قوعام • 20 قىركۇيەك، 2021

تۇركى كەڭەسى جاستارمەن جۇمىسىنىڭ جاڭا قۇرالدارىن ىزدەۋ كەرەك — ا. بالاەۆا

131 رەت كورسەتىلدى

بۇگىن، 20 قىركۇيەكتە، وزبەكستان استاناسىندا تۇركى كەڭەسىنىڭ جاستار جانە سپورت ىستەرى مينيسترلەرىنىڭ 5-ءشى وتىرىسى ءوتتى، دەپ حابارلايدى Egemen.kz.

ونىڭ اياسىندا مينيسترلەر تۇركى كەڭەسىنىڭ IDEA جاس كاسىپكەرلەرىنىڭ 1-ءشى فورۋمىنىڭ اشىلۋ راسىمىنە قاتىستى.

قازاقستاندىق دەلەگاتسيانى قر اقپارات جانە قوعامدىق دامۋ ءمينيسترى ايدا بالاەۆا باستادى.

ءوز سوزىندە ايدا بالاەۆا تۇركى كەڭەسىنىڭ قاتىسۋشىلارىن جاھاندىق پاندەميا تۋدىرعان سىن-تەگەۋرىندەرگە قارسى تۇرۋ ءۇشىن جاستارمەن جۇمىستىڭ جاڭا قۇرالدارىن ىزدەۋگە شاقىردى.

«ماجارستاندى قوسا ەسەپتەگەندە كەڭەسكە مۇشە مەملەكەتتەردىڭ حالىق سانى 150 ميلليون ادامدى قۇرايدى ەكەن. سونىڭ 30 ميلليونى جاستار.  بۇل – تۇركى الەمى كەلەشەگىنىڭ زور الەۋەتىنىڭ دالەلى. جاستار – ءبىزدىڭ بولاشاعىمىز دەپ ءبىز ۇنەمى ايتىپ كەلەمىز»، دەپ اتاپ ءوتتى ول.

بۇل رەتتە، جاستار ساياساتى سالاسىنداعى ورتاق جۇمىستاردىڭ ناتيجەلى بولۋى ءۇشىن مينيستر تۇركى كەڭەسىنىڭ قاتىسۋشىلارىنا جەتى باعىتتا بىرلەسكەن ۇسىنىمدار جاسادى.

«جاستار ساياساتى سالاسىندا ىنتىماقتاستىقتى نىعايتۋدىڭ ماڭىزى زور.  ءبىزدىڭ مەملەكەت باسشىلارى بۇل باعىتتا ناقتى باعداردى كورسەتىپ، بارلىق جاعدايدى جاساپ بەرىپ وتىر. ءبىزدىڭ مىندەتىمىز وسى مۇمكىندىكتى بارىنشا تولىق پايدالانۋ. قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى تاجىريبە الماسىپ، بىلگەنىمەن بولىسۋگە، باياندى باستامالارعا قولداۋ كورسەتىپ، ورتاق جوبالارعا بەلسەندى قاتىسۋعا قاشاندا دايىن»، دەدى ا.بالاەۆا.

وعان قوسا، وتىرىس جۇمىسى اياسىندا مينيستر ايدا بالاەۆا تۇرىك رەسپۋبليكاسىنىڭ جاستار جانە سپورت ءمينيسترى مەحمەت مۋحاررەم كاساپوعلۋمەن جانە وزبەكستان رەسپۋبليكاسىنىڭ جاستار ىستەرى اگەنتتىگىنىڭ ديرەكتورى اليشەر سادۋللاەۆپەن كەزدەسۋلەر وتكىزدى.

سونىمەن قاتار، تۇركى كەڭەسىنە قاتىسۋشى مەملەكەتتەردىڭ مينيسترلەرى تۇركىتىلدەس مەملەكەتتەردىڭ ىنتىماقتاستىق كەڭەسى شەڭبەرىندە IDEA جاس كاسىپكەرلەرىنىڭ 1-ءشى جاستار فورۋمىنىڭ اشىلۋىنا قاتىستى.

قازاقستاندىق جاس بيزنەسمەندەر 6 سەسسياعا قاتىستى: اگروبيزنەس، IT-ستارتاپ، تۋريزم، جەڭىل ونەركاسىپ، تاماق ونەركاسىبى، ماركەتينگ.

ەستەرىڭىزگە سالا كەتەيىك، مينيسترلەر وتىرىسى تۇركى كەڭەسىنە قاتىسۋشى ەلدەردىڭ جاستار ساياساتى، ءبىلىم بەرۋ جانە سپورت سالاسىنداعى ىنتىماقتاستىعىن كەڭەيتۋگە بايلانىستى بىرقاتار ماسەلەلەردى شەشۋگە ىقپال ەتۋگە باعىتتالعان.

سوڭعى جاڭالىقتار

6 ءوڭىر «جاسىل» ايماقتا تۇر

كوروناۆيرۋس • كەشە

دەپۋتاتتى پىشاقتاپ كەتتى

الەم • 15 قازان، 2021

شەتەلدىك ۆاكتسينالار اقىلى بولادى

كوروناۆيرۋس • 15 قازان، 2021

ۇقساس جاڭالىقتار