلىمىزدىڭ ساپالى دامۋى وڭدەۋشى ونەركاسىپتىڭ نەعۇرلىم ءتيىمدى جانە باسەكەگە قابىلەتتى باعىتتارىنا ونەركاسىپتىك ساياساتتى شوعىرلاندىرۋعا نەگىزدەلۋى ءتيىس. الەمدىك تاجىريبەدە ماشينا جاساۋ «تەحنولوگياسى كۇردەلى» سالالاردىڭ قاتارىنا كىرەدى. سوندىقتان ءبىز, نەعۇرلىم كۇردەلى جانە تيىسىنشە قوسىمشا قۇنى جوعارى تاۋارلاردى وندىرۋگە ءتيىسپىز. ماشينا جاساۋ ءونىمىنىڭ وتاندىق ءوندىرىسىن قولداۋ ءۇشىن مينيسترلىك قازاقستاننىڭ ماشينا جاساۋشىلار وداعىمەن بىرلەسىپ, ماشينا جاساۋدى دامىتۋدىڭ 2019-2024 جىلدارعا ارنالعان جول كارتاسىن ازىرلەدى, بەكىتتى جانە ىسكە اسىرۋدا», دەدى ۆيتسە-ءمينيسترى فورۋمنىڭ پلەنارلىق وتىرىسىندا.
ونىڭ سوزىنە قاراعاندا, جول كارتاسى سالىق پرەفەرەنتسيالارىن ەنگىزۋ, ينستيتۋتسيونالدىق ورتانى جەتىلدىرۋ, وتاندىق كاسىپورىنداردى شيكىزاتپەن قامتاماسىز ەتۋ, ساتىپ الۋداعى جەرگىلىكتى قامتۋ ۇلەسىن ارتتىرۋ, تەحنيكالىق رەتتەۋ شارالارىن جەتىلدىرۋ, ەكونوميكالىق ىنتالاندىرۋ تەتىكتەرىن ەنگىزۋ بولىگىندە ءىس-شارالاردى كوزدەيدى.
«قازىرگى ۋاقىتتا ماشينا جاساۋدى دامىتۋ جونىندەگى 2019-2024 جىلدارعا ارنالعان جول كارتاسىن وزەكتەندىرۋ جۇرگىزىلۋدە, وندا وتاندىق تاۋار وندىرۋشىلەردى قولداۋ مەن ىنتالاندىرۋدىڭ قوسىمشا تەتىكتەرى بويىنشا ۇسىنىستار ازىرلەندى.
وسىلايشا, وتاندىق تاۋار وندىرۋشىلەردى قولداۋ ماقساتىندا مينيسترلىك كاسىپكەرلىكتى ىنتالاندىرۋ تۋرالى ەرىكتى كەلىسىم جاساسۋ بويىنشا شارا ۇسىندى. كەلىسىمگە جەر قويناۋىن پايدالانۋ سالاسىنداعى ۋاكىلەتتى ورگان مەن جەر قويناۋىن پايدالانۋشىلار اراسىندا قول قويىلادى جانە حالىقارالىق مىندەتتەمەلەرگە قايشى كەلمەيدى.
بۇگىنگى تاڭدا قاتتى پايدالى قازبالاردى ءوندىرۋ بويىنشا 37 جەر قويناۋىن پايدالانۋشىمەن 46 كەلىسىمگە جانە كومىرسۋتەك شيكىزاتى بويىنشا 65 جەر قويناۋىن پايدالانۋشىلمەن 112 كەلىسىمگە قول قويىلدى», دەدى مارات قاراباەۆ.
