جاقىندا استانادا تەننيستەن وتكەن دەۆيس كۋبوگىنىڭ 1/8 فينالدىق كەزدەسۋىندە قازاقستان كومانداسى بەلگيا قۇراماسىن 3:2 ەسەبىمەن جەڭىپ, شيرەك فينالعا شىقتى. ءبىرىنشى كۇنى ءبىزدىڭ وتانداستار قارسىلاستارىن 2:0 ەسەبىمەن ۇتىپ, 1/4 فينالعا شىعۋدىڭ نەگىزىن قالادى. وسى كۇنى وتكەن ماتچتى مەملەكەت باسشىسى نۇرسۇلتان نازارباەۆ كەلىپ, تاماشالادى.
كەزدەسۋدىڭ العاشقى كۇنى الدىمەن الەمدىك رەيتينگتە 67-ورىنداعى ميحايل كۋكۋشكين بەلگيالىق قارسىلاسى رۋبەن بەمەلمانستى قينالماي ۇتتى. ءتورت سەتكە سوزىلعان ماتچ 6:4, 6:7, 6:2, 6:3 ەسەبىمەن اياقتالدى.
ەكىنشى ويىندا اندرەي گولۋبەۆ پەن داۆيد گوففەن كەزدەستى. بۇل ويىن اسا تارتىستى ءوتتى. ول ءتورت ساعاتقا سوزىلدى. ءبىرىنشى سەت تاي-برەيككە دەيىن جالعاستى. گولۋبەۆ 11:9 ەسەبىمەن ونى ءوز پايداسىنا شەشە ءبىلدى.
ەكىنشى سەتتە 6:3 ەتىپ ۇتقان قارسىلاسى ەسەپتى تەڭەستىرىپ كەتتى. ءۇشىنشى سەتتە تاعى دا گوففەن باسىمدىق كورسەتتى. بۇل جولى ول 6:4 ەسەبىمەن جەڭدى. ال ءتورتىنشى سەتتە قازاقستاندىق تەننيسشى ەكى برەيكتى ءساتتى ورىنداپ, جالپى ەسەپتى قايتا تەڭەستىردى – 6:2. ءسويتىپ, كىمنىڭ باسىم ەكەنىن سوڭعى سەت شەشتى. اقىرعى ايقاس 12 گەيمگە دەيىن جالعاستى. وسى تۇستا گوففەننىڭ شارشاپ قالعانى انىق بايقالدى. مۇنى جاقسى پايدالانعان گولۋبەۆ سەتتى 12:10 ەتىپ اياقتادى.
وسىلايشا, جارىستىڭ العاشقى كۇنى قازاقستان قۇراماسى 2:0 ەسەبىمەن العا شىقتى. ەكىنشى كۇنى ەۆگەني كورولەۆ پەن دەنيس ەۆسەەۆ جۇبى وليۆە روحۋس - كيممەر كوپپەيانس تاندەمىمەن وينادى. بۇل كەزدەسۋدە قارسىلاستار 2:6, 7:4, 3:6, 6:7 (4:7) ەسەبىمەن ۇتتى.
سوڭعى كۇنى ميحايل كۋكۋشكين وليۆە روحۋستان ۇتىلدى. بەلگيالىقتار ەسەپتى تەڭەستىردى. ال شەشۋشى ماتچتا اندرەي گولۋبەۆ رۋبەن بەمەلمانسپەن ويناپ, 6:2, 6:3, 6:1 ەسەبىمەن جەڭىسكە جەتتى. قورىتىندى ەسەپ – 3:2. ءسويتىپ, قازاقستان قۇراماسى وسىمەن ءۇشىنشى رەت شيرەك فينالعا جولداما الدى. ەندى ءبىزدىڭ قۇراما تاعى دا شۆەيتساريامەن وينايدى.
داستان كەنجالين,
«ەگەمەن قازاقستان».
سۋرەتتەردى تۇسىرگەندەر س.بوندارەنكو, ب.وتارباەۆ.
