قالا اكىمىنىڭ ورىنباسارى سايات شايمۇرىنوۆتىڭ ايتۋىنشا, مونيتورينگتىك توپتار تاياۋ كۇندەرى رەيد شارالارىن باستايدى. قالا اكىمدىگىنىڭ كاسىپكەرلىك ءبولىمى ۇجىمدا ۆاكتسينا قابىلداعانداردىڭ ۇلەسى 60%-عا جەتپەيتىن كاسىپورىنداردىڭ ءتىزىمىن ازىرلەپ قويعان. مونيتورينگتىك توپ ەڭ ءبىرىنشى كەزەكتە وسى ۇجىمداردى تەكسەرەدى.
– قازىرشە تەك كورونوۆيرۋس ينفەكتسياسىنا قارسى ۆاكتسينانىڭ ءبىرىنشى كومپونەنتىنىڭ بار-جوعىن تەكسەرەمىز. بىزدە جۇمىسشىلارىنىڭ سانى 50-دەن اساتىن كاسىپورىنداردىڭ ءتىزىمى بار. بۇل تىزىمگە ەنگەن نىساندارداعى ۇجىمنىڭ جارتىسىنان كوبى ۆاكتسينانىڭ ءبىرىنشى كومپونەنتىن الماعان. ەگۋ ناۋقانى 1 قىركۇيەككە دەيىن اياقتالۋى ءتيىس ەدى. بۇل تۋرالى رەسپۋبليكا كولەمىندە دە ءجيى ايتىلدى. بىراق ءالى دە ۆاكتسينا قابىلداماعاندار بارشىلىق, – دەدى قالا اكىمىنىڭ ورىنباسارى.
مونيتورينگتىك توپ تەكسەرۋ بارىسىندا ەشكىمگە ايىپپۇل سالمايدى. ەگەر ۆاكتسينا قابىلداماعاندار بولسا, ولارعا بۇل ادامزات بالاسىنىڭ ىندەتكە قارسى جاساعان ساقتىق شاراسى ەكەنىن ءتۇسىندىرىپ, ءبىر-ەكى اپتا ۋاقىت بەرەدى. ەگەر ۇجىم ەكىنشى قايتارا تەكسەرىلگەندە ۆاكتسينا سالدىرماعاندار تاعى تابىلىپ جاتسا, كاسىپورىن باسشىسىنا ايىپپۇل سالىنادى. مونيتورينگ توپ وكىلدەرىنىڭ ايتۋىنشا, جۇمىس بەرۋشىلەر كاسىپورىنعا كەلگەن تەكسەرۋشىلەرگە قاراماعىنداعى جۇمىسشىلاردىڭ تولىق ءتىزىمىن ۇستاتۋى ءتيىس. بۇل تىزىمدە جۇمىسشىنىڭ اتى-ءجونى مەن جسن-ءى, ەگىلگەنى نەمەسە ەگىلمەگەنى كورسەتىلۋى كەرەك. سونداي-اق ەكپەدەن بوساتىلعان جۇمىسشىلاردىڭ ءتيىستى قۇجاتتارى دا تولىق كورسەتىلۋى شارت.
قوستاناي وبلىسى
