Whatsapp جەلىسىندەگى حابارلامادا اۋزىنان اق يت كىرىپ, كوك يت شىققان الدەكىم: «...بۇگىن مەنىڭ ايەلىم ۇيىقتاپ قالىپ, ۇلىمدى مەكتەپكە اپارا المادى. قىزىم دا وقىمايدى. ويتكەنى ءبىر بالا كوۆيد جۇقتىرعان با, الدە ناۋقاسپەن بايلانىستا بولعان با, ايتەۋىر, 7 سىنىپتى تاراتىپ جىبەرىپتى. بۇگىن «مانتۋ» سىناماسىن الامىز دەپ الداپ, بالالارعا ەكپە سالىپتى. يۋركامەن بىرگە ءبىر بالا وقيتىن. ول ەكپە قابىلداپ, ۇيىنە كەلگەن سوڭ, ءوزىن ناشار سەزىنىپ, دەنە قىزۋى 40-قا دەيىن كوتەرىلگەن سوڭ, جانساقتاۋ بولىمىنە الىپ كەتىپتى, بالاقاي سول جەردە كوز جۇمعان. 9 جاستاعى بالا, ەكپەدەن ءولدى. تاعى ءۇش بالا اۋىر حالدە اۋرۋحانادا جاتىر. وسىنىڭ ءبارىن ىستەپ وتىرعان قوستانايداعى №7-مەكتەپ. 13 بالاعا مانتۋ دەپ, ونىڭ ورنىنا ۆاكتسينا ەككەن. ەكپەنى اتا-انالاردىڭ رۇقساتىنسىز ەككەن, تەزىرەك تاراتىڭدار وسىنى», دەپ ىشقىنا سويلەيدى.
ەكىنشى بىرەۋ قىپ-قىزىل وتىرىكتى قىزدىرا ءتۇسىپ: «قازىر عانا سەرەگا قوڭىراۋ شالدى, ەكىنشى بالا دا كوز جۇمىپتى. جانساقتاۋ بولىمىندە 4 بالا جاتقان, سونىڭ ەكەۋى ءولدى», دەيدى.
وبلىستىق دەنساۋلىق ساقتاۋ باسقارماسى مەن ءبىلىم باسقارماسىنىڭ وكىلدەرى بۇل اقپاراتتى جوققا شىعارىپ, قوستاناي وبلىسىندا بىردە-ءبىر مەكتەپتە وقۋشىلارعا كوروناۆيرۋستىق ينفەكتسياعا قارسى ۆاكتسينالاۋ جۇرگىزىلمەگەنىن مالىمدەدى. پوليتسيا جەلىدەن جەل ءسوز تاراتقان بەلگىسىز ەكەۋدى انىقتاۋ ءۇشىن كەشەندى جەدەل-ىزدەستىرۋ ءىس-شارالارىن قولعا الدى.
– اتالعان فاكتىگە قاتىستى قك-ءنىڭ 274-بابىندا كوزدەلگەن «كورىنەۋ جالعان اقپارات تاراتۋ» بويىنشا سوتقا دەيىنگى تەرگەۋ باستالدى. اتالعان باپ بويىنشا 1 مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋ نەمەسە سول مولشەردە تۇزەۋ جۇمىستارىنا, بولماسا 400 ساعاتقا دەيىن قوعامدىق جۇمىسقا تارتۋ, سونداي-اق ءبىر جىلعا دەيىن باس بوستاندىعىن شەكتەۋ جانە باس بوستاندىعىنان ايىرۋ جازاسى كوزدەلگەن. جالعان حابار نەمەسە الەۋمەتتىك جەلىدە نەگىزسىز اقپارات تاراتاتىندار قىلمىستىق جاۋاپكەرشىلىككە تارتىلاتىنىن ەسكەرتەمىز, – دەدى وبلىستىق پد باسشىسىنىڭ كەڭەسشىسى ەلەنا كاشارينا.
بۇل جايدان اتالعان مەكتەپتە بالالارىن وقىتىپ جاتقان اتا-انالار دا حاباردار ەكەن. ءبىلىم وشاعىندا ەشقانداي ەكپە جۇرگىزىلمەگەنىن ولار دا ايتىپ وتىر.
قوستاناي وبلىسى
