سمايليكپەن ءسوز سۇلۋ. ادامزات زامانعا ساي قام-قارەكەت قىلماسا, ورتاعا بەيىمدەلمەسە, ەسكىلىكپەن ەسەپ ايىرىلىسپاسا, ەندىگى ۋاقىتتىڭ بەت-الپەتى سىزگە كۇلىپ قاراماۋى كادىك. ءبىز جازۋ مادەنيەتىنىڭ ءھام ءسوز ساپتاۋدىڭ ىشكى استارىنا ۇڭىلگىمىز كەلەدى. پەرنەتاقتاعا ساۋساعى بايلانعان ادامنىڭ ادەپكى ادەتىنە اينالعان اقپارات قۇرالى اقتولقىن ءماتىننىڭ تۇزدىعى ىسپەتتى. عالامتورداعى قارىم-قاتىناس ءسىزدىڭ ەموتسياڭىزدى بۇركەمەلەگەنىمەن ديالوگ بارىسىندا ميميكاڭىزدى جاسىرۋ مۇمكىن ەمەس. ماتىندە دە مىنەز بار. قۋىرشاققا ۇقساس قىلىقتى يشاراتتىڭ قايدان كەلگەنىنە بىلايعى جۇرت باس قاتىرمايدى. ال, ونىڭ ءوز تاريحى, ءوز تۇسپالى بار. بۇگىنگى اڭگىمەمىزدىڭ توركىنى سول جاقتان.
سمايليك اعىلشىننىڭ «smile» سوزىنەن شىققان, «كۇلىمسىرەۋ» دەگەن ماعىناعا سايادى. بىلايشا ايتقاندا, ەموتسياڭىزدى بەينەلەيتىن يدەوگرامما. بۇگىندە سوزدەر جاقشالار مەن قوس نۇكتەلەردى ەرتىپ جۇرمەسە جەتىمدەي كوزگە كوپ تۇسە بەرمەيدى ءارى قوراش كورىنەتىنى تاعى بار. ماسەلەن, مىنا ءبىر «:-)», «:)» تاڭبالاردى الىپ قاراڭىزشى. وسى ارۋدىڭ بەلىندەي مايىسقان جاقشالاردىڭ سوزگە جان بىتىرەتىنى قىزىق. بۇل ءسىزدىڭ قۋانىشتى ءجۇزىڭىزدىڭ كورىنىسى. ال كەرىسىنشە قايعىرساڭىز شاتتىعىڭىز ساپ باسىلىپ, كوڭىل كۇيىڭىزگە كولەڭكە ۇيالاعانىن ءبىلدىرىپ قوياسىز. شىنايى ءسوزدىڭ سمايليكپەن شىرايى كىرەدى.
سمايليكتەردىڭ شەجىرەسىن شەرتسەڭىز, دەگبىرى قاشقان دەرەكتەر تولىپ جاتىر. ءبىرى – كىشكەنتاي بالانىڭ قىلىعىنان ىزدەسە, ەندىگىسى تاعدىرىن قىتاي يەروگليفتەرىمەن بايلانىستىرادى. مۇنىڭ ءبارى جاڭساق پىكىر. 1963 جىلى امەريكالىق سۋرەتشى حارۆي بولل العاش رەت ك ۇلىمسىرەۋدى ەكى نۇكتە مەن سارى شەڭبەردەگى دوعا تۇرىندە بەينەلەيدى. ول مۇنى State Mutual Life Assurance Cos ساقتاندىرۋ كومپانياسىنىڭ تاپسىرىسى بويىنشا جاساعان. ونداعى كومپانيانىڭ ماقساتى – ۇجىمنىڭ مادەني قارىم-قاتىناسىن جاعىمدى ەموتسيالاردى بەينەلەيتىن ارنايى سيمۆولدارمەن تولىقتىرۋ. ياكي ۇجىم ىشىندەگى تاتۋلىقتى نىعايتۋدى كوزدەيدى.
سودان كەيىن بۇل سمايليكتەر تۇيرەۋىشكە بەكىتىلىپ, ودان بەيدجيك تە جاسالادى. اتالعان كومپانيا ولاردى ءاربىر قىزمەتكەرى مەن تۇتىنۋشىسىنا سىيعا تارتادى. بۇل لوگوتيپتىڭ وتە ءساتتى شىققانى سونشالىق, 10 مىڭنان استام توسبەلگى مورلەنەدى. 1970 جىلى ءدال سول وپتيميستىك ۇرانعا «كۇنىڭىز جاقسى ءوتسىن!» دەگەن گرافيكاسى قوسىلدى. كەلەلى ءىس كومپانيانىڭ داڭقىن اسقاقتاتىپ قانا قويعان جوق, قىرۋار قارجى اكەلدى دە.
ال 1971 جىلى فرانتسۋز كاسىپكەرى فرانكلين لۋفراني smile-دى 80-نەن استام ەلدە ساۋدا بەلگىسى رەتىندە تىركەۋدى ويلادى. ءتىپتى 1968 جىلى پاريجدە كاسىبىن دوڭگەلەتۋ ءۇشىن ك ۇلىمسىرەۋ سيمۆولىن «مەن ويلاپ تاپقام» دەپ الەمگە جار سالدى. الايدا سمايليكتى كومپيۋتەر قاۋىمداستىعى بىردەن قابىلدامادى جانە مويىنداعىسى كەلمەدى. وسى رەتتە ايتا كەتەيىكشى, سمايليكتىڭ ەلەكتروندى نۇسقاسى دەربەس ازىرلەنگەن, ونىڭ حارۆي بوللعا ەشقانداي قاتىسى جوق دەگەن تەوريا دا بار. بىراق بىزدىڭشە سمايليكتەردىڭ اكەسى – حارۆي بولل بولىپ قالا بەرەدى.
العاشقى ەلەكتروندى سمايليكتەر 1970 جىلداردىڭ باسىندا PLATO دەپ اتالاتىن ارنايى پلاتفورمالاردا پايدا بولدى. بىراق ونىڭ كەسكىنى مۇلدە وزگەشە ەدى. ال قاراپايىم تۇرعىندار ونى قابىلداي المادى. اقىرى ونەرتاپقىشتار اينالىپ كەلىپ حارۆي بوللدىڭ ۇلگىسىنە باس ءيدى. ءسويتىپ, 1979 جىلى تۇڭعىش ەموتسيانى ەلەكتروندى تۇردە كەۆين ماككەنزي جىبەردى. ول جىميۋدى بىلاي بەلگىلەيدى «:-)». ارتىنان وعان سكوتت فاحلمان جان ءبىتىرىپ, بىزگە تانىس ءھام تانىمال سمايليك جاسادى. سول دومالاق باس كۇلكىلى بەلگىلەر كۇنى بۇگىنگە دەيىن قولدانىلىپ كەلەدى. مىنە, قىسقاشا تاريح وسىلاي ءوربيدى.
ايتپاقشى, جاپوندىقتار – كومپيۋتەرلىك ەموتسيالاردى وتە ءجيى قولداناتىن ۇلت. سوندىقتان ولاردى اينالىپ وتكەنىمىز ابەستىك بولار. كەيبىرەۋلەر جاپون سمايليكتەرى قازىرگىدەن دە جاقسى جانە ادەمى دەپ ويلايدى. وعان سەبەپ تە جوق ەمەس. ءوزىڭىز قاراڭىزشى. مىسالى : (^ - ^) – «قايىرلى تاڭ» نەمەسە (^_^) – «ساۋ بولىڭىز» دەگەن ماعىنانى بىلدىرەدى ەكەن. بايقايسىز با, جاپوندار اۋىزعا ەمەس, كوزگە كوپ كوڭىل بولگەن. ءتىپتى سول ارقىلى سمايليكتەردىڭ تۇتاس جيىنتىعىن قۇراعان. ءيا, ادامنىڭ كوزىنە قاراپ-اق, ىشكى جان-دۇنيەسىنىڭ تولقىنىسىن سەزۋگە بولادى.
كەيدە ءبىر ادامعا ارزۋىڭىزدى, وكپە-نازىڭىزدى, قايعى-قۋانىشىڭىزدى ءبىر عانا سمايليكپەن بەينەلەپ بەرۋىڭىزگە بولادى. اقتارىلىپ سويلەگەنشە, كوڭىل كۇيىڭىزدىڭ بۇراۋىن تاپقان بەلگىنى جولداساڭىز جەتىپ جاتىر, ءسىزدىڭ ساعىنىشىڭىز دا, تىلەك-ارىزىڭىز دا سوندا جاتىر. قازىرگى حالىڭىزدەن دە حاباردار بولادى. ونىڭ قۇپياسى وسىندا. ادامنىڭ ءتىلىن تابۋدا دا تاپتىرمايتىن قۇرال. قارىم-قاتىناستى جاقىنداتاتىن ءھام الىستاتاتىن نازىك سەزىمگە يە. سمايليكپەن سويلەڭىزشى, ايتار ويىڭىز اجارلانا ءتۇسسىن!
