مەديتسينا • 16 قىركۇيەك، 2021

پاتوگەندى بيولوگيالىق نىساندار ەسكەرتۋسىز تەكسەرىلۋى مۇمكىن - ەرلان قياسوۆ

34 رەت كورسەتىلدى

قر دەنساۋلىق ساقتاۋ ۆيتسە-ءمينيسترى – باس سانيتار دارىگەر ەرلان قياسوۆ ءماجىلىس دەپۋتاتتارىنىڭ الدىندا «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» زاڭ جوباسىن تانىستىردى، دەپ حابارلايدى Egemen.kz.

اۋەلى بيولوگيالىق قاۋىپسىزدىك سالاسىنداعى كەمشىن ءتۇسىپ جاتقان تۇستاردى اتاعان ۆيتسە-مينيستر ۇسىنىلىپ وتىرعان قۇجاتتىڭ ەڭ نەگىزگى نورمالارىنا توقتالدى.

«پاتوگەندى بيواگەنتتەرمەن جۇمىس ىستەيتىن سۋبەكتىلەردىڭ مەملەكەت تاراپىنان ءتيىمسىز باقىلانۋى بيواگەنتتەردىڭ ۋاقتىلى پروفيلاكتيكاسىن جۇزەگە اسىرۋعا مۇمكىندىك بەرمەيدى. بۇعان ءتيىستى نىسانداردىڭ تەكسەرۋمەن تومەن دەڭگەيدە قامتىلۋى جانە ونداي تەكسەرۋلەردىڭ الدىن الا حابارلاۋ ارقىلى جۇرگىزىلەتىنى سەبەپ بولىپ وتىر. بۇعان دەيىنگى تاجىريبەگە سۇيەنسەك، جوسىقسىز زەرتحانالار ءوز قىزمەتىن اسا قاۋىپتى پاتوگەندەرمەن جۇمىس ىستەۋگە ءتيىستى رۇقساتىن الماستان جۇزەگە اسىراتىنىن كورسەتتى. ولار نىساندا تەكسەرۋ بولاتىنىن الدىن الا بىلگەندىكتەن، ءدال تەكسەرۋ الدىندا زاڭدا تىيىم سالىنعان زاتتاردى جويىپ ۇلگەرەدى»، دەيدى ەرلان قياسوۆ.

ونىڭ ايتۋىنشا، اتالمىش نورما بيولوگيالىق نىساندارعا جۇرگىزىلەتىن تەكسەرۋلەردىڭ قولدانىستاعى سانىن كوبەيتۋدى كوزدەمەيدى.

«ۇسىنىلىپ وتىرعان نەگىزگى زاڭ جوباسىندا مەملەكەتتىك باقىلاۋ وبەكتىلەرىن تاۋەكەل دەڭگەيىنە قاراي جىكتەۋ كوزدەلگەن. ال ىلەسپە زاڭ جوباسىندا پاتوگەندىگى I جانە II ساناتتاعى بيواگەنتتەرمەن جۇمىس ىستەيتىن ۇيىمداردىڭ تەكسەرۋدەن وتەتىنى تۋرالى الدىن الا حاباردار ەتۋ تەتىگى الىپ تاستالادى. بۇل قاۋىپتى بيولوگيالىق وبەكتىلەردە بيوقاتەرلەردى الدىن الا انىقتاۋعا جانە بولدىرماۋعا مۇمكىندىك بەرەدى»، دەدى ەرلان قياسوۆ.

سونداي-اق، ۆەدومستۆو وكىلى بيولوگيالىق قاتەرى بار زاتتارمەن جۇمىس ىستەيتىن ورىنداردىڭ جاۋاپكەرشىلىگىن ارتتىرۋ بويىنشا نورمالار دايىندالعانىن ەسكە سالدى.

«قولدانىستا بار زاڭناماداعى ۇيلەسىمسىزدىكتەر سالاداعى تالاپتاردىڭ تومەن دەڭگەيدە ورىندالۋىنا اسەر ەتۋدە. وسىعان بايلانىستى ىلەسپە زاڭ جوباسىندا قاۋىپتى پاتوگەندەردى زاڭسىز قولدانعانى، وتكىزگەنى جانە ۇرلاعانى ءۇشىن، سونىڭ سالدارىنان اۋىر زارداپتارعا اكەپ سوقتىرعانى ءۇشىن قولدانىلاتىن شارالاردى قىلمىستىق جاۋاپكەرشىلىككە دەيىن كۇشەيتۋ ۇسىنىلعان»، دەدى ۆيتسە-مينيستر.

 

سوڭعى جاڭالىقتار

قانشا ادام ۆاكتسينا سالدىردى؟

كوروناۆيرۋس • بۇگىن، 09:40

847 ادام كوروناۆيرۋس جۇقتىردى

كوروناۆيرۋس • بۇگىن، 09:00

ۇقساس جاڭالىقتار